मुख्यमंत्री एकनाथ शिंदे यांची तब्येत बिघडली, सर्व प्रशासकीय बैठका रद्द

मुंबई : सततचे दौरे आणि सभा यामुळे मुख्यमंत्री एकनाथ शिंदे यांची तब्येत बिघडल्याची माहिती आहे. या पार्श्वभूमीवर डॉक्टरांकडून त्यांना सक्त विश्रांतीचा सल्ला देण्यात आला आहे. त्यामुळे मुख्यमंत्री एकनाथ शिंदे यांनी आज दिवसभरातील सर्व प्रशासकीय बैठका रद्द केल्या आहेत.

एकनाथ शिंदे यांनी ३० जूनला मुंबईत येऊन मुख्यमंत्रिपदाची शपथ घेतली. तेव्हापासून त्यांचे सतत दौरे, सभा, बैठका, भाषणं, पत्रकार परिषदा असे सर्व वेळापत्रक आहे. गेल्या महिनाभरात रात्री-अपरात्री झालेले दिल्लीचे दौरे, पंढरपूर वारी, महाराष्ट्र दौरा यामुळे एकनाथ शिंदे यांच्यावर ताण आला असून त्यांना थकवा जाणवत आहे. त्यामुळे डॉक्टरांनी त्यांना एक दिवस सक्तीचा आराम करण्याच्या सूचना दिल्या आहेत. त्यामुळे त्यांनी आज एक दिवसाच्या सर्व प्रशासकीय बैठका रद्द केल्या आहेत.