Omicron Varinat : कोरोनाचा ओमिक्रॉन व्हॅरिएंट जगातील अनेक देशांमध्ये पसरला आहे. जगभरातील डॉक्टर आणि आरोग्य तज्ञांनी जागतिक आरोग्य संघटनेला क्लिनिकल अहवाल सादर केला आहे. ज्यामध्ये दक्षिण आफ्रिकेत 2 वर्षांपेक्षा जास्त वयाच्या मुलांची बाधित होण्याची संख्या वाढल्याचे म्हटले आहे. अशा परिस्थितीत ओमिक्रॉन मुलांसाठी धोकादायक ठरू शकतो, अशी भीती आहे. त्यामुळे मुलांच्या लसीकरणाबाबत पुन्हा एकदा मोठा प्रश्न निर्माण झाला आहे. भारतासाठीही ही धोक्याची घंटा आहे. कारण भारतात फक्त १८ वर्षांवरील लोकांना लसीकरण केले जात आहे.

WHO च्या तज्ञांच्या गटाने सांगितले होते की प्रौढ लोकांना सध्या ओमिक्रॉनची किरकोळ लक्षणे दिसत आहेत. बहुतेक संक्रमित लोकांना कोणतीही लक्षणे दिसत नाहीत. WHO च्या युरोप कार्यालयाने देखील सांगितले होते की 5 ते 14 वर्षे वयोगटातील मुलांमध्ये संसर्ग वेगाने वाढत आहे. डब्ल्यूएचओ युरोपचे प्रादेशिक संचालक डॉ. हॅन्स क्लूज यांनी सांगितले की, युरोपातील अनेक देशांत मुलांमध्ये संसर्ग होण्याचे प्रमाण दोन ते तीन पटीने वाढले आहे. तथापि, ते असेही म्हणाले की वृद्ध, आरोग्यसेवा कर्मचारी आणि कमकुवत रोगप्रतिकारक शक्ती असलेल्या लोकांपेक्षा लहान मुलांना कमी गंभीर संसर्गाचा सामना करावा लागतो. आतापर्यंत, जगभरातील 21 देशांमध्ये 432 ओमिक्रॉन व्हॅरिएंटची प्रकरणे नोंदवली गेली आहेत.

कोरोनाव्हायरसची तिसरी लाट आणि ओमिक्रॉनच्या वाढत्या प्रकरणांच्या पार्श्वभूमीवर, मुलांच्या लसीकरणाची प्रतीक्षा आहे. भारतात, Zydus Cadila ची ZyCoV D लस सप्टेंबरमध्ये मंजूर झाली आहे. तज्ञ समितीने 2 वर्षांपेक्षा जास्त वयाच्या मुलांना Covaxin देण्याची शिफारस केली आहे. परंतु औषध नियामकाने त्यास मान्यता दिलेली नाही. तसेच नॅशनल टेक्निकल ऍडव्हायझरी ग्रुप ऑन इम्युनायझेशन (NTAGI) ची बूस्टर डोस आणि मुलांसाठी लसीसंदर्भात सोमवारी बैठक झाली. मात्र त्याचा मसुदा अद्याप तयार झालेला नाही. म्हणजेच लहान मुलांसाठीची कोरोना लस अद्याप प्रलंबीत आहे.

IMA चा भारतासाठी जो अहवाल आला आहे, त्यात भारत पुन्हा पूर्वीच्या स्थितीत जात असून ते रोखण्यासाठी योग्य व्यवस्था करण्याची आवश्यकता असल्याचे म्हटले आहे, अन्यथा तिसरी मोठी लाट येऊ शकते. Omicron प्रकार दक्षिण आफ्रिकेत पसरला आहे, रुग्णालयांमध्ये मुलांची संख्या वाढत आहे. हे पाहता सर्व शाळा आणि महाविद्यालयांमध्ये कोविड प्रोटोकॉलचे योग्य पालन व्हायला पाहिजे. तसेच जे तरुण लसीकरणास पात्र आहेत, त्यांना लसीकरण करणे आवश्यक आहे.

The post Omicron Varinat : मुलांमध्ये संसर्गाचे प्रमाण वाढले, WHO च्या अहवालाने वाढवली भारताची चिंता appeared first on थोडक्यात घडामोडी.

मुंबई : दक्षिण आफ्रिकेमध्ये सापडलेल्या कोविडच्या नव्या विषाणू ओमिक्रॉनचे संकट घोंगावत असताना आंतरराष्ट्रीय विमानतळावर निर्बंध आणखी कठोर करण्यात आले आहे. या नवीन विषाणूच्या पार्श्वभूमीवर भारत सरकारने अनेक देशांना ‘कोरोना संक्रमणाचा सर्वाधिक धोका असलेले देश’ (at-risk) म्हणून घोषित केले आहे. सदर विषाणूचा प्रसार महाराष्ट्रामध्ये रोखण्यासाठी राज्यात हवाई वाहतूकीच्या संदर्भात तातडीने अनेक निर्बंध लादण्यात आले आहेत.

