मुंबई : मुंबई–पुणे द्रुतगती मार्ग हा महाराष्ट्राच्या प्रगतीचा कणा मानला जातो. राज्यातील औद्योगिक, आर्थिक आणि सामाजिक घडामोडींना गती देणारा हा मार्ग आता ‘मिसिंग लिंक’ प्रकल्पामुळे नव्या उंचीवर पोहोचत आहे. केवळ वाहतूक सुलभ करण्यापुरता मर्यादित न राहता, हा प्रकल्प राज्याच्या व्यापक विकासाच्या दृष्टीने अत्यंत महत्त्वाचा ठरत आहे. राज्यातील सर्वाधिक वर्दळीचा हा महामार्ग दररोज हजारो वाहनांची वाहतूक सांभाळतो. मात्र, बोरघाट परिसरातील तीव्र वळणे, चढ-उतार, पावसाळ्यातील दरडी कोसळण्याचे प्रकार आणि त्यामुळे निर्माण होणारी वाहतूक कोंडी ही वर्षानुवर्षे मोठी समस्या राहिली. या अडचणींवर कायमस्वरूपी उपाय म्हणून ‘मिसिंग लिंक’ प्रकल्पाची संकल्पना पुढे आली आणि २९ ऑगस्ट २०१८ रोजी या महत्त्वाकांक्षी योजनेला शासनाची मंजुरी मिळाली. सुमारे ६६९५ कोटी रुपयांचा हा प्रकल्प भौतिकदृष्ट्या पूर्ण झाला आहे.

पार्श्वभूमी : समस्येतून उपायाकडे

अडोशी बोगदा ते खंडाळा एक्झिट हा मार्ग सध्या सहा पदरी असला तरी येथे दहा पदरी वाहतूक एकत्र येते. घाटातील अवघड भौगोलिक परिस्थितीमुळे अनेकदा वाहतुकीचा वेग मंदावतो. विशेषतः पावसाळ्यात दरडी कोसळण्याचा धोका वाढतो आणि काही लेन बंद कराव्या लागतात. यामुळे वेळेचा अपव्यय, अपघातांची शक्यता आणि आर्थिक नुकसान वाढते. या पार्श्वभूमीवर ‘मिसिंग लिंक’ प्रकल्प हा एक पर्यायी, अधिक सुरक्षित आणि सरळ मार्ग म्हणून उभारण्यात आला आहे.

प्रकल्पाचे स्वरूप : अंतर कमी, वेळ वाचणार

या प्रकल्पाअंतर्गत खोपोली ते कुसगाव दरम्यान नवीन सरळ मार्ग तयार करण्यात आला आहे. एकूण १९.८४ कि.मी. लांबीच्या या मार्गात ५.८६ कि.मी. अंतरावर जुन्या रस्त्याचे सहा पदरीवरून आठ पदरीकरण करण्यात आले आहे, तर उर्वरित १३.३ कि.मी. पूर्णपणे नवीन मार्ग आहे. या नव्या मार्गामुळे प्रवासाचे अंतर सुमारे ६ किमीने कमी होणार असून, २० ते ३० मिनिटांचा वेळ वाचणार आहे. यामुळे प्रवाशांचा अनुभव अधिक जलद आणि सुलभ होणार आहे.

अभियांत्रिकीचा अद्भुत नमुना

गिनिज बुक ऑफ वर्ल्ड रेकॉर्डमध्ये जगातील सर्वात रुंद बोगदा म्हणून नोंद

मिसिंग लिंकमुळे भारतातील पहिला एक्सप्रेस-वे आता अधिक वेगवान आणि सुरक्षित होत आहे. मिसिंग लिंकसह वेळ आणि इंधन वाचविणारा सुरक्षित आणि वेगवान प्रवासाचा अनुभव मिळणार आहे. मिसिंग लिंक जगातील सर्वात रुंद बोगदा (२३.५ मीटर) असून लोणावळा तलावाच्या १८० मीटर खालून खोदलेला बोगदा आहे. या ठिकाणी ६५० मीटर केबल-स्टेड ब्रिजसह भारतातील सर्वात उंच सत्यावरील पूल पायलॉन उंची (१८२मीटर) असून गिनिज बुक ऑफ वर्ल्ड रेकॉर्डमध्ये जगातील सर्वांत रुंद बोगदा म्हणून नोंद झालेली आहे.

