पाकिस्तानात कराची विद्यापीठाजवळील इमारतीत भीषण स्फोट, 3 जण ठार

पाकिस्तानची आर्थिक राजधानी असलेल्या कराची शहरात भीषण स्फोट झाला आहे. हा स्फोट कराची विद्यापीठाजवळील एका इमारतीत झाला आहे. या स्फोटात तीन जण ठार झाले असून १५ जण जखमी झाले आहेत. मदत व बचाव कार्य सुरू करण्यात आले असून जखमींना उपचारासाठी पटेल रुग्णालयात दाखल करण्यात आले आहे.

कराचीतील गुलशन-ए-इक्बाल या भागातील चार मजली इमारतीमधील दुसऱ्या मजल्यावर हा स्फोट झाला. हा सिलेंडरचा स्फोट असल्याचा प्राथमिक अंदाज व्यक्त करण्यात आला आहे. स्फोटामुळे इमारतीचे मोठे नुकसान झाले असून घराचा भाग कोसळला आहे. त्याशिवाय या इमारतीच्या जवळपास असणाऱ्या इमारतींच्या काचा तुटल्या आहेत. बॉम्ब शोधक पथकही घटनास्थळी दाखल झाले. संबंधित परिसर सील करण्यात आला असून चौकशी सुरू करण्यात आली आहे. सिंध प्रांताचे मुख्यमंत्री मुराद अली शहा यांनी कराची आयुक्तांकडून या स्फोटाप्रकरणी अहवाल मागितला आहे.