मुंबई : मुंबईकरांची ई-वॉटर टॅक्सीबाबतची उत्सुकता संपणार असून देशातील पहिली ई-वॉटर टॅक्सी मुंबईत धावणार आहे. स्वीडनची कँडेला कंपनी पर्यावरणपूरक वॉटर टॅक्सीचा पायलट प्रोजेक्ट राबवून ही सेवा त्वरित सुरू करण्याच्या सूचना मत्स्य व्यवसाय व बंदरे मंत्री नितेश राणे यांनी स्वीडनचे महावाणिज्य दूत स्वेन ओस्टबर्ग यांना बैठकीदरम्यान केल्या. मंत्रालयात आज मत्स्य व्यवसाय व बंदरे मंत्री राणे यांच्याशी महावाणिज्य दूत ओस्टबर्ग यांनी ई-वॉटर टॅक्सीबाबत चर्चा केली. यावेळी ओस्टबर्ग यांच्या सल्लागार सलोनी झव्हेरी यांच्यासह वरिष्ठ अधिकारी उपस्थित होते.

मंत्री राणे यांनी सांगितले की, मुंबई महानगरामध्ये वाहतूक यंत्रणेवर ताण येत असून ई-वॉटर टॅक्सी लवकर सुरू होण्यासाठी मुख्यमंत्री देवेंद्र फडणवीस आग्रही आहेत. गेटवे ऑफ इंडिया ते एलिफंटा आणि गेट वे ऑफ इंडिया ते अलिबाग या जलवाहतूक मार्गाच्या पायलट प्रोजेक्टने मुंबईला भेडसावणारा वाहतूक कोंडीचा प्रश्न सुटणार आहे. स्वीडनच्या कँडेला कंपनीशी झालेल्या करारानुसार त्यांनी नागरिकांची सुरक्षितता, वातावरण, पर्यावरण यांचा विचार करावा. शिवाय वॉटर टॅक्सीचे नागरिकांना परवडणारे माफक दर ठेवावेत. कंपनीला लागणाऱ्या परवान्याबाबत राज्य शासन दक्षता घेईल.

ओस्टबर्ग यांनी महाराष्ट्रातील पोर्टच्या विकासात स्वारस्य दाखवित म्हणाले की, स्वीडनची कॅंडेला कंपनी येवून सर्व माहितीचे सादरीकरण करेल. त्यानंतर वॉटर टॅक्सीचा पायलट प्रोजेक्ट त्वरित सुरू करू.

पोर्टच्या ससून डॉकला मॉडेल पोर्ट करा – मंत्री राणे

महावाणिज्यदूत ओस्टबर्ग यांनी पोर्टच्या विकासात स्वीडन कंपनी योगदान देवू इच्छित असल्याने सांगितल्याने मंत्री राणे यांनी ससून डॉकची पाहणी करण्याची सूचना केली. स्वीडन कंपनीने राज्य शासनाला पोर्टच्या विकासाबाबत प्रस्ताव सादर करावा. वाहतुकीसाठी सुलभ ठिकाणांची पाहणी करून देशात एक नंबर होईल, असे मॉडेल पोर्ट विकसित करावे. यासाठी मेरीटाईम बोर्डाशी चर्चा करून एप्रिलमध्ये पाहणी करून अहवाल सादर करावा, असेही मंत्री राणे यांनी सांगितले. ओस्टबर्ग यांनी पोर्टचा विकास, स्वच्छता, सोयी-सुविधा, गुंतवणुकीबाबतची माहिती दिली.

The post मुंबईत पर्यावरणपूरक वॉटर टॅक्सीचा पायलट प्रोजेक्ट त्वरित सुरू करा – मंत्री नितेश राणे appeared first on थोडक्यात घडामोडी.