हा ‘मिसिंग लिंक’ प्रकल्प मुंबई–पुणे द्रुतगती मार्गावरील वाहतूक कोंडी कमी करण्यासाठी आणि प्रवासाचा कालावधी लक्षणीयरित्या घटवण्यासाठी महत्त्वपूर्ण ठरणार आहे. अत्याधुनिक अभियांत्रिकी तंत्रज्ञानाचा वापर करून उभारण्यात आलेल्या या प्रकल्पामुळे सुरक्षिततेच्या दृष्टीनेही मोठी सुधारणा होणार आहे.

मिसिंग लिंक’ प्रकल्प हा आधुनिक अभियांत्रिकीचा उत्कृष्ट नमुना मानला जातो. या प्रकल्पात दोन समांतर बोगदे (१.६४ कि.मी. आणि ८.९२ कि.मी.), भव्य व्हायाडक्ट, यांचा समावेश असून, वाहनांचा वेग १२० कि.मी. / तास ठेवण्याची सुविधा या मार्गावर उपलब्ध आहे.सुरक्षिततेसाठी अत्याधुनिक तंत्रज्ञान

या प्रकल्पात प्रवाशांच्या सुरक्षिततेला सर्वोच्च प्राधान्य देण्यात आले आहे. बोगद्यांमध्ये वॉटर मिस्ट अग्निशमन प्रणाली, स्कॅडा आधारित नियंत्रण, एएनपीआर कॅमेरे, व्हाइस इव्हॅक्यूएशन सिस्टिम, आधुनिक वायुवीजन व्यवस्था आणि एसओएस सुविधा बसवण्यात आल्या आहेत. या सर्व प्रणालींमुळे अपघात किंवा आपत्कालीन परिस्थितीत त्वरित प्रतिसाद देणे शक्य होणार आहे.

मिसिंग लिंकची व्यापक उपयुक्तता

‘मिसिंग लिंक’ प्रकल्पामुळे अनेक महत्त्वपूर्ण लाभ अपेक्षित आहेत. प्रवासाचा वेळ सुमारे ३० मिनिटांनी कमी होणार असून, घाटातील धोकादायक वळणे टाळल्याने अपघातांचे प्रमाण घटेल. वाहतूक कोंडी कमी होऊन प्रवास अधिक सुरळीत होईल. इंधनाच्या वापरात घट होऊन दररोज सुमारे १ कोटी रुपयांची बचत होईल, अशी अपेक्षा आहे. एकूणच, हा प्रकल्प प्रवास अधिक सुरक्षित, जलद आणि किफायतशीर बनवणार आहे.

कठीण परिस्थितीतही यश

या प्रकल्पाच्या अंमलबजावणीत अनेक तांत्रिक आणि नैसर्गिक आव्हानांचा सामना करावा लागला. डोंगराळ भागात बोगदे खोदणे, घनदाट वनक्षेत्रात काम करणे, मुसळधार पावसामुळे होणारे अडथळे, तसेच बोगद्यांमध्ये ऑक्सिजन पुरवठा आणि सुरक्षा व्यवस्थापन ही मोठी आव्हाने होती. याशिवाय कोविड-१९ महामारीमुळे आणि काही तांत्रिक चाचण्यांसाठी परदेशी संस्थांवर अवलंबून राहावे लागले मात्र या सर्व अडचणींवर मात करत प्रकल्प यशयशस्वीरित्या पूर्ण करण्यात आला.

विकासाच्या दिशेने मोठे पाऊल

मुंबई–पुणे ‘मिसिंग लिंक’ प्रकल्प हा केवळ एक रस्ता नाही, तर आधुनिक तंत्रज्ञान, नियोजन आणि दृष्टीकोन यांचा संगम आहे. या प्रकल्पामुळे केवळ प्रवास सुलभ होणार नाही, तर राज्याच्या आर्थिक आणि औद्योगिक विकासालाही मोठी चालना मिळणार आहे. भविष्यात हा प्रकल्प महाराष्ट्राच्या पायाभूत सुविधांच्या प्रगतीतील एक महत्त्वाचा टप्पा ठरणार आहे. महामार्ग हे कोणत्याही राज्याच्या अर्थव्यवस्थेचे रक्तवाहिनीसारखे असतात. मुंबई आणि पुणे ही दोन प्रमुख आर्थिक केंद्रे जोडणारा हा मार्ग उद्योग, आयटी, उत्पादन क्षेत्र आणि सेवा क्षेत्रासाठी जीवनदायिनी भूमिका बजावतो. ‘मिसिंग लिंक’ प्रकल्पामुळे या दोन शहरांमधील प्रवास अधिक जलद, सुरक्षित आणि कार्यक्षम होणार असल्याने व्यापार आणि गुंतवणुकीला मोठी चालना मिळणार आहे.

