पुणे : स्वातंत्र्यदिनाच्या निमित्ताने पुणे महानगरपालिकेच्या वतीने आयोजित विशेष सत्कार समारंभात व्यसनमुक्ती अभ्यासक व सामाजिक कार्यकर्ते डॉ. सोमनाथ वेणूताई निवृत्ती गिते यांचा मा. महापौर सौ. मंजुषा नागपुरे यांच्या हस्ते सन्मान करण्यात आला.

पुणे शहरातील विविध क्षेत्रांत उल्लेखनीय कार्य करणाऱ्या व्यक्तींच्या गौरवासाठी आयोजित या विशेष समारंभात डॉ. गिते यांच्या सामाजिक व व्यसनमुक्ती क्षेत्रातील दीर्घकालीन कार्याची दखल घेण्यात आली. गेल्या अनेक वर्षांपासून ते व्यसनमुक्ती जनजागृती, युवक प्रबोधन आणि सामाजिक कार्याच्या माध्यमातून समाजात व्यसनमुक्तीचा संदेश पोहोचविण्याचे कार्य करीत आहेत.

डॉ. गिते यांनी राज्यभरातील युवक, पालक आणि नागरिकांमध्ये व्यसनाच्या दुष्परिणामांबाबत जनजागृती करण्यासाठी विविध उपक्रम राबविले आहेत. शाळा, महाविद्यालये, सामाजिक संस्था तसेच विविध सार्वजनिक उपक्रमांच्या माध्यमातून त्यांनी व्यसनमुक्तीबाबत सातत्याने प्रबोधन केले आहे. व्यसनाधीन व्यक्ती तसेच त्यांच्या कुटुंबीयांना मार्गदर्शन आणि पुनर्वसनाच्या प्रक्रियेत मदत करण्याचे कार्यही त्यांनी केले आहे.

त्यांच्या या कार्याची दखल घेत महाराष्ट्र शासनाच्या सामाजिक न्याय व विशेष सहाय्य विभागामार्फत ‘राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार’ देऊन त्यांचा गौरव करण्यात आला आहे. हा राज्यस्तरीय पुरस्कार मा. संजय शिरसाट यांच्या हस्ते प्रदान करण्यात आला होता.

सामाजिक कार्यातील योगदानाबद्दल डॉ. गिते यांना डॉक्टरेट पदवी प्राप्त झाली असून, व्यसनमुक्ती व सामाजिक जनजागृतीच्या क्षेत्रातील त्यांच्या कार्याची विविध स्तरांवर दखल घेण्यात आली आहे. त्यांच्या सामाजिक कार्याशी संबंधित विविध जागतिक विक्रमांची नोंद त्यांच्या नावावर असून, राष्ट्रीय व आंतरराष्ट्रीय स्तरावरील विविध सन्मानांनीही त्यांना गौरविण्यात आले आहे.

डॉ. गिते यांच्या कार्याला विविध मान्यवर, सामाजिक संस्था आणि लोकप्रतिनिधींनीही वेळोवेळी पाठिंबा व कौतुकाची दाद दिली आहे. त्यांच्या कार्याची प्रशंसा करणारी प्रशंसापत्रे व शिफारसपत्रेही विविध स्तरांवरून प्राप्त झाली आहेत.

पुणे महानगरपालिकेच्या वतीने झालेला हा सन्मान त्यांच्या सामाजिक कार्याची महत्त्वपूर्ण दखल मानली जात असून, या सन्मानामुळे व्यसनमुक्तीच्या कार्याला आणखी व्यापक स्वरूप देण्याची प्रेरणा मिळाल्याची भावना डॉ. गिते यांनी व्यक्त केली.

“हा सन्मान केवळ माझा नसून, माझ्या या प्रवासात साथ देणाऱ्या कुटुंबीयांचा, सहकाऱ्यांचा, मित्रांचा आणि माझ्या कार्यावर विश्वास ठेवणाऱ्या प्रत्येकाचा आहे. समाजातील युवकांना व्यसनापासून दूर ठेवण्यासाठी आणि व्यसनमुक्त, सुसंस्कारित व सशक्त पिढी घडविण्यासाठी यापुढेही सातत्याने कार्य करत राहू,” असे डॉ. गिते यांनी सांगितले.

स्वातंत्र्यदिनाच्या निमित्ताने झालेल्या या सन्मानामुळे त्यांच्या सामाजिक कार्याला नवी ऊर्जा मिळाली असून, व्यसनमुक्त समाजाच्या निर्मितीसाठी सुरू असलेली त्यांची जनजागृतीची चळवळ अधिक व्यापक करण्याचा संकल्प त्यांनी व्यक्त केला.

