पुणे : बाणेर येथील ऋतुरंग पार्क सोसायटीच्या आवारात झाडाच्या फांद्या तोडण्याच्या कामादरम्यान झालेल्या दुर्घटनेत एका मजुराचा मृत्यू झाला. ही घटना २७ जुलै रोजी दुपारी साडेचारच्या सुमारास घडली. या प्रकरणी बाणेर पोलीस ठाण्यात ठेकेदार व सोसायटी पदाधिकाऱ्यांविरुद्ध गुन्हा दाखल करण्यात आला आहे.

या दुर्घटनेत मृत्यू झालेल्या व्यक्तीचे नाव लहू गुलाब क्षीरसागर (वय ६६, रा. इंगवले चौक, पिंपळे निलख) असे आहे. याबाबत मृत व्यक्तीचा मुलगा अमोल लहू क्षीरसागर (वय ३४, रा. पिंपळे निलख) यांनी बाणेर पोलीस ठाण्यात फिर्याद दिली आहे. फिर्यादीत नमूद केल्याप्रमाणे, झाडांच्या फांद्या तोडण्याच्या कामासाठी आवश्यक ती सुरक्षा साधने – जसे की सेफ्टी बेल्ट, हेल्मेट, सेफ्टी नेट किंवा इतर संरक्षक साधने मजुराला पुरवण्यात आली नव्हती. यामुळेच ही दुर्घटना घडली, असा ठपका फिर्यादी अमोल क्षीरसागर यांनी ठेवला आहे.

मिळालेल्या माहितीनुसार, ऋतुरंग पार्क या सोसायटीच्या आवारातील झाडांच्या फांद्या मोठ्या प्रमाणावर वाढल्या होत्या. त्यामुळे त्या छाटण्याचे काम ठेकेदार रमेश वामन लोंढे यांच्याकडे सोपवण्यात आले होते. त्यानंतर २७ जुलै रोजी दुपारी साडेचारच्या सुमारास लहू क्षीरसागर झाडावर चढून फांद्या कापण्याचे काम करत होते, यावेळी ते तोल जाऊन खाली कोसळले. या दुर्घटनेत त्यांना गंभीर दुखापत झाली. त्यांना तातडीने जवळच्या खासगी रुग्णालयात दाखल करण्यात आले, मात्र उपचारादरम्यान त्यांचा मृत्यू झाला.

या प्रकरणात ठेकेदार रमेश लोंढे, सोसायटीचे चेअरमन श्रीकृष्ण सराफ आणि सेक्रेटरी श्रीकृष्ण बिडवे यांच्याविरुद्ध आयपीसी कलम ३०४(अ) (दुर्बळ निष्काळजीपणामुळे मृत्यू), ३३७ व ३३८ नुसार गुन्हा दाखल करण्यात आला आहे. दुर्घटनेनंतर बाणेर पोलीस ठाण्याचे वरिष्ठ पोलीस निरीक्षक चंद्रशेखर सावंत यांनी घटनास्थळी भेट देऊन पाहणी केली. सदर प्रकरणाचा तपास सहायक पोलीस निरीक्षक थिटे करत आहेत.

झाडांच्या फांद्या तोडण्यासाठी पुणे महापालिकेची परवानगी घेणे आवश्यक असते. या प्रकरणात सदर कामासाठी आवश्यक ती अधिकृत परवानगी सोसायटी किंवा ठेकेदाराने घेतली होती का? याबाबत विचारणा करण्यात आली असता, “सदर बाब तपासात आहे. त्याची चौकशी केली जात आहे आणि शहानिशा करण्यात येईल,” अशी माहिती वरिष्ठ निरीक्षक चंद्रशेखर सावंत यांनी दिली.

The post झाडाच्या फांद्या तोडताना तोल जाऊन मजुराचा मृत्यू; ठेकेदार व सोसायटी पदाधिकाऱ्यांविरुद्ध गुन्हा दाखल appeared first on थोडक्यात घडामोडी.