दळणवळण सुविधांचा विस्तार

या प्रकल्पामुळे केवळ दोन शहरांमधील अंतर कमी होत नाही, तर संपूर्ण प्रदेशातील दळणवळण सुविधांचा दर्जा उंचावतो. खोपोली, लोणावळा, कुसगाव यांसारख्या परिसरांना अधिक चांगली जोडणी मिळणार आहे. त्यामुळे ग्रामीण आणि अर्धशहरी भागांपर्यंतही विकासाच्या संधी पोहोचतील. आरोग्य, शिक्षण आणि रोजगाराच्या सुविधा अधिक सहज उपलब्ध होतील.

पर्यटन आणि स्थानिक अर्थव्यवस्था

मुंबई–पुणे मार्ग हा पर्यटनासाठीही अत्यंत महत्त्वाचा आहे. लोणावळा, खंडाळा यांसारख्या पर्यटनस्थळांना या मार्गामुळे अधिक वेगाने पोहोचता येईल. परिणामी पर्यटन वाढून स्थानिक व्यवसाय, हॉटेल उद्योग आणि सेवा क्षेत्राला चालना मिळेल. स्थानिक रोजगारनिर्मितीतही वाढ होईल.

शाश्वत आणि संतुलित विकास

वाहतुकीचा प्रवाह सुरळीत झाल्यामुळे वाहनांची गर्दी कमी होईल आणि इंधनाचा वापरही घटेल. यामुळे पर्यावरणावर होणारा ताण कमी होण्यास मदत होईल. नियोजनबद्ध पायाभूत सुविधा विकासामुळे हा प्रकल्प शाश्वत विकासाच्या दिशेने एक महत्त्वाचे पाऊल ठरतो. मुंबई–पुणे ‘मिसिंग लिंक’ प्रकल्प हा केवळ प्रवास सुलभ करणारा रस्ता नसून, राज्याच्या सर्वांगीण विकासाला गती देणारा महामार्ग आहे. आर्थिक वाढ, दळणवळण सुधारणा, सुरक्षितता आणि पर्यावरणपूरक दृष्टिकोन या सर्व बाबींचा समतोल साधत हा प्रकल्प महाराष्ट्राच्या प्रगतीचा नवा अध्याय लिहिणार आहे.

The post मुंबई–पुणे द्रुतगती मार्ग ‘मिसिंग लिंक’ : वेग, सुरक्षितता आणि आधुनिक अभियांत्रिकीचा संगम appeared first on थोडक्यात घडामोडी.

मुंबई : मुंबई पुणे द्रुतगती महामार्गावर बोरघाटात गॅस टँकरच्या अपघातामुळे मोठ्या प्रमाणावर वाहतूक कोंडी होऊन वाहन चालकांना झालेल्या त्रासाची गंभीर दखल उपमुख्यमंत्री एकनाथ शिंदे यांनी घेतली असून या पुढील काळात अशा घटनांची पुनरावृत्ती होणार नाही यासाठी विशेष आपत्कालीन वाहतूक आराखडा मुंबई पुणे द्रुतगती महामार्गासाठी तयार करण्याचे निर्देश एमएसआरडीसी त्याचप्रमाणे पोलिसांना दिले आहेत.

