अभिनेत्री पूजा सावंतने घुबडाला वाचवलं, व्हिडीओ सोशल मीडियावर वायरल

अभिनेत्री पूजा सावंतने तिच्या अभिनयाने मराठी तसेच हिंदी चित्रपटसृष्टीत देखील नाव कमावलं आहे. तिचे प्राणी व पक्षांवर खूप प्रेम असून ती प्राण्यांना मदत करणाऱ्या संस्थांशी देखील जोडलेली असते. पूजाने नुकताच सोशल मीडियावर एक व्हिडीओ शेअर केला आहे. ज्यात तीने एका घुबडाचे प्राण वाचवले आहेत. तिचा हा व्हिडीओ सोशल मीडियावर प्रचंड वायरल होत आहे.

पूजाने तिच्या इन्स्टाग्राम अकाउंटवर हा व्हिडीओ शेअर केला आहे. त्यात तिने सांगितलं कि, “आता उन्हाळा जवळ आला आहे आणि असे बरेच पक्षी आपल्याला दिसतात, जे तहानलेले असतात. पाण्याच्या शोधात पाण्यात पडतात किंवा त्यांच्यासोबत काही अपघात होतात. अशाच एक घुबडाबद्दल आम्हाला फोन आला होता की हे घुबड पाण्याच्या टाकीत पडलं आहे. आम्ही तिथे पोहोचेपर्यंत तिथल्या लोकांनी त्याला टाकीतून बाहेर काढलं होतं. ते जिवंत होतं पण खूप अशक्त होतं. मी त्याच्यावर प्राथमिक उपचार केले आणि त्याला पशुवैद्याकडे घेऊन गेले. त्याच्यावर उपचार झाल्यानंतर ते स्वस्थ दिसू लागलं. त्याच्या तब्येतीत सुधारणा दिसू लागली. आम्हाला जेव्हा वाटलं की हे घुबड आता पूर्णपणे बरं झालं आहे आणि उडू शकेल, तेव्हा आम्ही त्याला सोडून दिलं.”

पूजाने यावेळी घराबाहेर तहानलेल्या पक्षांसाठी पाणी ठेवण्याचं देखील आवाहन केलं आहे.