व्हेंटिलेटर उपलब्ध न झाल्यामुळे पुण्यातील पत्रकार पांडुरंग रायकर यांचं निधन

पुण्यातील पत्रकार पांडुरंग रायकर यांचं कोरोनाने निधन झालं. पांडुरंग हे टीव्ही ९ मराठीचे पुण्याचे प्रतिनिधी होते. गेल्या काही दिवसांपासून पांडुरंग हे सतत फिल्डवर जाऊन रिपोर्टिंग करत होते. त्याचकाळात त्यांना कोरोनाची लागण झाली होती. त्यामुळे त्यांना पुण्यातील जम्बो कोव्हिड सेंटरमध्ये दाखल करण्यात आलं होतं. पण काल रात्री त्यांची ऑक्सिजन पातळी अचानक कमी झाल्याने त्यांची प्रकृती प्रचंड ढासळली.

यावेळी त्यांना व्हेंटिलेटरची आवश्यकता होती. मात्र, पुण्यात कुठेही व्हेंटिलेटर उपलब्ध होऊ शकलं नाही. दरम्यान, मध्यरात्रीच्या सुमारास पुण्यातील दिनानाथ मंगेशकर रुग्णालयात व्हेंटिलेटर उपलब्ध असल्याची माहिती मिळताच त्यांना रुग्णालयात नेण्यासाठी प्रयत्न सुरु झाले. पण कोव्हिड सेंटर ते रुग्णालय या प्रवसाकरिता त्यांना तात्काळ रुग्णवाहिका उपलब्ध होऊ शकली नाही. त्यांना रुग्णालयात नेण्यास उशीर झाला. त्यामुळे पांडुरंग यांना आपल्या प्राणांना मुकावे लागले. आज(२ सप्टेंबर) पहाटे साडेपाच वाजता त्यांनी अखेरचा श्वास घेतला.

गेली १५ वर्ष पांडुरंग रायकर हे पत्रकारितेत होते. ई टीव्ही, एबीपी माझा, टीव्ही ९ या वृत्तवाहिन्यांमध्ये त्यांनी काम केलं होतं. साधारण २ वर्षांपासून ते पुण्यात रिपोर्टिंग करत होते. त्यांच्या पश्चात आई-वडील, दोन मुलं आणि पत्नी असा एकूण परिवार आहे.