पुणे : पिंपरी-चिंचवड पोलिसांनी २६ नोव्हेंबर रोजी धाराशिव जिल्ह्यातील ढोकी येथे एका २६ वर्षीय महिलेची हत्या करून तिचा मृतदेह जाळल्याप्रकरणी थेरगाव येथील अनिकेत कांबळे (वय ३३) या कॅब चालकाला अटक केली आहे. वाकड येथील पीडित महिला आरोपीवर लग्नासाठी दबाव टाकत होती. या कारणावरून झालेल्या वादातून हा खून झाल्याचा प्राथमिक निष्कर्ष पोलिसांनी व्यक्त केला आहे.

वरिष्ठ निरीक्षक शत्रुघ्न माळी यांच्या मार्गदर्शनाखालील वाकड पोलिसांच्या पथकाने कांबळेला थेरगाव परिसरातून ताब्यात घेतले व पुढील तपासासाठी ढोकी पोलिसांकडे सुपूर्द केले.

मिळालेल्या माहितीनुसार, पीडित महिला घरी परतली नसल्याने तिच्या नातेवाईकांनी २६ नोव्हेंबर रोजी ती बेपत्ता झाल्याची तक्रार वाकड पोलीस ठाण्यात दाखल केली होती. यानंतर एपीआय अंबरीश देशमुख यांच्या नेतृत्वाखालील पथकाने सीसीटीव्ही फुटेज तपासले. त्यात ही महिला मुलाच्या शाळेत जाताना दिसत होती. फुटेजमध्ये ती शाळेच्या आवारात प्रवेश करण्यापूर्वी दोन वेळा मागे वळून पाहताना, तसेच परिसरात एका कॅबची हालचाल होत असल्याचे स्पष्ट दिसले.

तपासात उघड झाले की पीडित महिला आणि आरोपी दोघेही विवाहित असूनही मागील काही वर्षांपासून त्यांच्यात अनैतिक संबंध होते. “पीडित महिला आरोपीवर लग्नासाठी दबाव आणत होती; मात्र आरोपी हे संबंध संपवू इच्छित होता,” असे निरीक्षक माळी यांनी सांगितले.

घटनाक्रम

• एपीआय देशमुख यांनी दिलेल्या माहितीनुसार, २६ नोव्हेंबर रोजी मुलाला शाळेत सोडल्यानंतर पीडित महिला आरोपीला भेटली. त्याने तिला नवीन कपडे दिले आणि धाराशिवमधील आपल्या मूळ गावी घेऊन जाण्याचे आश्वासन दिले.
• २७ नोव्हेंबरच्या पहाटे ढोकीजवळ दोघांमध्ये वाद झाला. त्यातूनच आरोपीने कॅबमध्ये महिलेचा गळा दाबला आणि लोखंडी पाईपने वार केले. त्यानंतर त्याने महिलेचा मृतदेह पेट्रोल ओतून जाळण्याचा प्रयत्न केला.
• ढोकी पोलिसांना २७ नोव्हेंबर रोजी महिला मृतावस्थेत सापडली. अर्धवट जळालेल्या अवस्थेत तिचा मृतदेह आढळल्यानंतर ताबडतोब खुनाचा गुन्हा दाखल करण्यात आला.

सध्या अनिकेत कांबळे याला पुढील तपासासाठी ढोकी पोलिसांच्या ताब्यात देण्यात आले असून प्रकरणाचा सखोल तपास सुरू आहे.

The post महिलेची हत्या करून मृतदेह जाळल्याप्रकरणी कॅब चालकाला अटक appeared first on थोडक्यात घडामोडी.

अकोला : अकोला शहरात ३० एप्रिल २०२५ रोजी रमेश सातरोटे (वय ५२) यांच्या मृत्यूचा एक धक्कादायक प्रकार समोर आला. सुरुवातीला रमेश यांचा मृत्यू अपघातात झाल्याचा बनाव आई आणि अल्पवयीन मुलाने केला होता, मात्र पोलिसांनी केलेल्या चौकशीत हा प्रकार हत्येचा असल्याचे स्पष्ट झाले आहे.