मुंबई : भारतातील पहिली दोनशे प्रवाशांची क्षमता असलेली हाय स्पीड वॉटर टॅक्सी आता मुंबईत सुरू होणार आहे. नयनतारा शिपिंग प्रायव्हेट लिमिटेड कंपनीने ही वेसल बनवली आहे. तिचे नाव आहे ‘नयन एलेव्हन’. 1 नोव्हेंबर पासून डोमेस्टिक क्रुझ टर्मिनल ते मांडवा दरम्यान या नवीन वॉटर टक्सीची सेवा सुरू करण्यात येणार आहे. दिवसाला 6 फेऱ्या चालवल्या जातील.

लवकरच बेलापूर ते गेट वें ऑफ इंडियापर्यंत या नवीन वॉटर टॅक्सीच्या फेऱ्या सुरू होतील. यात 2 क्लास आहेत. एक आहे एक्झिक्युटिव्ह क्लास जिथे चारशे रुपये तिकीट असेल, तर दुसरा आहे बिजनेस क्लास जिथे 450 रुपये तिकीट आकारले जाईल. एक्झिक्युटीव्ह क्लास मध्ये 160 जणांची आसन क्षमता आहे तर बिजनेस क्लास मध्ये 60 जणांची आसन क्षमता आहे. डोमेस्टिक क्रूज टर्मिनल ते मांडवापर्यंत पोहोचण्यासाठी या वॉटर टॅक्सीला चाळीस मिनिटं लागतील. तर बेलापूर पासून गेटवे ऑफ इंडिया पर्यंत जाण्यासाठी केवळ एक तास या वॉटर टॅक्सीला लागेल. सध्या उपलब्ध असलेल्या इतर सर्व जलवाहतुकीच्या साधनांपैकी ही वॉटर टॅक्सी सर्वात जलद आणि सर्वात सुरक्षित मानली जात आहे.

फीचर्स

1. भारतातली पहिली हाय स्पीड वॉटर टॅक्सी ज्यामध्ये 200 प्रवाशांची क्षमता आहे.
2. या वॉटर टॅक्सी मध्ये आंतरराष्ट्रीय सर्व नियमांची पूर्तता करण्यात आलेली आहे.
3. उन्हाळा आणि हिवाळ्यासोबतच पावसाळ्यात देखील ही वॉटर टॅक्सी सुरू राहणार आहे.
4. संपूर्ण वेसलवर आठ सीसीटीव्ही कॅमेरे बसवण्यात आलेले आहेत जेणेकरून सर्व ठिकाणी कॅप्टनला लक्ष ठेवता येईल.
5. ही व्यसन रात्रीच्या अंधारात देखील चालू शकणार आहे, अशा प्रकारचे ॲडव्हान्स नेव्हिगेशन सिस्टीम यात बसवण्यात आली आहे.
6. 16 नोट्स प्रतितास इतक्या वेगाने ही वॉटर टॅक्सी जाऊ शकणार आहे, तसेच या वॉटर टॅक्सीची 22 नोट्स प्रति तास गतीने चाचणी घेण्यात आलेली आहे. यामध्ये 6 व्हॅक्यूम टॉयलेट्स देखील आहेत.
7. हाय स्पीड साठी या वॉटर टॅक्सी मध्ये दोन अद्ययावत इंजिन लावण्यात आलेले आहेत.

दरम्यान, प्रवाशांच्या सुरक्षेसाठी प्रत्येक सीटच्या खाली लाईफ जॅकेट्स देण्यात आलेले आहेत. सोबतच आपत्कालीन परिस्थितीमध्ये वापरण्यात येणारे 8 लाईफ rafts देखील यावर आहेत. आगीसारखी घटना कंट्रोलमध्ये आणण्यासाठी अंतर्गत स्प्रिंकलर्स लावण्यात आलेले आहेत. तसेच प्रत्येक ठिकाणी स्मोक डिटेक्टर लावले गेलेले आहेत.

The post भारतातील पहिली हाय स्पीड वॉटर टॅक्सी मुंबईतून १ नोव्हेंबर पासून सुरू होणार , २०० प्रवाशांची आसन क्षमता appeared first on थोडक्यात घडामोडी.