The post स्वातंत्र्यदिनानिमित्त डॉ. सोमनाथ गिते यांचा महापौरांच्या हस्ते गौरव appeared first on थोडक्यात घडामोडी.

बारामती : पुणे जिल्ह्यातील बारामती शहरात तरुणीचा अकस्मात आणि संशयास्पद मृत्यू झाल्याप्रकरणी तिच्या आईने दिलेल्या फिर्यादीनुसार अथर्व राजेंद्र मेहन (वय २७) याच्याविरुद्ध गुन्हा दाखल करण्यात आला आहे. अथर्व वारंवार शारीरिक संबंध ठेवण्यासाठी आग्रह करीत होता आणि काही गोळ्या देत असल्याचे मयत तरुणीच्या मैत्रिणीने सांगितल्याचा दावा आईने फिर्यादीत केला आहे.

मयत तरुणीने बी.एस्सी. अॅग्रीकल्चरचे शिक्षण पूर्ण केले होते. एमपीएससी परीक्षेच्या तयारीसाठी तिने ऑक्टोबर २०२५ पासून पुण्यात ट्यूशन्स सुरू केल्या होत्या. डिसेंबर २०२५ मध्ये तिचे अथर्वसोबत प्रेमसंबंध असल्याची माहिती तिच्या मैत्रिणीमार्फत आईला मिळाली होती.

पोलिसांनी दिलेल्या माहितीनुसार, तरुणी आणि अथर्व यांच्यात प्रेमसंबंध होते. त्यानंतर दोन्ही कुटुंबांच्या संमतीने त्यांचा विवाहही ठरला होता. मात्र, काही दिवसांपासून तरुणी शांत राहत असल्याचे तिच्या आईच्या निदर्शनास आले होते.

तरुणीच्या मैत्रिणीने अथर्व वारंवार शारीरिक संबंध ठेवण्यासाठी आग्रह करीत असल्याचे तसेच तो तिला काही गोळ्या देत असल्याचे सांगितल्याचा दावा आईने फिर्यादीत केला आहे.

६ ऑगस्ट रोजी अथर्व तरुणीला एमबीए प्रवेशाच्या कामासाठी घेऊन गेला होता. अथर्वची आई आणि मावशी यांना दौंड येथे सोडण्यासाठी जात असल्याचे त्याने सांगितले होते. आईने व्हिडिओ कॉल केला असता तरुणी अथर्वसोबत कारमध्ये असल्याचे दिसले.

सायंकाळी सातच्या सुमारास आईने मुलीला फोन केला; मात्र तिने फोन उचलला नाही. त्यानंतर अथर्वला फोन केल्यानंतर आईचे मुलीशी बोलणे झाले. त्या वेळी अथर्व मला घरी घेऊन जाणार असून, त्याला माझ्यासोबत शारीरिक संबंध ठेवायचे आहेत आणि तो मला गोळी देणार असल्याचे मुलीने सांगितल्याचा दावा फिर्यादीत करण्यात आला आहे.

आईने मुलीला अथर्वच्या घरी जाऊ नकोस आणि तातडीने घरी परत ये, असे सांगितले होते. रात्री नऊच्या सुमारास आईने मेसेज केल्यानंतर मुलीने जेवण करीत असल्याचे उत्तर दिले. त्यानंतर मात्र तिच्याकडून कोणताही प्रतिसाद मिळाला नाही.

मिळालेल्या माहितीनुसार, दोघांनी एमआयडीसी परिसरातील हॉटेलमध्ये जेवण केले. त्यानंतर ते अथर्वच्या घरी गेले. रात्री दहाच्या सुमारास आईने फोन केला असता अथर्वने फोन उचलला आणि तरुणीला चक्कर आल्याचे सांगितले.

प्रकृती बिघडल्यानंतर अथर्व तरुणीला प्रथम देवकाते हॉस्पिटल, त्यानंतर भोईटे हॉस्पिटल आणि पुढे सिल्वर जुबली हॉस्पिटल येथे घेऊन गेला. रात्री सुमारे १०.२० वाजता तिची आई सिल्वर जुबली हॉस्पिटलमध्ये पोहोचली. त्यावेळी तरुणी स्ट्रेचरवर होती. रुग्णालयात पोहोचण्यापूर्वीच तिचा मृत्यू झाल्याचे आईला समजले.