मिळालेल्या माहितीनुसार, २० एप्रिल २०२५ रोजी रात्री सुमारे १० वाजता रमेश दारूच्या नशेत घरी परतले असता त्यांनी पत्नीला मारहाण केली. यावेळी रोजच्या त्याच्या वर्तनाने मुलाचा संयम सुटला आणि त्याने रागाच्या भरात घरातील फावडा घेऊन वडिलांच्या डोक्यावर प्रहार केला. त्यानंतर आईनेही जोरदार लाथाबुक्क्यांनी मारहाण केली, ज्यामुळे रमेश गंभीर जखमी झाला आणि त्यातच त्याचा मृत्यू झाला. दरम्यान, मृत्यू नंतर आई-मुलाने हा प्रकार अपघात असल्याचा बनाव करत तातडीने अंत्यसंस्कार करण्याचा प्रयत्न केला. मात्र पोलिसांनी शवविच्छेदनासाठी मृतदेह ताब्यात घेतल्यावर सत्य समोर आले.

पत्नीने सुरुवातीला शवविच्छेदनास विरोध दर्शवला होता. तेव्हा पोलिसांना संशय आला आणि पोलिसांनी मृतदेह ताब्यात घेऊन शवविच्छेदनाकरता नेला. शवविच्छेदन अहवालातून शरीरावर गंभीर जखमा आणि मारहाणीचे पुरावे आढळले. दरम्यान, वैद्यकीय अहवाल व पोलिस तपासाअंती सदर घटना ही आकस्मिक मृत्यू नसून खून झाल्याचे 26 दिवसांनंतर समोर आले. पोलिसांना सुरुवातीपासूनच मृत रमेशच्या पत्नीवर संशय होता. पोलिसी खाक्या दाखवल्यानंतर त्यांनी रमेशची हत्या केल्याची कबुली दिली. पोलिसांनी खोलात जाऊन तपास करून सबळ पुरावे प्राप्त केले. मृतकाची पत्नी शीला तसेच तिचा लहान मुलगा यांच्याविरुध्द पुरावे मिळाले. त्यानंतर पोलिसांनी दोघांना बेड्या ठोकल्या. मारेकरी मुलगा अल्पवयीन असल्याने त्याला बाल सुधारगृहात दाखल करण्यात आले आहे. पत्नी शिला हिला अकोला जिल्हा न्यायालयासमोर हजर करण्यात येणार असून, पोलिस तिची कोठडी मागणार आहेत.

जुने शहर पोलीस ठाण्याचे ठाणेदार नितीन लेव्हारकर आणि त्यांच्या पथकाने पोलीस अधीक्षक अर्चित चांडक यांच्या मार्गदर्शनाखाली आरोपींना अटक केली असून, बीएनएस कलम १०३ (१), ३(५) व २३८ अन्वये हत्येचा गुन्हा नोंदवण्यात आला आहे. हा प्रकार उघडकीस येताच संपूर्ण अकोला शहरात मोठा खळबळ उडाली. सध्या या प्रकरणाची कसून चौकशी सुरू आहे.

The post धक्कादायक! अल्पवयीन मुलाने आईच्या मदतीने केली वडिलांची हत्या appeared first on थोडक्यात घडामोडी.

हरियाणा : हरियाणाच्या रोहतक जिल्ह्यात काँग्रेस पार्टीच्या नेत्या हिमानी नरवाल यांच्या हत्येच्या प्रकरणात एक आरोपी सचिन कानोडा याला अटक करण्यात आली आहे. आरोपीने गुन्हा कबूल केला असून, त्याने सांगितले की हिमानीने त्याच्यासोबत शारीरिक संबंध ठेवलेले व्हिडीओ बनवून त्याला ब्लॅकमेल केले आणि त्याच्यावर पैशांची मागणी केली. त्यानंतर, त्याने सततच्या ब्लॅकमेलिंगला कंटाळून हिमानीची हत्या केली.

