उत्तर प्रदेश : झाशीमध्ये एक अतिशय भयंकर घटना घडली. महिलेची ओढणी दुचाकीच्या साखळीत अडकून तिचा हात धडावेगळा झाला. ही वेदनादायक घटना पाहून आजूबाजूला असलेले लोक हादरले. सध्या या महिलेला झाशी येथील खासगी रुग्णालयात उपचारासाठी दाखल करण्यात आले आहे.

मिळालेल्या माहितीनुसार, गुरसरे, झाशी येथील रहिवासी जयराम अहिरवार हे सध्या आपल्या कुटुंबासह राजगड येथे राहतात. त्यांची मुलगी रक्षा हिची ओढणी दुचाकीत अडकून हा अपघात झाला. रक्षा हिचे दोन वर्षांपूर्वी लग्न झाले होते. रक्षाला ५ महिन्यांची मुलगी आहे. रक्षाचा पती वासुदेव यांनी सांगितले की, भाऊबीजेच्या दिवशी त्याची पत्नी राजगड येथील तिच्या माहेरी गेली होती. येथे त्यांची मुलगी आजारी झाली. त्यामुळे आपल्या मुलीच्या उपचारासाठी रक्षा तिची आई आणि भावासोबत दुचाकीवरून जात होती. घरापासून काही अंतरावर असलेल्या हंसारी ते राजगड दरम्यान ते पोहोचले असता, अचानक दुचाकीच्या चेनमध्ये रक्षाची ओढणी अडकली. यानंतर सगळे खाली पडले. ओढणी दुचाकीमध्ये इतकी अडकली होती की रक्षाचा हात दुचाकीमध्ये अडकला आणि धडावेगळा झाला. यानंतर तात्काळ रुग्णवाहिका बोलावून महिलेला जवळच्या रुग्णालयात दाखल करण्यात आले. रुग्णालयात उपचार सुरू आहेत.

वाहन चालवताना किंवा वाहनात बसताना काळजी घेणे किती गरजेचे आहे, हे या घटनेमुळे अधोरेखित झाले आहे. पोलिस अधीक्षक रामवीर सिंह यांनी सांगितले की, दुचाकीमध्ये ओढणीसह हात देखील अडकल्याने महिलेचा हात वेगळा झाला. दुचाकी चालवताना हेल्मेट घाला. जर स्त्रीने साडी नेसली असेल तर ती सांभाळा. तुम्ही कार चालवत असाल तर सीट बेल्ट लावा.

The post भयंकर! महिलेची ओढणी दुचाकीच्या साखळीत अडकली, हात निखळून झाला धडावेगळा… appeared first on थोडक्यात घडामोडी.