या घटनेनंतर आईने मुलीच्या मृत्यूबाबत संशय व्यक्त करीत पोलिसांत फिर्याद दिली. त्यानुसार अथर्व राजेंद्र मेहन याच्याविरुद्ध गुन्हा दाखल करण्यात आला आहे. औषधे, वैद्यकीय अहवाल तसेच डिजिटल पुराव्यांच्या आधारे पोलिसांकडून पुढील तपास सुरू आहे.

The post लग्न ठरलेल्या प्रियकरासोबत तरुणीचा संशयास्पद मृत्यू; आईचा गंभीर आरोप appeared first on थोडक्यात घडामोडी.

पुणे : पारी टॉवर्स सहकारी गृहरचना संस्था मर्यादित, नऱ्हेच्या संचालक मंडळाच्या पंचवार्षिक निवडणुकीत ‘उघडलेले पुस्तक’ चिन्हाच्या परिवर्तन आणि सुशासन पॅनेलने दणदणीत विजय मिळवला. पॅनेलचे सर्व १५ उमेदवार विजयी झाले. सर्वसाधारण, महिला राखीव, इतर मागासवर्गीय, अनुसूचित जाती-जमाती तसेच विमुक्त जाती-भटक्या जमाती या सर्व प्रवर्गांत ‘उघडलेले पुस्तक’ पॅनेलच्या उमेदवारांनी बाजी मारली.

सर्वसाधारण मतदारसंघातून अतुल यादव, अमोल सावंत, गिरीश रंगे, निरंजन माळवदकर, नीरज दोन्हे, प्रवीण कुमकर, शरद शिंदे, श्रीकांत राजोबा, समीर भोकरे आणि सुरेश पिसाळ हे विजयी झाले.

महिला राखीव मतदारसंघातून किरण आगलावे आणि प्राजक्ता तट्टू यांनी विजय मिळवला. इतर मागासवर्गीय प्रवर्गातून रोहन राऊत, अनुसूचित जाती-जमाती प्रवर्गातून सुनील सांगळीकर, तर विमुक्त जाती-भटक्या जमाती प्रवर्गातून दत्तात्रय पडार विजयी झाले.

या निकालामुळे ‘उघडलेले पुस्तक’ पॅनेलने सर्व १५ जागांवर विजय मिळवत सोसायटीच्या संचालक मंडळात बहुमत मिळवले आहे. सभासदांनी दिलेला स्पष्ट कौल हा या विजयाचे वैशिष्ट्य ठरले.

विजयानंतर पॅनेलच्या समर्थकांनी आनंद व्यक्त केला. सभासदांनी दाखविलेल्या विश्वासाबद्दल विजयी उमेदवारांनी कृतज्ञता व्यक्त केली. सभासदांचा विश्वास सार्थ ठरवत सोसायटीचा पारदर्शक, शिस्तबद्ध आणि विकासाभिमुख कारभार करण्यास प्राधान्य देण्यात येईल, अशी भूमिका पॅनेलच्या वतीने व्यक्त करण्यात आली.

सोसायटीतील विकासकामे, सभासदांच्या समस्या, देखभाल-दुरुस्तीची कामे, आर्थिक पारदर्शकता तसेच सर्व सभासदांना विश्वासात घेऊन निर्णयप्रक्रिया राबविण्यावर भर देण्याचा निर्धार विजयी पॅनेलने व्यक्त केला.

निवडणूक अधिकारी संतोष तळपे यांच्या मार्गदर्शनाखाली तसेच नऱ्हे पोलीस ठाण्याचे पोलीस अधिकारी शैलेश चव्हाण आणि त्यांच्या पोलीस पथकाच्या सहकार्याने निवडणूक प्रक्रिया शांततेत आणि सुरळीत पार पडली. निवडणूक प्रक्रिया व्यवस्थित पार पाडण्यासाठी सहकार्य करणाऱ्या सर्व सभासदांचे आणि प्रशासनाचे आभार व्यक्त करण्यात आले.

विजयानंतर ‘उघडलेले पुस्तक’ पॅनेलने विजयाचा उत्सवही आगळ्या पद्धतीने साजरा केला. कोणत्याही प्रकारची हुल्लडबाजी न करता, मोठे ध्वनिक्षेपक न लावता किंवा गुलालाची उधळण न करता छत्रपती शिवाजी महाराजांचा जयघोष आणि ज्येष्ठांच्या हस्ते गणपतीची आरती करून विजयोत्सव साजरा करण्यात आला. या माध्यमातून संस्कार, शिस्त आणि सुसंस्कृतपणाचा संदेश देण्याचा प्रयत्न करण्यात आला.

