पुणे : एमपीएससी टॉपर दर्शना पवारच्या हत्या प्रकरणी पोलिसांनी तिचा मित्र राहुल हंडोरेला अटक केली आहे. राजगड किल्ल्याच्या पायथ्याशी रविवारी दर्शनाचा मृतदेह कुजलेल्या अवस्थेत सापडला होता. तिचा खून झाल्याचे शवविच्छेदन अहवातून स्पष्ट झाले होते. त्यानंतर पुणे ग्रामीण पोलिसांनी राहुलला मुंबईतून ताब्यात घेतले. दर्शनाची हत्या केल्याची कबुली देखील राहुलने दिल्याची माहिती आहे.

मिळालेल्या माहितीनुसार, दर्शना पवार आणि राहुल हंडोरे हे एकमेकांचे दूरचे नातेवाईक आहेत. राहुलला दर्शनासोबत लग्न करायचे होते. परंतु पवार कुटुंबीयांचा या लग्नाला विरोध होता. त्यांनी तिचं लग्न दुसरीकडे ठरवलं होतं. तसेच दर्शना नुकतील महाराष्ट्र लोकसेवा आयोगाची परीक्षा तिसऱ्या क्रमांकाने उत्तीर्ण झाली, राहुल मात्र परीक्षेत अपयशी झाला होता. त्यातूनच राहुलने दर्शनाची हत्या केल्याचा संशय व्यक्त केला जात आहे.

दर्शना राज्य लोकसेवा आयोगाच्या (एमपीएससी) परीक्षेत राज्यात तिसऱ्या क्रमांकाने उत्तीर्ण झाली होती. वनपरिक्षेत्र अधिकारी म्हणून तिची निवडही झाली होती. पुण्यात तिचा सत्कार आयोजित करण्यात आला होता. त्यासाठी नऊ जून रोजी ती पुण्यात आली होती. ती धायरी परिसरात एका मैत्रिणीकडे राहत होती. १२ जून रोजी ती मित्राबरोबर फिरायला जाण्यासाठी घराबाहेर पडली होती. कुटुंबीयांना दर्शनाने याबाबत माहिती दिली होती. तिच्यासोबत मित्र राहुल हंडोरे होता. मात्र, १२ जूनला तिचा मोबाइल बंद असल्याचे लक्षात आले. त्यानंतर कुटुंबीयांनी शोध सुरू केला. दर्शना बेपत्ता असल्याची तक्रार त्यांनी सिंहगड रस्ता पोलिसांत दिली.

दरम्यान, राहुल हंडोरे बेपत्ता झाल्यानंतर त्याच्या कुटुंबीयांनीही तो बेपत्ता झाल्याची तक्रार वारजे पोलिस ठाण्यात दिली. रविवारी राजगड किल्ल्याच्या पायथ्याशी सतीचा माळ परिसरात दर्शनाचा मृतदेह कुजलेल्या अवस्थेत सापडला होता. त्यानंतर हे प्रकरण समोर आले. राजगड किल्ल्याच्या पायथ्याशी असलेल्या हॉटेलच्या परिसरातील सीसीटीव्ही चित्रीकरणातून पोलिसांना समजले कि, दर्शना आणि राहुल १२ जून रोजी दुचाकीवरून वेल्हे तालुक्यातील राजगड किल्ला परिसरात गेले.
सकाळी सव्वासहाच्या सुमारास दोघे जण गडाच्या पायथ्याशी पोहोचले. त्यानंतर दोघे गडावर गेले. सकाळी दहाच्या सुमारस राहुल एकटाच गडावरून खाली आला. त्यानंतर राहुल वेगवेगळ्या राज्यांमध्ये फिरत होता. अखेर पुणे ग्रामीण पोलिसांनी राहुलला अटक केली.

The post एमपीएससी टॉपर दर्शना पवार खून प्रकरणी मित्र राहुल हंडोरेला अटक, हत्येचे कारण आले समोर appeared first on थोडक्यात घडामोडी.