जगभरातील शास्त्रज्ञ ओमिक्रॉनबद्दल नवनवीन माहिती गोळा करत आहेत. डब्ल्यूएचओने चेतावणी देखील जारी केली आहे की ओमिक्रॉन कोरोनाव्हायरसच्या इतर कोणत्याही व्हेरिएंटपेक्षा वेगाने पसरतो. अशा परिस्थितीत लक्षणांकडे दुर्लक्ष केल्याने रुग्णांची संख्या वाढण्याची शक्यता तज्ज्ञांनी व्यक्त केली आहे. यामुळेच आरोग्य तज्ञ लोकांना कोणत्याही प्रकारच्या लक्षणांकडे दुर्लक्ष करू नका असा सल्ला देत आहेत.

डॉक्टरांनी ओमिक्रॉनचे एक असामान्य लक्षण नोंदवले आहे जे सहसा कोणाच्या लक्षात येत नाही. ओमिक्रॉनच्या बहुतेक रुग्णांमध्ये, एक विशिष्ट लक्षण निश्चितपणे आढळून येते आणि ते म्हणजे भूक न लागणे. जर तुम्हाला इतर काही लक्षणांसह भूक लागत नसेल, तर तुम्ही डॉक्टरांचा किंवा तज्ज्ञांचा सल्ला घेऊन त्यानंतर कोविड चाचणी करून घ्यावी. चव आणि वास कमी होणे, ताप, घसा खवखवणे आणि अंगदुखी ही कोरोनाची सर्वात सामान्य लक्षणे आहेत. तथापि, ओमिक्रॉनच्या प्रत्येक रुग्णामध्ये ही लक्षणे आढळत नाहीत. आत्तापर्यंतच्या आकडेवारीच्या आधारे, शास्त्रज्ञांचे म्हणणे आहे की केवळ 50% कोरोना रुग्णांना ताप, कफ आणि चव आणि वास कमी झाल्यासारखे वाटत आहे.

The post ओमिक्रॉनचे एक असामान्य लक्षण आले समोर, जाणवल्यास घ्या तज्ज्ञांचा सल्ला appeared first on थोडक्यात घडामोडी.

कोरोना व्हायरसच्या ओमिक्रॉन या नवीन व्हेरिएंटमुळे जगभरात चिंतेचे वातावरण आहे. हे देखील स्पष्ट झाले आहे की हा प्रकार अधिक वेगाने पसरत आहे. परंतु, त्याची घातकता कमी आहे. म्हणजेच, यातून गंभीर आजारी पडण्याचा आणि मृत्यूचा धोका डेल्टा आणि इतर प्रकारांपेक्षा खूपच कमी आहे. असे असूनही, ओमिक्रॉनची भीती कायम आहे आणि जगभरातून त्यावर मार्ग काढण्याचा प्रयत्न सुरु आहे. अशाच एका प्रयत्नाला आता यश मिळताना दिसत आहे. आतापर्यंत मानले जात होते की सध्याच्या लस ओमिक्रॉनवर कुचकामी आहेत, परंतु, अभ्यासात आढळून आले की तिसरा डोस Omicron विरुद्ध प्रतिकारशक्ती 88 टक्क्यांपर्यंत वाढवू शकतो.

ब्रिटनमध्ये केलेल्या अभ्यासानुसार, कोरोना लसीचा तिसरा डोस, ज्याला भारतात सावधगिरीचा डोस (precautionary dose) म्हटले जात आहे, तो प्रभावी ठरू शकतो. या अभ्यासानुसार, तिसरा डोस Omicron विरुद्ध प्रतिकारशक्ती 88 टक्क्यांपर्यंत वाढवू शकतो. यापूर्वीच्या अनेक संशोधनातून असे दिसून आले आहे की, कोविडची लस घेतल्यानंतर 6 महिन्यांनंतर त्यातून निर्माण झालेली प्रतिकारशक्ती कमकुवत होऊ लागते. अशा परिस्थितीत ओमिक्रॉन व्हेरियंटच्या आगमनाने लोक घाबरले होते. मात्र या अभ्यासाने दिलासा निर्माण केला आहे.