गॅस टँकर उलटल्यामुळे ज्वलनशील प्रोपोलीन गॅसची गळती सुरू झाली होती. या गळतीमुळे धोका आणखी वाढून मोठे नुकसान झाले असते त्यामुळे वाहतुकीचे नियोजन करण्याशिवाय पर्यायच नव्हता. त्यामुळे द्रुतगती महामार्गावरील वाहतूक जुन्या महामार्गाकडे वळवावी लागली. शिवाय एमएसआरडीसी आणि पोलिसांनी अथक २० तास प्रयत्न करून गॅस गळती सुद्धा रोखली आहे असे सांगून उपमुख्यमंत्री म्हणतात की, प्रवाशांना झालेला त्रास दुर्देवी आहे. त्यांना झालेल्या मनस्तापाची पूर्ण कल्पना आहे पण एमएसआरडीसीने सुद्धा तातडीने राष्ट्रीय आपत्ती प्रतिसाद दलाची कुमक मागवली. त्यांनीही प्रयत्न केले. मात्र हे काम खूप आव्हानात्मक होते. जीवितहानी होण्याची शक्यता नाकारता येत नव्हती. त्यामुळे भारत पेट्रोलियम हिंदुस्तान पेट्रोलियम आणि रिलायन्स कंपनीच्या तज्‍ज्ञांना बोलवण्यात आलं. या पथकांनी गॅस गळतीवर नियंत्रण मिळवलं.

दरम्यान प्रवाशांना एमएसआरडीसीकडून मोठ्या प्रमाणावर पिण्याचे पाणी, बिस्किट्स देण्यात आले. सर्व अधिकारी कर्मचारी रस्त्यावर होते. एवढेच नाही तर पथकर वसुली करू नये म्हणून देखील निर्देश मी दिले असल्याचे उपमुख्यमंत्री म्हणाले. वाहतूक व्यवस्था पूर्वपदावर येईपर्यंत या महामार्गावरील टोल वसूली थांबविण्याचे निर्देशही उपमुख्यमंत्र्यांनी दिले आहेत.

मुंबई पुणे मिसिंग लिंकचे काम अंतिम टप्प्यात असून ते तातडीने पूर्ण करून हा टप्पा लवकरात लवकर सुरू करण्याचे निर्देशही त्यांनी विभागाला दिले. ही लिंक सुरू झाल्यानंतर मुंबई पुणे प्रवासातील अंतरही वाचेल त्याचप्रमाणे अशा घटना घडल्यास पर्यायी वाहतुकीचा मार्गही कामाला येईल असे सांगून त्यांनी एमएसआरडीसी त्याचप्रमाणे पोलीस अधिकाऱ्यांशी विस्तृत चर्चाही केली आणि एक आपत्कालीन आराखडा तयार करण्यास सांगितले.

The post मुंबई-पुणे-द्रुतगती महामार्ग वाहतूक कोंडीची उपमुख्यमंत्र्यांकडून गंभीर दखल appeared first on थोडक्यात घडामोडी.

मुंबई : महाराष्ट्र राज्यात रस्ता सुरक्षेसाठी परिवहन विभागामार्फत सातत्याने राबविण्यात येणाऱ्या विविध उपाययोजनांचा सकारात्मक परिणाम दिसून येत असून, नोव्हेंबर २०२५ पर्यंतच्या आकडेवारीनुसार राज्यातील रस्ता अपघातांमधील मृत्यूदरात घट नोंदविण्यात आली आहे.

जानेवारी ते नोव्हेंबर २०२५ या कालावधीत राज्यात एकूण ३३,००२ अपघात झाले असून, त्यामध्ये १४,०६६ अपघाती मृत्यू झाले आहेत. मागील वर्षी याच कालावधीत ३२,७८४ अपघातांत १४,१८५ मृत्यू झाले होते. तुलनात्मक पाहता, अपघातांची संख्या २१८ ने (०.६६ टक्के) वाढली असली तरी अपघाती मृत्यूंची संख्या ११९ ने म्हणजेच ०.८३ टक्क्यांनी घटली आहे. मृत्युदरातील ही घट रस्ता सुरक्षा उपाययोजनांचे यश दाखवते.

दरम्यान, मुंबई–पुणे द्रुतगती मार्गावरही अपघाती मृत्यूंमध्ये मोठी घट नोंदविण्यात आली आहे. जानेवारी ते नोव्हेंबर २०२४ या कालावधीत या मार्गावर ८२ अपघाती मृत्यू झाले होते, तर २०२५ मध्ये ही संख्या ६१ वर आली आहे. म्हणजेच २१ मृत्यूंनी (२६ टक्के) घट झाली आहे. तसेच अपघातांची संख्या ६६ वरून ५४ इतकी कमी झाली असून, त्यामध्ये १८ टक्के घट नोंदविण्यात आली आहे.

