नागपूर : प्रसिद्ध संगीतकार राम-लक्ष्मण जोडीमधील लक्ष्मण यांचे नागपूर येथे निधन झाले. ते अनेक दिवसांपासून आजारी होते. शुक्रवारी मध्यरात्री एक वाजताच्या सुमारास त्यांनी अखेरचा श्वास घेतला.

संगीत क्षेत्रामध्ये दिलेल्या भरीव योगदानाबद्दल राम लक्ष्मण यांना अनेक पुरस्काराने सन्मानित करण्यात आले होते. त्यामध्ये ज्येष्ठ गायिका लता मंगेशकर यांच्या नावाने दिल्या जाणाऱ्या पुरस्काराचाही समावेश आहे.

लक्ष्मण यांचे खरे नाव विजय काशीनाथ पाटील आहे. ते विशीमध्ये नागपूरहून घर सोडून मुंबईला आले. मुंबईत आल्यानंतर त्यांची ओळख सुरेंद्र हेंद्रेंशी झाली. ते बासरी वाजवत. एका कार्यक्रमात दादा कोंडके यांनी विजय पाटील आणि सुरेंद्र हेंद्रेंना आपल्या पुढच्या सिनेमाला संगीत देण्याची ऑफर दिली. तसेच दादांनी या जोडगोळीचे नामकरण राम-लक्ष्मण असे करून टाकले. नंतर सुरेंद्र हेंद्रे यांचे किडनीच्या आजाराने निधन झाले. पण विजय पाटील यांना लक्ष्मण नावाने संगीत देणे योग्य वाटले नाही. त्यानंतर त्यांनी राम लक्ष्मण याच नावाने अनेक सिनेमांना संगीत दिले.

‘पांडू हवालदार’, ‘तुमचं आमचं जमलं’, ‘राम राम गंगाराम’, ‘बोट लावीन तिथं गुदगुल्या’, ‘आली अंगावर’ असे एकाहून एक मराठी सिनेमे आणि त्यातील अप्रतिम गाणी त्यांनी संगीतबद्ध केली. फक्त मराठीतच नाही तर हिंदीतही त्यांनी एकाहून एक सुपरहिट गाणी दिली. ‘राजश्री प्रॉडक्शन’ चा सिनेमा म्हटला की राम लक्ष्मण यांचे संगीत हे समीकरण रुढच झाले होते. आणि ते यशस्वी देखील ठरले होते. ‘साँच को आँच नहीं’, ‘तराना’, ‘मैने प्यार किया’, ‘हम आपके है कौन’, ‘हम साथ साथ है’ या सिनेमांना त्यांनी संगीत दिले.

The post दुःखद : प्रसिद्ध राम-लक्ष्मण जोडीमधील संगीतकार लक्ष्मण यांचे निधन appeared first on थोडक्यात घडामोडी.