१. 28 नोव्हेंबर 2021 रोजी भारत सरकारने लावलेले निर्बंध आणि त्याच्याशी संबंधित जारी केलेली मार्गदर्शक तत्त्वे किमान निर्बंध म्हणून तत्कालिक प्रभावाने अंमलात येतील.

२. इमिग्रेशनचे डीसीपी तसेच एफ आर आर ओ यांना असे निर्देशित करण्यात आले आहे की, त्यांनी विमानतळावर आंतरराष्ट्रीय विमानाद्वारे येणाऱ्या सर्व प्रवाशांना त्यांनी मागील पंधरा दिवसात ज्या ज्या देशांना भेट दिलेली आहे, त्यांची सविस्तर माहिती देणे बंधनकारक करावे. मुंबई आंतरराष्ट्रीय विमानतळ लिमिटेड (एम आय ए एल) ला ही असे निर्देशित करण्यात आले आहे की, त्यांनी मागील पंधरा दिवसात हवाई प्रवास करणाऱ्या प्रवाशांची माहिती सर्व एअरलाइन्सना ही द्यावी जेणेकरून या प्रवाशांच्या यात्रेसंबंधी माहितीची पडताळणी करणे सोपे होईल. प्रवाशांनी जर चुकीची माहिती दिली तर आपत्ती व्यवस्थापन कायदा 2005 च्या विविध कलमांखाली त्यांच्याविरोधात कारवाई केली जाऊ शकते.

३. भारत सरकारने घोषित केलेल्या ‘कोरोना संक्रमणाचा सर्वाधिक धोका असलेले देश’ या राष्ट्रातून येणाऱ्या आंतरराष्ट्रीय प्रवाशांना प्राधान्य क्रमाने वेगळा काउंटर बनवून एम आय ए एल आणि विमानतळ प्राधिकरण यांनी त्यांची पडताळणी करावी. अशा सर्व प्रवाशांना सात दिवसांकरिता संस्थात्मक विलगीकरण करणे आवश्यक असेल. त्याच प्रमाणे दुसऱ्या, चौथ्या आणि सातव्या दिवशी त्यांचे आर टी पी सी आर चाचण्याही केल्या जातील. कोणत्याही चाचणीत ते पॉझिटिव आढळल्यास त्यांना इस्पितळात दाखल करण्यात येईल आणि जर चाचण्या निगेटीव्ह आल्या तर अशा प्रवाशांना सात दिवस गृह विलगीकरणात राहावे लागेल.

४. धोकादायक नसलेल्या इतर देशातून येणाऱ्या प्रवाशांसाठी आर टी पी सी आर चाचणी विमानतळावर उतरल्यावर करणे बंधनकारक असेल आणि चाचणी अहवाल निगेटिव्ह असल्यासही त्यांना 14 दिवस गृह विलगीकरणात राहावे लागेल. जर या प्रवाशांपैकी कोणी पॉझिटिव्ह असेल तर त्यांना इस्पितळात भरती केले जाईल.

५. कंनेक्टींग फ्लाईट असलेल्या कोणत्याही आंतरराष्ट्रीय यात्रेकरूला भारतातल्या कोणत्याही विमानतळावर जायचं असेल तर त्यांना महाराष्ट्रामध्ये विमानतळावर पहिल्यांदा आल्या आल्या आर टी पी सी आर चाचणी करावी लागेल आणि निगेटिव्ह अहवाल आल्यास त्यांना कनेक्टिंग विमानांमध्ये बसण्याची परवानगी देण्यात येईल. अशा प्रवाशांची माहिती ते ज्या ठिकाणी उतरणार असतील तिथल्या गंतव्य विमानतळाला देण्यात येईल जेणेकरून येथील विमानतळ या यात्रेकरूंसाठी वेगळी व्यवस्था करू शकतील. जर असे यात्रेकरू महाराष्ट्रामध्ये विमानतळावर कनेक्टींग फ्लाईट घेत असतील तर आंतरराष्ट्रीय विमानाने थेट उतरणाऱ्या प्रवाशांना विलगीकरणासंबंधी उल्लेखित सर्व पथ्य पाळावे लागतील.

६. देशांतर्गत हवाई प्रवासासाठी राज्यामध्ये प्रवास करणाऱ्या सर्व यात्रेकरूंना पूर्णपणे लसीकरण असणे आवश्यक आहे. असे नसेल तर त्यांच्याजवळ आगमनाच्या 48 तासाअगोदरचे आर टी पी सी आर अहवाल असणे बंधनकारक असेल.

७. इतर राज्यातून येणाऱ्या हवाई यात्रेकरूंसाठी आगमनाच्या 48 तासाच्या आतील निगेटिव आर टी पी सी आर चाचणी अहवाल असणे आवश्यक आहे, यात कोणताही अपवाद नसेल.

The post ओमिक्रॉन व्हायरसच्या पार्श्वभूमीवर विमानतळावर आणखी कडक निर्बंध appeared first on थोडक्यात घडामोडी.