रस्ता सुरक्षा उपायांमुळे काही जिल्ह्यांमध्ये मृत्यूंच्या संख्येत विशेष घट दिसून आली आहे. नागपूर शहरात २१ टक्के, पालघरमध्ये २० टक्के, अमरावतीत १७ टक्के, पुण्यात १५ टक्के, धुळ्यात १४ टक्के तर छत्रपती संभाजीनगरमध्ये १२ टक्क्यांनी अपघाती मृत्यू कमी झाले आहेत, असे परिवहन विभागाने कळविले आहे.

राज्यातील रस्ता अपघातांची संख्या सन २०३० पर्यंत ५० टक्क्यांनी कमी करण्याचे उद्दिष्ट परिवहन विभागाने निश्चित केले असून, त्यासाठी भविष्यात रस्ता सुरक्षा उपाययोजना अधिक प्रभावीपणे राबविण्यात येणार आहेत. याचबरोबर, राज्यातील सर्व वाहनचालक व पादचारी नागरिकांनी वाहतुकीचे नियम काटेकोरपणे पाळावेत, असे आवाहनही परिवहन विभागामार्फत करण्यात आले आहे.

The post राज्यात रस्ता अपघातांतील मृत्यूदरात घट; परिवहन विभागाच्या उपाययोजनांना यश appeared first on थोडक्यात घडामोडी.

पुणे : केंद्रीय रस्ते वाहतूक आणि महामार्ग मंत्री नितीन गडकरी यांनी महाराष्ट्रासाठी मोठ्या पायाभूत सुविधा पॅकेजची घोषणा केली असून, त्यामध्ये दुसरा मुंबई–पुणे एक्सप्रेसवे आणि पुणे जिल्ह्यासाठी सुमारे ₹५०,००० कोटींच्या विकास प्रकल्पांचा समावेश आहे.

नागपूर येथे माध्यमांशी बोलताना मंत्री गडकरी यांनी सांगितले की, येणाऱ्या वर्षासाठी राज्यभरात एकूण ₹१.५ लाख कोटींचे रस्ते विकास प्रकल्प मंजूर करण्यात आले आहेत. या प्रकल्पांची अंमलबजावणी पुढील तीन महिन्यांत सुरू होण्याची अपेक्षा आहे.

दुसरा मुंबई–पुणे एक्सप्रेसवे : प्रमुख आकर्षण

या पॅकेजमधील महत्त्वाचा प्रकल्प म्हणजे दुसरा मुंबई–पुणे एक्सप्रेसवे, जो सध्याच्या द्रुतगती मार्गाला समांतर उभारण्यात येणार आहे.

• लांबी : सुमारे १३० किमी
• अंदाजित खर्च : ₹१५,००० कोटी
• मार्ग : जेएनपीए (जवाहरलाल नेहरू पोर्ट अथॉरिटी) जवळील अटल सेतूपासून पुण्यातील शिवरे जंक्शनपर्यंत

हा एक्सप्रेसवे पूर्ण झाल्यानंतर मुंबई–पुणे प्रवासाचा वेळ अवघ्या दीड तासांवर येण्याचा अंदाज आहे. तसेच पुणे–मुंबई–बेंगळुरू प्रवास फक्त साडेपाच तासांत पूर्ण होणार असल्याने पश्चिम आणि दक्षिण भारतातील दळणवळण अधिक गतिमान होणार आहे.

या प्रकल्पाचा पागोटे (जेएनपीए जवळ) ते चौक (पनवेल) दरम्यानचा पहिला टप्पा आधीच मंजूर करण्यात आला आहे.

पुणे–छत्रपती संभाजीनगर ग्रीनफिल्ड एक्सप्रेसवे

गडकरी यांनी पुणे ते छत्रपती संभाजीनगर (पूर्वी औरंगाबाद) जोडणाऱ्या नव्या ग्रीनफिल्ड एक्सप्रेसवेचीही घोषणा केली.

