रेखा जरे खून प्रकरणातील आरोपी बाळ बोठेच्या अडचणीत वाढ, न्यायालयाने दिला ‘हा’ महत्वाचा निर्णय

अहमदनगर : रेखा जरे यांच्या खुनाला तीन महिने उलटून गेले आहेत. परंतु या खून प्रकरणातील मुख्य सूत्रधार बाळ बोठे अद्यापही पोलिसांच्या हाती लागलेला नाही. त्यामुळे पोलिसांनी त्याला फरार घोषित करण्याच्या मागणीसाठी चार दिवसांपूर्वी पारनेरच्या न्यायालयात अर्ज दाखल केला होता. त्यावर सुनावणी झाली असून बाळ बोठेच्या अडचणीत वाढ झाली आहे.

बाळ बोठेला फरार घोषित करण्याच्या मागणीचा अर्ज पारनेर न्यायालयाने मंजूर केला आहे. प्रथमवर्ग न्यायदंडाधिकारी उमा बोऱ्हाडे यांनी गुरूवारी हा अर्ज मंजूर केला. बाळ बोठेला पोलिसांसमोर हजर होण्यासाठी एक महिन्याची मुदत देण्यात आली असून त्यानंतर संपत्ती जप्तीची कारवाई केली जाऊ शकते. बोठे याचा अटकपूर्व जामीन अर्ज उच्च न्यायालयाने यापूर्वीच फेटाळला आहे.

या आदेशातील तरतुदींनुसार, आरोपीला हजर होण्यासाठी एक महिन्याची मुदत दिलेली असते. या काळात पोलिस आरोपीचे फोटो सार्वजनिक ठिकाणी प्रसिद्ध करून आरोपीला हजर होण्याचे किंवा लोकांना त्याला पकडून देण्याचे आवाहन करू शकतात. तरीदेखील आरोपी हजर न झाल्यास कायद्यातील तरतुदीनुसार त्याची संपत्ती जप्त करण्याची कारवाई सुरू केली जाते. तसेच बँक खाती सील केली जाऊ शकतात. त्यासाठी पुन्हा न्यायालयात अर्ज करून परवानगी घेतली जाते.