सचिन आणि हिमानी यांची मैत्री एक वर्षापूर्वी सोशल मीडियावर झाली होती. सचिनने पोलिसांना दिलेल्या आपल्या जबाबात म्हटले की, हिमानीने त्याला तिच्या घरी बोलावले, तिथे दोघांनी शारीरिक संबंध ठेवले. मात्र, हिमानीने या सर्वाचा व्हिडीओ तयार केला आणि त्याच व्हिडीओच्या आधारे ती सचिनला ब्लॅकमेल करू लागली. सचिनकडून लाखो रुपये वसूल केल्यानंतरही ब्लॅकमेलिंग सुरूच होते. हिमानीने आणखी पैसे मागितल्यामुळे सचिनने अखेर तिची हत्या केली.

हत्या आणि मृतदेहाची विल्हेवाट:
हिमानीने सचिनला आणखी पैसे मागण्यासाठी घरी बोलावलं. सचिनने तिला समजवण्याचा प्रयत्न केला, पण ती अजूनही पैशांची मागणी करत होती. त्यानंतर, सचिनने मोबाइल चार्जरच्या तारेने हिमानीचा गळा दाबून तिची हत्या केली. हत्या केल्यानंतर, तो तिचा मृतदेह घरी तसाच सोडून आपल्या दुकानात गेला. नंतर सचिन हिमानीच्या मृतदेहाची विल्हेवाट लावण्यासाठी पुन्हा तिच्या घरी परतला, मृतदेह सुटकेसमध्ये भरला आणि रिक्षाने, नंतर बसने मृतदेह सांपला स्टँडपर्यंत आणला. तिथे सुटकेस सोडून तो पळून गेला. काही तासांनी पोलिसांना एका बेवारस सुटकेसबद्दल माहिती मिळाली, ज्यात हिमानीचा मृतदेह आढळला.

धक्कादायक! काँग्रेस कार्यकर्त्या हिमानी नरवाल यांचा मृतदेह सूटकेसमध्ये आढळला, पक्षाकडून उच्चस्तरीय चौकशीची मागणी

दरम्यान, पोलिसांनी तात्काळ तपास सुरू केला आणि आरोपी सचिनला अटक केली. सचिनने गुन्हा कबूल केला आहे, परंतु पोलिसांनी अजून अधिकृतपणे काहीही सांगितलेलं नाही. तपास सुरू असून, अधिक धक्कादायक पुरावे समोर येण्याची शक्यता आहे. सचिनच्या वैयक्तिक जीवनाबद्दल देखील माहिती समोर आली आहे. तो विवाहित असून त्याला दोन मुले आहेत. या प्रकरणामुळे हरियाणामधील राजकीय वातावरण तापले आहे. हिमानीच्या कुटुंबीयांनी आरोपीला फाशीची शिक्षा देण्याची मागणी केली आहे.

The post हिमानी नरवाल हत्येचे गूढ उकलले, आरोपीचा धक्कादायक खुलासा, हिमानी शारीरिक संबंधाचा व्हिडीओ बनवून करत होती ब्लॅकमेल, अखेर… appeared first on थोडक्यात घडामोडी.

नागपूर : बीडमधील मस्साजोग येथील सरपंच संतोष देशमुख यांच्या हत्या प्रकरणाचे पडसाद नागपुरातील हिवाळी अधिवेशनातही उमटले. विधानपरिषदेचे विरोधीपक्ष नेते अंबादास दानवे यांनी हा मुद्दा विधिमंडळात उपस्थित करताना “राष्ट्रवादी काँग्रेस अजितदादा गटाचा तालुका अध्यक्ष या हत्येत सहभागी आहे” असा थेट आरोप केला. तसेच राष्ट्रवादीशी संबंधित बीड जिल्ह्यातील मंत्रीही संपर्कात आहेत, असेही दानवे म्हणाले. त्यानंतर मुख्यमंत्री देवेंद्र फडणवीस यांनी आरोपींना अटक करण्याचं आश्वासन देत, कुठल्याही मंत्र्याकडे बोट न दाखवण्याचं आवाहन केलं.

