लिव्ह-इन पार्टनरची हत्या! महिलेला मारल्यानंतर मृतदेह सुटकेसमध्ये भरून खाडीत फेकला, पत्नीनेही दिली साथ

पालघर : पालघरमध्ये एका व्यक्तीने 28 वर्षीय लिव्ह-इन पार्टनरची हत्या केल्याची घटना समोर आली आहे. या हत्येप्रकरणी पोलिसांनी आरोपीला अटक केली आहे. पोलिसांनी दिलेल्या माहितीनुसार, आरोपीने महिलेला पाण्यात बुडवून मारले, त्यानंतर मृतदेह सुटकेसमध्ये भरून गुजरातमधील वलसाड येथील खाडीत फेकून दिला. दरम्यान, या हत्येत आरोपीच्या पत्नीनेही त्याची साथ दिली होती, तिलादेखील पोलिसांनी अटक केली आहे.

मिळालेल्या माहितीनुसार, मनोहर शुक्ला असे आरोपीचे नाव असून तो मुंबईत कॉस्च्युम डिझायनर म्हणून काम करतो. तो पाच वर्षांपासून मेकअप आर्टिस्ट नयना महतसोबत रिलेशनशिपमध्ये होता. नयना लग्नासाठी दबाव टाकत होती, मात्र मनोहर याने लग्न करण्यास नकार दिला होता. त्यानंतर तिने त्याच्याविरुद्ध पोलिसांत बलात्काराची तक्रार दाखल केली. त्याने केस मागे घेण्यास सांगितले. मात्र, नयनाने नकार दिल्याने मनोहरने तिची हत्या केली.

पोलिसांनी दिलेल्या माहितीनुसार, ही घटना 9 ते 12 ऑगस्टदरम्यान घडली. 12 ऑगस्ट रोजी नयनाला तिच्या बहिणीने बोलावले होते. अनेक फोन करूनही तिने फोन उचलला नाही, तेव्हा त्यांनी मनोहरकडे चौकशी केली. त्याने सांगितले की, नयनाचा फोन खराब झाला आहे. मात्र, तिच्या बहिणीला संशय आला. 14 ऑगस्ट रोजी पीडितेच्या बहिणीने नायगाव पोलिसात हरवल्याची तक्रार दाखल केली. पीडितेने तिच्या बहिणीला सांगितले होते की, मनोहर तिला मारेल अशी तिला भीती वाटत होती.

याप्रकरणी अटक करण्यात आलेल्या आरोपी आणि त्याच्या पत्नीला मंगळवारी स्थानिक न्यायालयात हजर करण्यात आले. त्यानंतर न्यायालयाने त्यांना 16 सप्टेंबरपर्यंत पोलीस कोठडी सुनावली.

दरम्यान, गुजरातमधील वलसाड येथील एका खाडीत संबंधित महिलेचा मृतदेह सुटकेसमध्ये सापडला. वलसाडमधील पोलिसांनी अपघाती मृत्यू अहवाल दाखल केला होता आणि मृतदेह घेण्यासाठी कोणीही आले नसल्याने मृतदेहावर अंत्यसंस्कार केले होते.