‘उघडलेले पुस्तक’ हे केवळ ज्ञानाचे प्रतीक नसून विचार, सुसंस्कृतपणा आणि जबाबदारीची जाणीव करून देणारे प्रतीक आहे, याचा प्रत्यय या विजयोत्सवातून आला.

‘उघडलेले पुस्तक’ पॅनेलचा सर्व १५ जागांवरील विजय हा पारी टॉवर्सच्या सभासदांनी विकास, पारदर्शकता आणि विश्वासाला दिलेला स्पष्ट कौल मानला जात आहे.

The post ‘उघडलेले पुस्तक’ पॅनेलचा दणदणीत विजय; सर्व १५ उमेदवार विजयी; सर्व प्रवर्गांत परिवर्तन आणि सुशासन पॅनेलला यश appeared first on थोडक्यात घडामोडी.

मुंबई : पुणे शहरातील हडपसर आणि पिंपरी-चिंचवडमधील दापोडी-फुगेवाडी परिसरात विषारी दारू प्यायल्याने १२ नागरिकांचा मृत्यू झाल्याची घटना अत्यंत दुर्दैवी असून, या प्रकरणातील दोषींची गय केली जाणार नाही, असे उपमुख्यमंत्री सुनेत्रा अजित पवार यांनी स्पष्ट केले आहे. या प्रकरणाच्या मुळाशी जाऊन सखोल चौकशी करण्याचे आदेशही त्यांनी प्रशासनाला दिले आहेत.

या घटनेची गंभीर दखल घेत उपमुख्यमंत्री श्रीमती पवार यांनी पुणे व पिंपरी-चिंचवडचे पोलीस आयुक्त, राज्य उत्पादन शुल्क विभागाचे अधिकारी आणि स्थानिक प्रशासनाशी संपर्क साधला. या दुर्घटनेच्या मुळाशी जाऊन तपास करा आणि अशा बेकायदेशीर कृत्यांमध्ये सहभागी असलेल्या सर्वांवर कठोर कारवाई करावी, अशा स्पष्ट सूचना त्यांनी अधिकाऱ्यांना दिल्या.

आतापर्यंत या प्रकरणात ८ जणांना अटक करण्यात आली आहे. पोलीस आणि उत्पादन शुल्क विभागाकडून संयुक्तपणे तपास सुरू असून, या विषारी दारूचा पुरवठा कोठून झाला आणि यात कोणाचा सहभाग आहे, याचा शोध घेतला जात आहे, अशी माहितीही उपमुख्यमंत्री पवार यांनी दिली.

The post पुण्यात विषारी दारू प्यायल्याने १२ जणांचा मृत्यू, दोषींवर कठोर कारवाईचे आदेश appeared first on थोडक्यात घडामोडी.

पुणे : महाराष्ट्र शासनाच्या सामाजिक न्याय व विशेष सहाय्य विभागामार्फत प्रदान करण्यात आलेल्या “राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार” प्राप्त झाल्याबद्दल व्यसनमुक्ती अभ्यासक व सामाजिक कार्यकर्ते डॉ. सोमनाथ वेणूताई निवृत्ती गिते यांचा सत्कार करण्यात आला.

हा सत्कार मा. माधुरीताई मिसाळ यांच्या हस्ते पार पडला. त्या महाराष्ट्र राज्याच्या नगरविकास, परिवहन, सामाजिक न्याय, वैद्यकीय शिक्षण व अल्पसंख्यांक विकास विभागाच्या राज्यमंत्री तसेच पर्वती विधानसभा मतदारसंघाच्या आमदार म्हणून कार्यरत आहेत. त्यांच्या हस्ते झालेला हा सन्मान डॉ. गिते यांच्या व्यसनमुक्ती क्षेत्रातील दीर्घकालीन, प्रभावी आणि समाजहितकारी कार्याची महत्त्वपूर्ण दखल मानली जात आहे.

या प्रसंगी डॉ. गिते यांच्या कार्याचा गौरव करताना मान्यवरांनी सांगितले की, त्यांनी व्यसनमुक्ती जनजागृती, युवक प्रबोधन या क्षेत्रात सातत्यपूर्ण योगदान दिले आहे. राज्यभरातील हजारो युवक, पालक व नागरिकांपर्यंत व्यसनमुक्तीचा प्रभावी संदेश पोहोचविला आहे.

डॉ. गिते यांच्या कार्याची दखल महाराष्ट्र शासनाने घेत त्यांना “राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार” प्रदान केला होता. हा राज्यस्तरीय सन्मान मा. संजय शिरसाट यांच्या हस्ते देण्यात आला होता. या पुरस्कारामुळे त्यांच्या सामाजिक कार्याला अधिक बळ व प्रेरणा मिळाली आहे.

