सुशांतने अभिनेत्रीसोबत सेटवर कधीच गैरवर्तन केलं नाही, स्वस्तिका मुखर्जीचा खुलासा

बॉलिवूडचा दिवंगत अभिनेता सुशांत सिंह राजपूतचा ‘दिल बेचारा’ हा चित्रपट अलिकडेच प्रदर्शित झाला. मध्यंतरी सुशांतने ‘दिल बेचारा’च्या सेटवर सहकलाकार संजना सांघीसोबत गैरवर्तन केल्याचं म्हटलं जातं होतं. मात्र याप्रकरणी संजनानंतर अभिनेत्री स्वस्तिका मुखर्जीनेदेखील मौन सोडलं आहे. ‘सुशांतने सेटवर कधीच गैरवर्तन केलं नाही’, असं तिने ‘पिंकव्हिला’सोबत बोलताना सांगितलं आहे.

“सेटवर असताना सुशांतने संजनासोबत कधीच गैरवर्तन केलं नाही. तिला त्याच्यासोबत काम करताना कधीच अवघडल्यासारखं झालं नाही. मी चित्रपटात संजनाच्या आईची भूमिका साकारली आहे. जेव्हा सुशांतविषयी या चर्चा होऊ लागल्या आम्हां सगळ्यांना धक्का बसला. तसंच जर संजनासोबत काही गैरवर्तन झालं असतं, तर सेटवरील लोकांच्या माध्यमातून मला ती गोष्ट पटकन समजली असती. परंतु, असं काहीच झालं नव्हतं”, असं स्वस्तिका म्हणाली.

पुढे ती म्हणते, “आईची भूमिका साकारत असल्यामुळे मी संजना आणि सुशांत यांच्यासोबत जास्त वेळ होते. अनेक वेळा आम्ही तिघं एकत्र जेवलो आहे. मात्र चित्रपटातील कलाकार किंवा सेटवरील अन्य स्त्रियांना सुशांतमुळे कधीच अवघडल्यासारखं वाटलं नाही. उलटपक्षी तो सेटवर असताना सकारात्मक वातावरण असायचं”.

दरम्यान,२०१८ मध्ये सुशांतने ‘दिल बेचारा’च्या सेटवर संजना सांघीसोबत गैरवर्तन केल्याचं आरोप करण्यात आले होते. मात्र या आरोपांवर स्वस्तिकाप्रमाणेच संजनानेदेखील मौन सोडलं. सुशांतने कधीच माझ्यासोबत गैरवर्तन केलं नव्हतं, असं तिने एका मुलाखतीत सांगितलं.