ब्रिटीश अभ्यासानुसार, तिसरा म्हणजे बूस्टर डोस म्युटंट कोरोना वेरिएंट (ओमिक्रॉन) विरूद्ध चांगले संरक्षण प्रदान करू शकतो. डॉ. एरिक टोपोल, स्क्रिप्ट रिसर्च ट्रान्सलेशन इन्स्टिट्यूटचे संचालक आणि मॉलिक्युलर औषधांचे प्राध्यापक यांनी UKHSA अहवाल शेअर करत सांगितले की कोरोना लसीचा दुसरा डोस घेतल्यानंतर सुमारे 6 महिन्यांनंतर, ओमिक्रॉन या नवीन प्रकाराविरूद्ध त्याची कार्यक्षमता केवळ 52 टक्क्यांपर्यंत उरते. अशा परिस्थितीत, बूस्टर डोस पुन्हा एकदा 88 टक्क्यांपर्यंत प्रतिकारशक्ती वाढवते.

बूस्टर डोस घेतल्यामुळे प्रतिकारशक्ती तर वाढतेच, त्याचबरोबर कोरोना संसर्गाचा धोका देखील कमी होतो, तसेच ओमिक्रॉन असल्यास गंभीर लक्षणे देखील उद्भवत नाहीत. एवढेच नाही तर ओमिक्रॉनची बाधा झाली तरी रुग्णाला रुग्णालयात दाखल करावे लागत नाही. तिसरा डोस घेणाऱ्यांना रुग्णालयात दाखल होण्याचा धोका देखील लस न घेतलेल्या लोकांपेक्षा 81 टक्के कमी असतो.

The post दिलासादायक! ओमिक्रॉनपासून वाचवणार लसीचा बूस्टर डोस, 88 टक्क्यांपर्यंत वाढेल प्रतिकारशक्ती appeared first on थोडक्यात घडामोडी.

मुंबईतील धारावी परिसरात ओमिक्रॉनचा एक रुग्ण आढळला आहे. ही व्यक्ती टांझानियाहून परतली होती. या रुग्णाला सेव्हनहिल्स रुग्णालयात दाखल करण्यात आलेले आहे. अशी माहिती बृहन्मुंबई महानगरपालिका (BMC) कडून देण्यात आली आहे.

परदेशातून मुंबईतील धारावीत आलेल्या या रुग्णाचा कोविड रिपॉर्ट रविवारी (५ डिसेंबर) रोजी पॉझिटिव्ह आला होता. त्यानंतर या रुग्णाला उपचारासाठी मुंबईतील सेव्हन हिल्स हॉस्पिटलमध्ये दाखल करण्यात आले होते. त्यानंतर या रुग्णाचा स्वॅब जिनोम सिक्वेन्सिंगसाठी पाठवण्यात आला होता. तो अहवाल आला असून त्याला ओमायक्रॉन व्हेरिएंटची लागण झाल्याचे स्पष्ट झाले आहे.

The post ब्रेकिंग! मुंबईतील धारावी परिसरात ओमिक्रॉनचा रुग्ण आढळला appeared first on थोडक्यात घडामोडी.

नागपूर : कोविडच्या ओमिक्रॉन या नवीन प्रकारच्या विषाणूच्या पार्श्वभूमीवर केंद्र व राज्य शासनाने सतर्क राहण्याच्या सूचना दिल्या आहेत. त्याअनुषंगाने शासकीय वैद्यकीय महाविद्यालय (मेडिकल), इंदिरा गांधी वैद्यकीय महाविद्यालय (मेयो) तसेच अखिल भारतीय आयुर्विज्ञान संस्था (एम्स) येथे ऑक्सिजन निर्मितीसाठी बसविण्यात आलेले प्रकल्प तत्काळ सुरु करण्यासाठी कार्यवाही करण्याचे आदेश विभागीय आयुक्त प्राजक्ता लवंगारे-वर्मा यांनी दिले.

कोविडच्या पार्श्वभूमीवर आरोग्य सुविधांसोबतच ऑक्सिजनच्या उपलब्धतेसंदर्भात मेयो, मेडिकल येथे प्रत्येकी दोन तर ‘एम्स’मध्ये चार पीएसए प्लांट सुरु करण्यासाठी जिल्हा वार्षिक योजना तसेच इतर योजनांमधून निधी उपलब्ध करून देण्यात आला आहे. ऑक्सिजन प्लांट सुरु करण्यासाठी येणाऱ्या अडचणी संदर्भात विभागीय आयुक्त श्रीमती लवंगारे-वर्मा व जिल्हाधिकारी आर. विमला यांनी प्रत्यक्ष भेट देवून पाहणी केली. तसेच अपूर्ण कामे येत्या दहा दिवसांत पूर्ण करण्याचे आदेश यावेळी दिले.

