धक्कादायक : ग्रामपंचायत सदस्यावर गोळीबार, पाच गोळ्या झाडून हल्लेखोर पसार

अहमदनगर : नेवासा तालुक्यात बऱ्हाणपूर ग्रामपंचायत सदस्यावर पाच गोळ्या झाडल्याची धक्कादायक घटना घडली आहे. मंगळवारी रात्री ही घटना घडली असून त्यामध्ये हा तरुण गंभीर जखमी झाला आहे. त्याच्यावर नगरच्या खासगी रुग्णालयात उपचार सुरू आहेत. हल्लेखोर पळून गेले असून पोलीस त्यांचा शोध घेत आहेत.

मिळालेल्या माहितीनुसार, बऱ्हाणपूर ग्रामपंचायतीचे सदस्य संकेत चव्हाण मंगळवारी रात्री नऊच्या सुमारास कांगोणी फाट्यावरून बऱ्हाणपूरकडे जात होते. त्यावेळी ते रस्त्यात एका ठिकाणी लघुशंका करण्यासाठी थांबले असता दुचाकीवरून आलेल्या दोन हल्लेखोरांनी त्यांच्यावर गोळ्या झाडल्या. चव्हाण यांच्या पोटावर, हातावर, पायावर गोळ्या लागल्या आहेत. गोळ्या झाडल्यानंतर हल्लेखोर पळून गेले. त्यानंतर चव्हाण यांना तातडीने नगरच्या खासगी रुग्णालयात दाखल करण्यात आले. तिथे त्यांच्यावर उपचार केले जात आहेत.

संकेत चव्हाण यांच्यावर उपचार करणारे डॉ. सतीश सोनवणे यांनी सांगितले की, “चव्हाण यांच्या शरीरातून तीन गोळ्या काढण्यात आल्या आहेत. काही गोळ्या हाडांना छेदून गेल्या आहेत. काही गोळ्या लागून गेल्याच्या जखमा त्यांच्या शरीरावर आहेत. त्याच्यावर योग्य ते उपचार करून शस्त्रक्रिया करण्यासाठी चार तास लागले. रुग्णाला वेळेत उपचार मिळाले असून त्यांची प्रकृती स्थिर आहे.”

दरम्यान, याप्रकरणी शनिशिंगणापूर पोलिस ठाण्यात गुन्हा दाखल करण्यात आला असून पोलीस अधिक तपास करीत आहेत. हा हल्ला कोणी आणि का केला? याबाबत अद्याप कोणतीही माहिती मिळालेली नाही.