अंबादास दानवे म्हणाले कि, मस्साजोग येथील सरपंचाला ज्या पद्धतीने मारहाण झाली, ती पाहिली तर हृदयालाही पीळ येईल. यात सहा आरोपी आहेत, दुर्दैवाने सांगावं लागेल की राजकीय पक्षाशी संबंधित आहेत, सहा जणांवर गुन्हा दाखल झाला आहे. राष्ट्रवादी काँग्रेस अजितदादा गटाचा तालुका अध्यक्षही यात सहभागी आहे, तीनच आरोपी पकडले आहेत, तिघे फरार आहेत.

दानवे यांनी इतर काही महत्त्वाचे मुद्दे उपस्थित केले. गुन्हा घडल्यानंतर ‘बाप तो बाप रहेगा’ असं पोस्टर पोलीस स्टेशनसमोर लावलं गेलं. गुन्हेगार जर खून करुन असं म्हणत असेल, तर त्यांचे सीडीआर तपासावेत. कोणी कोणी यांना फोन केला, कोणकोणत्या राजकीय पक्षांशी ते संबंधित आहेत. दानवे यांनी आरोप केला की, बीड जिल्ह्यातील एक मंत्री राष्ट्रवादी काँग्रेसशी संबंधित आहे आणि आरोपींना फोन करून मदत केल्याचे लोक सांगतात. त्यांनी मागणी केली की आरोपींवर त्वरित कारवाई केली जावी.

मुख्यमंत्री देवेंद्र फडणवीस यांनी माहिती दिली कि, बीड जिल्ह्यातील मस्साजोगला घडलेली घटना अतिशय गंभीर आहे. एका तरुण सरपंचाचा निर्घृण प्रकारे खून करण्यात आला. तीन आरोपींना अटक केलेली आहे, काही अद्याप फरार असले, तरी त्यांना शोधून काढून निश्चितच अटक करु. मी विरोधीपक्ष नेत्यांना सांगू इच्छितो, की आरोपी कुठल्या पक्षाचा आहे, जातीचा किंवा धर्माचा आहे, कोणती भाषा बोलतो, कोणाशी संबंधित आहे, असा विचार न करता, जो खरोखर घटनेत सहभागी असेल, त्यावर कारवाई केली जाईल, यासाठी ही केस सीआयडीला ट्रान्सफर केली आहे. एसआयटी चौकशी करायला सांगितलं आहे.

मुख्यमंत्री फडणवीस पुढे म्हणाले कि, माझी विनंती आहे, हे सर्वोच्च सभागृह आहे. इथे जेव्हा आपण बोलतो, तेव्हा ते १४ कोटी जनतेपर्यंत जातं. ज्यावेळी आपण मंत्र्यांच्या जवळचे वगैरे बोलतो, त्यावेळी विनाकारण ज्यांचा सहभाग नसतो, त्यांच्याकडे अंगुलीनिर्देश होतो, आरोपीला वाचवा असा सरकारवर कोणाचाही दबाव नाही. जे आरोपी निष्पन्न होतील, आम्ही तांत्रिक आणि एआयच्या माध्यमातून कनेक्टिव्हिटी शोधून काढतो. मी आश्वस्त करु इच्छितो, की कुणीही गुन्हेगार असो, त्यांना सोडणार नाही. ज्या पोलिसांनी जाणीवपूर्वक यात कामचुकारपणा केला, त्यांच्यावर कारवाई झाली आहे, अजून कोणी सहभागी सापडला तर कारवाई केली जाईल, असं आश्वासन देवेंद्र फडणवीस यांनी दिलं.

The post संतोष देशमुख हत्या प्रकरणाचे विधान परिषदेत पडसाद, दानवेंच्या गंभीर आरोपांवर फडणवीसांचं उत्तर appeared first on थोडक्यात घडामोडी.

पुणे : पुण्यात किरकोळ कारणावरून एका व्यक्तीने आपल्या पत्नीची हत्या केल्याची खळबळजनक घटना घडली आहे. रात्रभर टीव्ही चालूच राहिल्यामुळे पतीने रागाच्या भरात पत्नीची गळा दाबून हत्या केली. या महिलेच्या वडिलांनी तक्रार केल्यानंतर आरोपी पतीला पोलिसांनी अटक केली असून त्याची चौकशी सुरू आहे.

