कोकण रेल्वे मार्गावर राजधानी एक्सप्रेसचे इंजिन रुळावरून घसरले

सिंधुदुर्ग : राजधानी एक्सप्रेसचे इंजिन रुळावरून घसरून कोकण रेल्वे मार्गावर अपघात झाला. सुदैवाने या अपघातात कोणीही जखमी झालेलं नाही. रत्नागिरी जिल्ह्यातील उक्षी आणि भोके दरम्यान करबुडे बोगद्यामध्ये आज पहाटे सव्वा चार वाजण्याच्या सुमारास हा अपघात झाला. अपघातग्रस्त हजरत निजामुद्दीन-मडगाव राजधानी सुपरफास्ट स्पेशल रेल्वे गोव्याच्या दिशेने जात होती. मुंबईपासून सुमारे ३२५ किलोमीटरवर असलेल्या करबुडे बोगद्यातील ट्रॅकवर दरड कोसळल्याने इंजिन रुळावरून खाली घसरले आणि हा अपघात झाला.

दरम्यान, या घटनेची माहिती मिळताच रेल्वेची देखभाल दुरुस्ती करणारी टीम घटनास्थळी दाखल झाली असून वैद्यकीय सुविधा देखील रत्नागिरीहून घटनास्थळी पोहोचवण्यात आल्या आहेत. या अपघातामुळे कोकण रेल्वे मार्गावरील या भागातील वाहतूक काही काळ ठप्प राहणार आहे. मार्गावर धावणाऱ्या विविध गाड्या सध्या नजीकच्या स्थानकावर थांबवण्यात आल्या आहेत.