डॉ. गिते यांच्या कार्याबाबत राज्यपालांसह विविध सामाजिक संस्था, मान्यवर व लोकप्रतिनिधींनीही प्रशंसापत्रे व शिफारसपत्रांच्या माध्यमातून पाठिंबा दर्शविला आहे. त्यांना डॉक्टरेट पदवी प्राप्त असून सामाजिक कार्याशी संबंधित अनेक जागतिक विक्रम त्यांच्या नावावर नोंदवले गेले आहेत. तसेच त्यांना विविध राष्ट्रीय व आंतरराष्ट्रीय सन्मानही प्राप्त झाले आहेत.

सत्कार समारंभात उपस्थित मान्यवरांनी डॉ. गिते यांच्या व्यसनमुक्ती चळवळीतील समर्पित कार्याचे कौतुक करत, समाजात व्यसनमुक्त, सुसंस्कारित आणि सशक्त पिढी घडविण्यासाठी त्यांचे कार्य अधिक व्यापक स्वरूपात पुढे जावे, अशा शुभेच्छा दिल्या.

The post व्यसनमुक्ती क्षेत्रातील अविरत समाजकार्याची दखल; डॉ. सोमनाथ गिते यांचा मा. माधुरीताई मिसाळ यांच्या हस्ते सत्कार appeared first on थोडक्यात घडामोडी.

पुणे : पुणे शहर आणि जिल्ह्यात उष्णतेची तीव्रता दिवसेंदिवस वाढत असून भारतीय हवामान विभागाने (IMD) बुधवारी पुण्यासाठी यलो अलर्ट जारी केला आहे. सलग वाढणाऱ्या तापमानामुळे शहरातील नागरिकांना तीव्र उकाडा आणि दमट रात्रींचा दुहेरी त्रास सहन करावा लागत आहे.

मंगळवारी नोंदवलेल्या तापमानानुसार, पुणे जिल्ह्यातील लोहगाव येथे सर्वाधिक ४३.२ अंश सेल्सिअस तापमानाची नोंद झाली. त्यानंतर बारामतीमध्ये ४१.४ अंश तर दुदुळगावमध्ये ४१.३ अंश तापमान नोंदवण्यात आले. शहरातील मध्यवर्ती भागांमध्येही उष्णतेचा प्रभाव स्पष्टपणे जाणवत आहे.

शिवाजीनगरमध्ये ४०.८ अंश, कोरेगाव पार्कमध्ये ४०.७ अंश आणि मगरपट्टा परिसरात ४१ अंश तापमान नोंदले गेले. हवामान विभागाच्या पुढील सात दिवसांच्या अंदाजानुसार, १९ मेपर्यंत पुण्यात तापमान ४० ते ४२ अंशांच्या दरम्यान राहण्याची शक्यता आहे. आकाश प्रामुख्याने निरभ्र राहणार असल्याने उष्णतेत तातडीने दिलासा मिळण्याची चिन्हे दिसत नाहीत.

दरम्यान, पुण्यातील रात्रीचे वाढते तापमान अधिक चिंतेचा विषय ठरत आहे. पूर्वी थंडगार संध्याकाळीसाठी ओळखले जाणारे पुणे आता उष्ण रात्रींचा अनुभव घेत आहे. अनेक भागांमध्ये किमान तापमान सामान्यपेक्षा खूप जास्त नोंदवले गेले आहे.

मगरपट्टा आणि कोरेगाव पार्क येथे रात्रीचे तापमान २८.८ अंश सेल्सिअसपर्यंत पोहोचले, तर वडगावशेरीमध्ये २८ अंश आणि शिवाजीनगरमध्ये २७.४ अंश तापमानाची नोंद झाली. हवामान तज्ज्ञांच्या मते, ‘अर्बन हीट आयलंड’ परिणामामुळे ही परिस्थिती निर्माण होत आहे. काँक्रीटच्या इमारती, वाहनांची वाढती संख्या आणि डांबरी रस्ते दिवसभर उष्णता साठवून ठेवतात आणि रात्री ती हळूहळू बाहेर सोडतात.

सुरक्षेसाठी महत्त्वाच्या सूचना :
यलो अलर्ट म्हणजे उष्णतेची स्थिती सध्या नियंत्रणात असली तरी वृद्ध नागरिक, लहान मुले आणि दीर्घकालीन आजार असलेल्या व्यक्तींना विशेष धोका संभवतो. त्यामुळे नागरिकांनी आवश्यक ती काळजी घेण्याचे आवाहन करण्यात आले आहे.