• अंदाजित खर्च : ₹१६,३१८ कोटी
• प्रवास वेळ : केवळ २ तास

या मार्गामुळे छत्रपती संभाजीनगर ते नागपूर प्रवास अडीच ते तीन तासांत शक्य होईल, असा दावा मंत्री गडकरी यांनी केला.

पुणे जिल्ह्यासाठी ₹५०,००० कोटींचे प्रकल्प

राज्यव्यापी पॅकेजमध्ये पुणे जिल्ह्याला सर्वाधिक वाटा देण्यात आला असून, फक्त जिल्ह्यासाठी सुमारे ₹५०,००० कोटींचे प्रकल्प मंजूर झाले आहेत.

तळेगाव–चाकण–शिक्रापूर एलिव्हेटेड कॉरिडॉर

• खर्च : ₹४,२०७ कोटी
• रचना : चार-स्तरीय प्रकल्प

1. जमिनीच्या पातळीवर रस्ता
2. दोन उड्डाणपूल
3. सर्वात वर मेट्रो लाईन

या प्रकल्पाची निविदा प्रक्रिया पूर्ण झाली असून, लवकरच भूमिपूजन होणार आहे.

हडपसर–यवत एलिव्हेटेड रस्ता

हडपसर–यवत एलिव्हेटेड रस्त्यासाठी तपशीलवार प्रकल्प अहवाल (DPR) तयार करण्याचे काम सुरू असून, स्थानिक स्वराज्य संस्थांच्या निवडणुकीनंतर प्रत्यक्ष बांधकामाला सुरुवात होणार आहे.

The post गडकरी यांनी केली दुसऱ्या मुंबई-पुणे एक्सप्रेसवेची घोषणा, पुण्यासाठी ५०,००० कोटींच्या विकास प्रकल्पांचा समावेश appeared first on थोडक्यात घडामोडी.

मुंबई : मुंबई-पुणे एक्सप्रेसवेवर पनवेलजवळ मंगळवारी एक मोठा अपघात घडला, ज्यात अनेक वाहनांची विचित्र टक्कर झाली. यात दोन जण जखमी झाले. हा अपघात खांदेश्वर पोलिस स्टेशनच्या हद्दीत मुंबईकडे जाणाऱ्या लेनमध्ये घडला.

मिळालेल्या माहितीनुसार, एक कंटेनर ट्रकमध्ये बिघाड झाल्याने तो रस्त्यावर उभा होता. ट्रकचे इंजिन बंद पडल्यामुळे, दोन मेकॅनिक त्याची दुरुस्ती करण्यासाठी त्या ट्रकच्या जवळ उभे राहिले होते. या दुरुस्तीच्या कामामुळे, ट्रकच्यापुढे मेकॅनिकची कार देखील थांबलेली होती. दरम्यान, दुरुस्तीचे काम सुरु असताना, मागून एक भरधाव ट्रक आला. ट्रक चालकाला थांबलेला कंटेनर ट्रक दिसला नाही आणि तो थेट त्यावर आदळला. त्याच क्षणी, एक पिकअप टेम्पो देखील मागून आला. चालकाला ट्रक थांबलेल्या स्थितीत दिसला नाही आणि त्यानेदेखील जोरात धडक दिली. पिकअप टेम्पो चालक वेळेत ब्रेक लावू शकला नाही आणि त्याचा अपघात झाला. या धडकांमुळे जड वाहन एक्सप्रेसवेवरील रोलिंग बॅरियरमध्ये ढकलले गेले, ज्यामुळे वाहतूक अधिक विस्कळित झाली.

जखमींना तातडीने जवळच्या रुग्णालयात हलवले
या धडकेत दोन जण जखमी झाले, ज्यात एक मेकॅनिक गंभीरपणे जखमी झाला. त्याच्या डोक्याला गंभीर दुखापत झाली आहे. दुसऱ्या व्यक्तीला देखील दुखापत झाली. अपघातानंतर जखमींना तात्काळ जवळच्या रुग्णालयात हलवले आणि त्यांच्यावर उपचार सुरु करण्यात आले.

या अपघातामुळे मुंबई-पुणे एक्सप्रेसवेवर वाहतूक गंभीरपणे विस्कळित झाली. स्थानिक पोलीस आणि प्रशासनाने त्वरित अपघातस्थळावर पोहोचून वाहतूक सुरळीत करण्यासाठी भूमिका घेतली. अधिकाऱ्यांनी खराब झालेली वाहनं काढण्यासाठी रिकव्हरी क्रेन तैनात केली, ज्यामुळे वाहतूक पुन्हा पूर्ववत होऊ शकली.

