अमेरिकेत हिमवादळामुळे जनजीवन विस्कळीत, जीवनावश्यक वस्तूंचा तुटवडा, २१ जणांचा मृ्त्यू

जोरदार बर्फवृष्टी आणि हिमवादळामुळे अमेरिकेतील मध्य आणि दक्षिण भागात जनजीवन विस्कळीत झाले आहे. मुसळधार बर्फवृष्टीमुळे डॅलस आणि ह्युस्टनजवळील तापमान शून्य अंश सेल्सिअस खाली गेले होते.

सोमवारी तापमान आणखी घसरल्याने वीज पुरवठा खंडीत करण्यात आला. टेक्सासमधील वीज विभागाने टप्प्याटप्प्याने वीज पुरवठा खंडीत करण्यास सुरुवात केली होती. त्यामुळे काही तासांसाठी ब्लॅक आउटची स्थिती निर्माण झाली होती. वीज पुरवठा खंडीत झालेल्या भागात जीवनाश्यक वस्तू आणि इतर साहित्यांचा पुरवठा करण्यात येत असल्याचे राज्यपाल ग्रेग एबॉट यांनी सांगितले. खराब हवामानाचा फटका वीज निर्मितीवर झाला असून भारनियमन, ब्लॅक आउटचा सामना नागरिकांना करावा लागत आहे. राज्यपालांनी सांगितले की, ERCOT आणि PUC कडून विद्युत पुरवठा सुरळीत करण्यासाठी प्रयत्न सुरू आहेत.

टेक्सासमधील नागरिकांना सर्वप्रकारची मदत पोहचवण्याचा प्रयत्न करण्यात येत असून वीज कमी प्रमाणात वापरण्याचे आवाहन करण्यात आले आहे. राज्य प्रशासन वीज निर्मिती करणाऱ्या खासगी कंपन्यांसोबत काम करत असून लवकरच वीज पुरवठा सुरळीत करण्याचा प्रयत्न असल्याचे त्यांनी सांगितले. Electric Reliability Council of Texas (ERCOT)ने नागरिकांना अनावश्यक उपकरणे अनप्लग करण्यास सांगितले आहे.

प्रशासनाने नागरिकांना काही दिवस कपडे न धुण्याचे आवाहन केले आहे. त्याशिवाय थंडीपासून बचाव करण्यासाठी स्वेटरसारखे कपडे घालण्याचे आवाहन केले आहे. खराब हवामानामुळे हवाई वाहतूकदेखील विस्कळीत झाली आहे. दरम्यान, हिमवृष्टीमुळे आतापर्यंत २१ जणांचा मृ्त्यू झाल्याची देखील माहिती मिळाली आहे. जीवनावश्यक गोष्टींचा तुटवडा जाणवत आहे.