हवामान विभागाने नागरिकांना पुरेसे पाणी पिण्याचा, दुपारी १२ ते ४ या वेळेत घराबाहेर पडणे टाळण्याचा आणि हलक्या रंगाचे सुती कपडे वापरण्याचा सल्ला दिला आहे. बाहेर जाताना टोपी, छत्री किंवा स्कार्फचा वापर करण्यासही सांगितले आहे.

शेतकऱ्यांनाही पिकांचे संरक्षण करण्यासाठी नियमित सिंचन सुरू ठेवण्याचा सल्ला देण्यात आला आहे. पुढील चार ते पाच दिवस हवामान कोरडे राहण्याची शक्यता असल्याने उष्णतेची तीव्रता आणखी वाढू शकते, असा अंदाज हवामान विभागाने व्यक्त केला आहे.

The post पुण्यात उष्णतेचा कहर! IMD चा यलो अलर्ट जारी; नागरिकांना काळजी घेण्याचे आवाहन appeared first on थोडक्यात घडामोडी.

पुणे : वाकड परिसरात २८ वर्षीय सॉफ्टवेअर इंजिनिअर महिलेची लग्नाच्या आमिषाने तब्बल ४२.६४ लाख रुपयांची फसवणूक करण्यात आल्याचा प्रकार समोर आला आहे. आरोपीने स्वतःची ओळख इस्रोतील शास्त्रज्ञ म्हणून करून दिली होती.

पीडित महिला हिंजवडी येथील एका नामांकित आयटी कंपनीत कार्यरत आहे. आरोपीची ओळख जयेश पाटील उर्फ आदर्श म्हात्रे अशी असून तो अलिबाग येथील रहिवासी असल्याचे पोलिस तपासात निष्पन्न झाले आहे.

मिळालेल्या माहितीनुसार, नोव्हेंबर २०२४ मध्ये या तरुणीने एका वैवाहिक वेबसाइटवर प्रोफाइल तयार केले. त्याच काळात आरोपीने तिच्याशी संपर्क साधला. संवाद वाढवत त्याने प्रत्यक्ष भेट घेतली आणि स्वतः इस्रोमध्ये कार्यरत असल्याचा दावा केला. हळूहळू त्याने विश्वास संपादन करत एकत्र राहण्याचे, मालमत्ता खरेदी करण्याचे आणि भविष्याची स्वप्ने दाखवली. नोव्हेंबर २०२४ ते जानेवारी २०२५ दरम्यान, विविध कारणे सांगत त्याने पैशांची मागणी केली. पीडितेने टप्प्याटप्प्याने एकूण ४२.६४ लाख रुपये त्याच्या खात्यात जमा केले.

दरम्यान, आरोपी इस्रोमध्ये नोकरी करत नसल्याची माहिती मिळाल्यानंतर पीडितेला संशय आला. तिने तत्काळ ऑनलाइन तक्रार नोंदवली. वाकड पोलिसांनी तातडीने तपास सुरू केला. सायबर यंत्रणांच्या मदतीने १६.६५ लाख रुपये गोठवून जप्त करण्यात आले. उर्वरित अंदाजे २७ लाख रुपयांचा शोध सुरू आहे.

प्राथमिक चौकशीत आरोपीने अशाच प्रकारे सुशिक्षित महिलांना लक्ष्य केल्याचे स्पष्ट झाले आहे. यापूर्वीही नवी मुंबई पोलिसांनी आरोपीला फसवणुकीच्या प्रकरणात अटक केली होती. तपासात आरोपीने गोव्यातील कॅसिनोसह विलासी जीवनासाठी ही रक्कम खर्च केल्याचेही समोर आले आहे.

सध्या आरोपी ४ मार्चपर्यंत नवी मुंबई पोलिसांच्या कोठडीत असून, रिमांड संपल्यानंतर वाकड पोलिस त्याला पुढील चौकशीसाठी ताब्यात घेणार आहेत.

मॅट्रिमोनियल साईट आणि सोशल मीडिया प्लॅटफॉर्मवर वाढत्या फसवणुकीच्या घटनांमुळे सायबर सुरक्षेचा प्रश्न ऐरणीवर आला आहे. तज्ज्ञांच्या मते, आर्थिक व्यवहार करण्यापूर्वी ओळख आणि नोकरीची खातरजमा करणे अत्यावश्यक आहे.

