अभिनेता आणि माजी केंद्रीय मंत्री कृष्णम राजू यांचे निधन, प्रभासला अश्रू अनावर

टॉलिवूड अभिनेता आणि माजी केंद्रीय मंत्री यू.व्ही. कृष्णम राजू यांच्या निधनाने देशाला मोठा धक्का बसला आहे. त्यांचे रविवारी पहाटे एआयजी रुग्णालयात निधन झाले. ते ८३ वर्षांचे होते.

दिवंगत अभिनेत्याच्या निवासस्थानावरून शेअर केलेल्या व्हिडिओ आणि फोटोंमध्ये अभिनेता प्रभास त्याच्या काकांच्या मृत्यूने हादरलेला दिसत आहे. शेअर केलेल्या फोटो आणि व्हिडिओमध्ये प्रभास रडताना दिसत आहे. तेलुगू चित्रपट उद्योगातील अनेक अभिनेते आणि चित्रपट निर्माते अभिनेत्याच्या निवासस्थानी त्यांना आदरांजली वाहण्यासाठी पोहोचले.

कृष्णम राजू यांच्यावर ज्युबली हिल्स येथील महाप्रस्थानम येथे सोमवारी दुपारी अंत्यसंस्कार करण्यात येणार आहेत. त्यांचे पार्थिव त्यांच्या निवासस्थानी हलविण्यात आले असून तेथे त्यांचे पार्थिव सोमवारी दुपारपर्यंत त्यांच्या चाहत्यांना त्यांचे अंतिम दर्शन घेण्यासाठी ठेवण्यात येईल. त्यांचा पुतण्या अभिनेता प्रभास त्याच्या दिवंगत काकांना अंतिम श्रद्धांजली वाहण्यासाठी त्यांच्या  निवासस्थानी पोहोचला असून तो अस्वस्थ होता. सोशल मीडियावर त्याचे अनेक फोटो आणि व्हिडिओ व्हायरल होत आहेत. मेगास्टार चिरंजीवी आणि महेश बाबू त्याचे सांत्वन करत होते.

उप्पलापती कृष्णम राजू यांचे रविवारी पहाटे निधन झाले. त्यांच्या पश्चात पत्नी व तीन मुली असा परिवार आहे. टॉलिवूडचा ‘रिबेल स्टार’ म्हणून प्रसिद्ध असलेल्या कृष्णम राजू यांनी पाच दशकांहून अधिक काळातील कारकिर्दीत 180 हून अधिक चित्रपटांमध्ये काम केले आहे.