पोलिसांनी दिलेल्या माहितीनुसार, मावळमधील चांदीवाडीमध्ये ही घटना घडली असून योगेश जाधव नावाच्या 26 वर्षीय व्यक्तीने आपल्या 20 वर्षीय पत्नीची हत्या केली. या जोडप्याला 7 महिन्यांपूर्वीच एक मुलगी झालेली आहे. मुलगी झाल्याचा राग या व्यक्तीच्या मनात होता. मुलगी झाल्यापासून तो पत्नीचा सातत्याने शारीरिक आणि मानसिक छळ करत होता. त्यातच रात्रभर टीव्ही चालू राहिल्यामुळे संतापाच्या भरात त्याने पत्नीची गळा दाबून हत्या केली. काही ग्रामस्थांनी तिच्या मृत्यूची माहिती पोलिसांना दिल्यानंतर शनिवारी सकाळी ही घटना उघडकीस आली.

पोलिसांनी मृत महिलेची ओळख चांगुणा जाधव अशी केली असून तिचा पती योगेश जाधव जो व्यवसायाने ट्रक चालक आहे, त्याला अटक करण्यात आली आहे. चांगुनाच्या वडिलांच्या तक्रारीच्या आधारे तळेगाव दाभाडे पोलीस स्टेशनमध्ये गुन्हा नोंदवण्यात आला आहे. पोलिसांनी सांगितले की, पत्नीची हत्या केल्यानंतर आरोपी पती घटनास्थळावरून पळून गेला होता. मात्र, पोलिसांनी त्याचा फोन ट्रॅक केला आणि त्याचा शोध घेतला. पोलिसांनी आरोपी पतीला अटक केली असून सध्या पोलीस त्याची चौकशी करत आहेत.

The post पुण्यात खळबळ! रात्रभर टीव्ही चालू राहिल्याने केली पत्नीची हत्या… appeared first on थोडक्यात घडामोडी.

अमरावती : बिहारच्या एका व्यापाऱ्याची दगडाने ठेचून निर्घृण हत्या करण्यात आली आहे. ही घटना मंगळवारी उघडकीस आल्यानंतर एकच खळबळ उडाली. स्थानिक गजानन साखरवाडे यांच्या शेतातील विहिरीच्या जवळ शेतमालकाला हा मृतदेह आढळून आला. २२ ऑगस्टच्या सायंकाळी ही हत्या झाल्याचा अंदाज वर्तवण्यात येत आहे. या घटनेतील मुख्य आरोपी अद्याप फरार आहे.

राकेशकुमार रामदास पासवान रा. लालगंज, जिल्हा पाटणा (बिहार) असे मृत व्यक्तीचे नाव असून तो गुजरात येथे कुटुंबियांसह राहत असल्याची माहिती मिळाली आहे. नांदगाव पेठ पोलिसांना मंगळवारी सकाळी अकराच्या सुमारास माहिती मिळाली की एक बेवारस कार दोन दिवसांपासून चिखलात अडकून पडलेली आहे. त्यानंतर पोलिसांनी तात्काळ घटनास्थळी धाव घेतली आणि या कारची तपासणी केली. त्यांना तेथून जवळच असलेल्या साखरवाडे यांच्या विहिरीजवळ राकेश कुमारचा मृतदेह कुजलेल्या अवस्थेत आढळला.

व्यापारी राकेशकुमार यांच्या डोक्यात मोठा दगड घालून त्यांची हत्या करण्यात आली. हत्येनंतर त्यांचा मृतदेह साखरवाडे यांच्या शेतातील विहिरीत ढकलण्याचा प्रयत्न करण्यात आला. परंतु आरोपीला मृतदेह विहिरीत ढकलता न आल्यामुळे त्याने तो तिथेच सोडला आणि पसार झाला. नांदगाव पेठ पोलिसांनी घटनास्थळाचा पंचनामा केला. त्यानंतर पुढील तपास पोलीस निरीक्षक प्रविण काळे यांच्या मार्गदर्शनाखाली केला जात आहे.