The post पुण्यात सॉफ्टवेअर इंजिनिअर महिलेला ४२.६४ लाखांचा गंडा, मॅट्रिमोनियल फ्रॉडचा धक्कादायक प्रकार appeared first on थोडक्यात घडामोडी.

पुणे/बारामती : बारामती विमानतळाजवळ कोसळलेल्या चार्टर्ड जेट दुर्घटनेनंतर उपमुख्यमंत्री अजित पवार आणि इतर चार जणांच्या मृत्यूची समांतर चौकशी करण्याचे आदेश महाराष्ट्र सरकारने गुन्हे अन्वेषण विभागाला (CID) दिले आहेत.

ही दुर्घटना बुधवारी सकाळी घडली असून, गुरुवारी पहाटेच CID चौकशीस अधिकृत मान्यता देण्यात आल्याची माहिती अतिरिक्त पोलिस महासंचालक (CID) सुनील रामानंद यांनी दिली.

रामानंद म्हणाले, “बारामती तालुका पोलिस ठाण्यात नोंदवण्यात आलेल्या अपघाती मृत्यू अहवालाच्या अनुषंगाने आम्हाला तपास करण्याचे निर्देश मिळाले आहेत. घटनास्थळ सुरक्षित ठेवणे आणि पुराव्यांशी कोणतीही छेडछाड होऊ नये, हे आमचे प्राथमिक उद्दिष्ट आहे.”

CID अधिकाऱ्यांच्या माहितीनुसार, अपघातस्थळ आणि धावपट्टी परिसर पूर्णतः सील करण्यात आला आहे. कोणालाही ढिगाऱ्यांजवळ जाण्याची परवानगी नाही. पोलिस पथके चोवीस तास तैनात असून, फॉरेन्सिक तज्ञांनी घटनास्थळावरून महत्त्वाचे पुरावे आधीच जप्त केले आहेत.

ही दुर्घटना Learjet 45 या चार्टर्ड विमानाच्या लँडिंगदरम्यान घडली. धावपट्टीपासून काही अंतरावर विमान कोसळले आणि त्यात उपमुख्यमंत्री अजित पवार, पायलट, सह-वैमानिक आणि केबिन क्रू सदस्यांसह पाच जणांचा मृत्यू झाला.

गुरुवारी CID अधिकाऱ्यांनी बारामती तालुका पोलिस ठाण्याकडून अपघाती मृत्यू अहवाल प्राप्त केला. प्राथमिक चौकशीच्या भाग म्हणून त्यांनी विविध सरकारी कार्यालयांना भेटी देत उड्डाणाशी संबंधित कागदपत्रे, विमानतळ व्यवस्थापन, तसेच अपघातानंतरचा तात्काळ प्रतिसाद यांचा आढावा घेतला.

दरम्यान, अपघाताच्या तांत्रिक कारणांची चौकशी विमान अपघात तपास ब्युरो (AAIB) आणि नागरी उड्डयन महासंचालनालय (DGCA) यांच्या पथकांकडून सुरू आहे. CID ची चौकशी या केंद्रीय यंत्रणांशी समन्वय साधत, पोलीस तपासाच्या कक्षेत येणाऱ्या बाबींवर केंद्रित राहणार आहे.

“सरकारच्या निर्देशानुसार, सर्व बाबींचा सखोल अभ्यास करून आम्ही एक व्यापक अहवाल सादर करू,” असेही सुनील रामानंद यांनी स्पष्ट केले.

The post उपमुख्यमंत्री अजित पवार मृत्यू प्रकरणात CID चौकशीचे आदेश, घटनास्थळ पूर्ण सील appeared first on थोडक्यात घडामोडी.

पुणे : आज सकाळी बारामती विमानतळाजवळ झालेल्या धक्कादायक अपघातात महाराष्ट्राचे उपमुख्यमंत्री अजित पवार यांचा आणि त्यांच्या सोबत असलेल्यांचा मृत्यू झाला आहे. हा अपघात त्यांच्या चार्टर्ड विमानाच्या लँडिंगच्या प्रयत्नात झाल्याचे पहिल्या अहवालांतून समोर येत आहे.

उपमुख्यमंत्र्यांचे विमान मुंबईहून बारामतीकडे येत होते, तेव्हा लँडिंगच्या वेळी अचानक नियंत्रण सुटले आणि विमान अपघातग्रस्त झाले. विमानातील सर्व प्रवासी आणि कर्मचारी यांची घटनास्थळीच दुर्दैवी मृत्यू झाला, अशी माहिती अधिकारी आणि डीजीसीएने अधिकृतरित्या दिली आहे.