प्राथमिक तपासानुसार, या अपघाताचे मुख्य कारण कमी दृश्यमानता आणि अपुरे ब्रेकिंग अंतर असल्याचे सांगितले जात आहे. पोलिस सध्या सीसीटीव्ही फुटेज आणि साक्षीदारांच्या जबाबांचे विश्लेषण करत आहेत, ज्याद्वारे अपघाताचे नेमके कारण उघडकीस येईल.

यावेळी, पोलिसांनी आणि प्रशासनाने असे सूचित केले की, एक्सप्रेसवेवर वाहतुकीच्या सुरक्षेसाठी कठोर उपाययोजना केल्या जातील. यामध्ये, ट्रक आणि इतर वाहनांसाठी योग्य दुरुस्ती आणि थांबण्याचे नियम स्पष्ट करण्यात येतील, तसेच अपघात होण्याच्या शक्यता कमी करण्यासाठी पुढील काळात संबंधित उपाययोजना राबवली जातील. त्यानुसार, नागरिकांना अधिक जागरूकतेने वाहन चालविण्याचे आवाहन करण्यात आले आहे, जेणेकरून भविष्यात अशा घटना टाळता येतील.

The post मुंबई-पुणे एक्सप्रेसवेवर चार वाहनांचा विचित्र अपघात, दोन जण गंभीरपणे जखमी appeared first on थोडक्यात घडामोडी.

पनवेल : पनवेल येथील मुंबईकडे जाणारा एक्झिट रोड ११ फेब्रुवारीपासून सहा महिन्यांसाठी पूर्णपणे बंद राहणार आहे. त्यामुळे, मुंबई-पुणे एक्सप्रेस वे वापरणाऱ्या प्रवाशांना त्यांच्या प्रवासात मोठा बदल करावा लागेल. कळंबोली जंक्शन सुधारणा प्रकल्पांतर्गत कळंबोली सर्कल येथे कन्स्ट्रक्शन कामामुळे हे बंद करण्यात आले आहे. महाराष्ट्र राज्य रस्ते विकास महामंडळाने (एमएसआरडीसी) या ठिकाणी नवीन उड्डाणपूल आणि अंडरपास बांधण्याची घोषणा केली आहे, ज्यामुळे दीर्घकालीन बंद आवश्यक आहे.

वाहतूक निर्बंध :
नवी मुंबई वाहतूक अधिकाऱ्यांच्या मते, या बंदमुळे पनवेल, मुंब्रा आणि जेएनपीटीकडे जाणाऱ्या हलक्या आणि जड वाहनांसह सर्व प्रकारच्या वाहनांवर परिणाम होईल. वाहतूक कोंडीचे व्यवस्थापन करण्यासाठी आणि सुरळीत हालचाल सुनिश्चित करण्यासाठी, बांधकामाच्या संपूर्ण कालावधीसाठी २४ तास निर्बंध लागू राहतील.

पर्यायी मार्ग :

• मुंबई-पुणे एक्सप्रेस वेवरून पनवेल, गोवा आणि जेएनपीटीकडे जाणाऱ्या वाहनांसाठी : वाहने कोनफाटा येथील पळस्पे सर्कल (९.६०० किमी) मार्गे राष्ट्रीय महामार्ग-४८ वर वळवली जातील.
• पुण्याहून मुंबईकडे जाणाऱ्या आणि तळोजा, कल्याण आणि शिळफाटाकडे जाणाऱ्या वाहनांसाठी : त्यांना पनवेल-सायन महामार्गावर १.२०० किमी पुढे जावे लागेल, पुरुषार्थ पेट्रोल पंप उड्डाणपुलाखालून उजवीकडे वळावे लागेल आणि रोडपाली आणि राष्ट्रीय महामार्ग-४८ मार्गे पुढे जावे लागेल.

