अभिनेत्री राय देबलीना डे हिचा झोपेच्या गोळ्या खाऊन आत्महत्येचा प्रयत्न, फेसबुक पोस्टने वेधले लक्ष…

मॉडेल आणि अभिनेत्री राय देबलीना डे हिने शुक्रवारी रात्री उशिरा आत्महत्येचा प्रयत्न केला. तिने फेसबुकवर एक पोस्ट शेअर केली होती आणि टोकाचे पाऊल उचलण्याचे संकेत दिले. नंतर ही पोस्ट हटवण्यात आली, मात्र YouTuber आणि अभिनेता सँडी साहा यांच्यासह नेटिझन्सचे लक्ष या पोस्टने वेधून घेतले होते, त्यामुळे त्यांनी तात्काळ अभिनेत्रीला वाचवण्यासाठी इतरांची मदत घेतली. या पोस्टमध्ये तिने तिच्या कुटुंबियांना दोष दिल्याची माहिती आहे.

मिळालेल्या माहितीनुसार, तिच्या मित्रांनी तिच्याशी संपर्क साधण्याचा प्रयत्न केला असता देबलीनाचा फोन बंद होता. त्यामुळे कोणीतरी मदतीसाठी पूरबा जाधवपूर पोलिस ठाण्यात संपर्क साधला. पोलिसांनी त्वरीत तिच्या घरी धाव घेतली, तेव्हा देबलीना बेशुद्ध अवस्थेत पडलेली आढळली. पोलिस सूत्रांनी दिलेल्या माहितीनुसार, अभिनेत्रीने झोपेच्या गोळ्या खाल्ल्याचा आरोप आहे. तिला वैद्यकीय उपचारासाठी रुग्णालयात दाखल करण्यात आले. तिथे तिच्यावर उपचार करण्यात येत आहेत.

पोलीस या प्रकरणाचा तपास करत असून या घटनेमागील कारण शोधण्याचा प्रयत्न करत आहेत. पोलीस अधिकाऱ्यांनी देबलीनाच्या कुटुंबीयांची देखील तिच्या सोशल मीडिया पोस्टमध्ये केलेल्या आरोपांबाबत चौकशी केली.

देबलीनाने मॉडेल म्हणून काम केले आहे आणि चित्रपट आणि टीव्ही शोमध्येही छोट्या भूमिका केल्या आहेत.
या घटनेने देबलीनाच्या मित्रांना धक्का बसला आहे. अलीकडेच, अभिनेत्री पल्लवी डे तिच्या निवासस्थानी गळफास घेतलेल्या अवस्थेत सापडली होती. तिच्या लिव्ह-इन बॉयफ्रेंडला नंतर अटक करण्यात आली असून या घटनेची चौकशी सुरू आहे. काही दिवसांपूर्वी, आणखी तीन मॉडेल-अभिनेत्री रहस्यमय परिस्थितीत मृत सापडल्या होत्या.