The post व्यापाऱ्याची डोक्यात दगड घालून निर्घृण हत्या appeared first on थोडक्यात घडामोडी.

दिल्ली : छत्रसाल स्टेडियममधील ज्युनियर सुवर्णपदक विजेता कुस्तीपटू सागर राणा याच्या हत्येप्रकरणी फरार असलेल्या ऑलिम्पिक सुवर्ण पदकविजेता सुशील कुमार याला दिल्ली पोलिसांनी मुंडका परिसरातूनच अटक केली आहे. सुशीलसह त्याचा साथीदार अजय यालाही अटक करण्यात आली आहे. पोलिसांनी सुशीलवर एक लाख रुपये आणि अजयवर 50 हजार रुपयांचे बक्षीस जाहीर केले होते. त्याचवेळी रोहिणी कोर्टाने मंगळवारी सुशीलचा जामीन अर्ज फेटाळला होता.

काय आहे संपूर्ण प्रकरण?

पोलिसांनी दिलेल्या माहितीनुसार, 5 मे रोजी छत्रसाल स्टेडियमच्या पार्किंगमध्ये कुस्तीपटूंच्या दोन गटात जोरदार हाणामारी झाली होती. या दरम्यान गोळीबारही झाला. यामध्ये 5 कुस्तीपटू जखमी झाले. त्यात सागर (23), सोनू (37), अमित कुमार (27) आणि इतर 2 कुस्तीपटूंचा समावेश आहे. मात्र, सागरचा रुग्णालयात उपचार सुरू असताना मृत्यू झाला. तो दिल्ली पोलिसांमधील एका हेड कॉन्स्टेबलचा मुलगा होता. संपत्तीच्या वादातून ही हाणामारी झाल्याचे सांगण्यात येत आहे. सागर आणि त्याचे मित्र राहत असलेले घर खाली करण्यासाठी सुशील त्यांच्यावर दबाव टाकत होता.

दरम्यान, पोलिसांनी घटनास्थळावरून लोडेड डबल बॅरल बंदूक आणि 3 जिवंत काडतुसे याशिवाय 5 वाहने जप्त केली. दिल्ली पोलिसांनी सांगितले की, सुशील कुमारची भूमिका तपासली जात आहे, कारण त्याच्यावर गंभीर आरोप ठेवण्यात आले आहेत. पोलिसांनी सुशील व इतर आरोपींच्या शोधात अनेक ठिकाणी छापे टाकले. लुकआउट नोटीस बजावल्यानंतरही सुशील या प्रकरणात पोलिसांना पाठिंबा देण्यासाठी पुढे आला नाही. त्यामुळे त्याच्याविरूद्ध अजामीनपात्र वॉरंट जारी करण्यात आले. इतकेच नाही तर पोलिसांनी फरार सुशीलच्या अटकेसाठी मदत करणाऱ्यांना 1 लाख रुपयांचे बक्षीस तर त्याचा पीए अजयला अटक करणार्‍यास 50 हजार रुपयांचं बक्षीस जाहीर केलं होतं. याशिवाय अन्य आरोपींविरोधात अजामीनपात्र वॉरंटही जारी करण्यात आले आहेत.

दरम्यान, या घटनेनंतर दुसर्‍याच दिवशी सुशीलने या संदर्भात स्पष्टीकरण दिले होते. तो म्हणाला होता की सागर आमचा सहकारी कुस्तीपटू नाही. आम्हीच पोलिस अधिकाऱ्यांना माहिती दिली होती की काही अज्ञात लोक आमच्या परिसरात येऊन भांडत आहेत. सुशीलने 2012 च्या लंडन ऑलिम्पिकमध्ये रौप्यपदक आणि बीजिंग ऑलिम्पिकमध्ये कांस्यपदक जिंकलेले आहे.

The post ब्रेकिंग : छत्रसाल स्टेडियम हत्या प्रकरणात कुस्तीपटू सुशील कुमारला अटक appeared first on थोडक्यात घडामोडी.