‘मेयो’मध्ये ऑक्सिजनचे दोन पीएसए प्लांट बसविण्यात येत आहेत. यासाठी आवश्यक असलेले विद्युत रोहित्र व शेड बसविण्याचे काम सुरु आहे. ही कामे तत्काळ पूर्ण करण्याच्या सूचना विभागीय आयुक्तांनी दिल्या. ऑक्सिजन निर्मिती संदर्भात वैद्यकीय विभागातर्फे निश्चित कार्यपद्धती ठरवून देण्यात आली आहे. त्यानुसार दर आठवड्याला ऑक्सिजन ऑडीट करण्याच्या सूचना त्यांनी केल्या. मेयो हॉस्पिटलला आवश्यक असलेले अल्ट्रा सॉनिक कॅमेरा खरेदीचा प्रस्ताव सादर करण्याबाबतही यावेळी सूचना दिल्या. ‘मेडिकल’मध्ये दोन ऑक्सिजन निर्मिती प्लांट बसविण्यात आले असून यासाठी आवश्यक असलेला विद्युत पुरवठा दहा डिसेंबरपूर्वी करावा. ऑक्सिजन निर्मिती प्लांट पूर्ण क्षमतेने सुरु करण्यासाठी संबंधित कंत्राटदाराला दिनांक 16 डिसेंबरपर्यंतची मुदत देण्यात आली आहे. त्याआधी सार्वजनिक बांधकाम विभाग व विद्युत विभागाने आवश्यक बांधकाम व विद्युत जोडणी पूर्ण करावी. ऑक्सिजन प्लांटच्या देखभाल व दुरुस्तीसाठी सार्वजनिक बांधकाम विभागातर्फे कार्यवाही करावी. तसेच यासाठी आवश्यक असलेल्या बायोमेडिकल अभियंत्याच्या सेवा घेण्याबाबतही प्रस्ताव तयार करावा, असेही विभागीय आयुक्तांनी यावेळी सांगितले.

‘मेयो’च्या अधिष्ठाता डॉ. भावना सोनवणे, डॉ. वैशाली शेलगावकर, ‘मेडिकल’चे अधिष्ठाता डॉ. सुधीर गुप्ता, ‘एम्स’च्या संचालक मेजर जनरल डॉ. विभा दत्ता, वैद्यकीय अधीक्षक डॉ. मनीष श्रीगिरीवार, सार्वजनिक बांधकाम विभागाचे अधीक्षक अभियंता विद्याधर सरदेशमुख, विद्युत विभागाचे अधीक्षक अभियंता हेमंत पाटील, राष्ट्रसंत तुकडोजी कॅन्सर हॉस्पिटलचे अतिरिक्त संचालक डॉ. कृष्णा तिरमनकर, जिल्हा शल्य चिकित्सक डॉ. देवेंद्र पातुरकर आदी पाहणी दौऱ्यात उपस्थित होते.

‘एम्स’मध्ये बसविण्यात आलेल्या चार ऑक्सिजन निर्मिती प्लांटची पाहणी विभागीय आयुक्तांनी केली. ऑक्सिजन निर्मितीसाठी येणाऱ्या अडचणी सोडविण्यासंदर्भात ‘एम्स’च्या संचालक मेजर जनरल डॉ. विभा दत्ता यांच्यासोबत चर्चा केली. मेयो, मेडिकल तसेच एम्समध्ये ऑक्सिजन पुरवठा सुरळीत व्हावा, यासाठी जिल्हा प्रशासनातर्फे निधी उपलब्ध करून देण्यात आला आहे. निर्धारित कालमर्यादेत सर्व ऑक्सिजन निर्मिती होईल, यासाठी सर्व यंत्रणांनी समन्वयाने काम करण्याच्या सूचना जिल्हाधिकारी आर. विमला यांनी यावेळी केल्या.

The post ओमिक्रॉनच्या पार्श्वभूमीवर ऑक्सिजन निर्मिती प्रकल्प तत्काळ सुरु करा, विभागीय आयुक्त प्राजक्ता लवंगारे-वर्मा यांचे आदेश appeared first on थोडक्यात घडामोडी.