विमानाचे अवशेष जिथे कोसळले तेथे मोठ्या प्रमाणात धूर आणि आग पसरलेली होती आणि विमानाचे तुकडे शेतात पसरलेले दिसले. बचाव-गट, पोलीस, प्रशासन आणि आरोग्य सेवा त्वरित घटनास्थळी दाखल झाले.

अजित पवार हे राष्ट्रवादी काँग्रेस पक्षाचे नेतृत्व करणारे वरिष्ठ नेते आणि राज्याचे प्रभावी राजकारणी म्हणून ओळखले जातात. त्यांच्या अचानक निधनामुळे संपूर्ण महाराष्ट्रात शोककळा पसरली आहे, आणि राजकीय तसेच सामाजिक स्तरावर दुःख व्यक्त केले जात आहे.

या गंभीर अपघाताचे नेमके कारण अद्याप स्पष्ट झालेले नाही. प्राथमिक अहवालात तांत्रिक कारण किंवा लँडिंग प्रक्रियेत झालेला बिघाड हे दृष्टिकोन समोर येत आहे, तर डीजीसीएकडून तपास सुरू करण्यात आला आहे. अधिकृत अहवाल येईपर्यंत कोणतेही निश्चित कारण सांगणे शक्य नाही.

The post उपमुख्यमंत्री अजित पवार यांचे विमान अपघातात दुःखद निधन, बारामतीत घडली दुर्घटना appeared first on थोडक्यात घडामोडी.

पुणे : पुणे जिल्ह्यातील उरुळीकांचन जवळील सोरतापवाडी येथे सासरच्या छळामुळे एका विवाहितेने आत्महत्या केल्याची धक्कादायक घटना उघडकीस आली आहे. दीप्ती मगर चौधरी (वय अंदाजे 30) यांनी शनिवारी रात्री गळफास घेऊन आपले जीवन संपवले.

या प्रकरणी उरुळीकांचन पोलिस ठाण्यात पती रोहन चौधरी, सासू सुनिता चौधरी, सासरे कारभारी चौधरी आणि दीर रोहित चौधरी यांच्याविरोधात गंभीर स्वरूपाचा गुन्हा दाखल करण्यात आला आहे.

पोलिस तपासानुसार, दीप्ती आणि रोहन यांचा विवाह 2019 साली झाला होता. विवाहावेळी दीप्तीच्या कुटुंबीयांनी सुमारे 50 तोळे सोने दिले होते. मात्र, लग्नानंतरही सासरच्यांकडून तिच्यावर वारंवार मानसिक छळ करण्यात येत होता.

दीप्तीच्या आईने दिलेल्या तक्रारीनुसार, सासरच्या मंडळींकडून तिच्या चारित्र्यावर संशय घेतला जात होता. तसेच “दिसायला सुंदर नाही”, “घरकाम जमत नाही” अशा अपमानास्पद आरोपांद्वारे तिचा सातत्याने छळ केला जात होता.

मुलीचा संसार वाचावा म्हणून दीप्तीच्या माहेरकडून एकदा 10 लाख रुपये रोख आणि वाहनासाठी तब्बल 25 लाख रुपये देण्यात आले होते. तरीही सासरच्या त्रासात कोणतीही घट झाली नाही, असे तक्रारीत नमूद करण्यात आले आहे.

तक्रारीतील सर्वात गंभीर बाब म्हणजे, दीप्ती गर्भवती असताना तिच्या पोटातील बाळ मुलगी असल्याचे समजताच, पती व सासरच्या सदस्यांनी तिच्या इच्छेविरुद्ध जबरदस्तीने गर्भपात केल्याचा आरोप आहे. ही माहिती दीप्तीने स्वतः आपल्या आईला दिल्याचे तक्रारीत नमूद करण्यात आले आहे.

दरम्यान, आरोपी सासू सुनिता चौधरी या ऑक्टोबर 2025 मध्ये सोरतापवाडी गावाच्या सरपंचपदी निवडून आल्या होत्या, तर सासरे कारभारी चौधरी हे शिक्षक असल्याची माहिती समोर आली आहे.

उरुळीकांचन पोलीस अधिक तपास करत असून, या प्रकरणामुळे पुन्हा एकदा हुंडाबळी आणि कौटुंबिक छळाचा गंभीर प्रश्न ऐरणीवर आला आहे.

The post सासरच्या छळाला कंटाळून विवाहितेची आत्महत्या; हुंडा, चारित्र्यावर संशय, जबरदस्ती गर्भपात… appeared first on थोडक्यात घडामोडी.