प्रवाशांनी त्यांच्या मार्गांचे नियोजन त्यानुसार करावे, या पर्यायी मार्गांमुळे संभाव्य विलंब होण्याची शक्यता लक्षात ठेवावी. अधिकाऱ्यांनी वाहनचालकांना गैरसोय टाळण्यासाठी पर्यायी मार्गांचा अवलंब करण्याचे आणि वाहतूक कर्मचाऱ्यांना सहकार्य करण्याचे आवाहन केले आहे.

The post मुंबई-पुणे एक्सप्रेसवे : पनवेल एक्झिट मार्ग ११ फेब्रुवारीपासून सहा महिने राहणार बंद appeared first on थोडक्यात घडामोडी.

लोणवाला : मुंबई-पुणे एक्स्प्रेस वेवर खंडाळा घाटातील खोपोली एक्झिट जवळील तीव्र उतारावर भीषण अपघात झाला आहे. कंटेनरचे ब्रेक निकामी झाल्यामुळे कंटेनर चालकाचे गाडीवरील नियंत्रण सुटल्याने कंटेनरने पुढे जाणाऱ्या एका इर्टिगा कारला धडक दिली आणि त्यानंतर कंटेनर मार्गाच्या कडेला उलटून अपघात झाला. या अपघातात कंटेनर चालकाचा जागीच मृत्यू झाला असून कार चालक किरकोळ जखमी झाला आहे. हा अपघात गुरुवारी दुपारी पावणे चार वाजताच्या सुमारास झाला आहे. अपघातामुळे मुंबईकडे जाणारी वाहतूक काही काळ विस्कळीत झाली होती.

महामार्ग पोलिसांनी दिलेल्या माहितीनुसार, पुण्याहून मुंबईकडे जाणाऱ्या कंटेनरचे (क्रमांक- एमएच-४३/वाय-५८४१) खोपोली एक्झिट जवळील तीव्र उतारावर ब्रेक निकामी झाल्यामुळे कंटेनर चालकाचे कंटेनरवरील सुटले अन् कंटेनर पुढे जाणाऱ्या इर्टिगा (क्रमांक-एमएच-४३/बीयू-२१४५) कारवर मागून जोरात धडकला. तसंच कंटेनर मार्गाच्या कडेला उलटून पलटी झाला. यावेळी कंटेनर चालकाने गाडी मधून मारली होती.परंतु तो गाडीखाली आल्याने त्याचा जागीच मृत्यू झाला. तर कार चालक किरकोळ जखमी झाला आहे. परशुराम कुंडलिक आंधळे (वय-२४, रा.लिंबोडीकर, आष्टी, बीड) असं अपघातात मृत्यू झालेल्या कंटेनर चालकाचं नाव आहे.

अपघाताची माहिती मिळताच बोरघाट (दस्तुरी) महामार्गाचे पोलीस उपनिरीक्षक महेश चव्हाण यांनी सहकाऱ्यांसह तसंच देवदूत आपत्कालीन पथक व आयआरबीच्या कर्मचाऱ्यांनी घटनास्थळी धाव घेत घटनेची पाहणी केली. पोलिसांनी देवदूत आपत्कालीन पथक व आयआरबीच्या कर्मचाऱ्यांच्या मदतीने अपघातग्रस्त कंटेनर व कार क्रेनच्या सहाय्याने बाजूला करून वाहतूक सुरळीत केली. या घटनेचा पुढील तपास खोपोली पोलीस करत आहेत.

The post अपघातचक्र सुरूच! मुंबई-पुणे एक्स्प्रेस वेवर पुन्हा भीषण अपघात; एक जण जागीच ठार appeared first on थोडक्यात घडामोडी.

पुणे : कणकवलीतील भाजप आमदार नितेश राणे यांच्या कारला ट्रकने धडक दिल्याची बातमी समोर आली आहे. कारमध्ये त्यांच्यासोबत कुटुंबीयही होते, असे सांगण्यात येत आहे. याविषयी माहिती देताना स्थानिक पोलिसांनी सांगितले की, मुंबई-पुणे एक्स्प्रेस वेवर उर्स टोल प्लाझा येथे झालेल्या या अपघातात कोणीही जखमी झालेले नाही.

नितेश राणे आणि त्यांचे कुटुंबीय प्रसिद्ध लालबागचा राजा येथे प्रार्थना करण्यासाठी मुंबईला जात होते. तेव्हा त्यांची कार गल्ली क्र. 3 टोल प्लाझाजवळ पोहोचल्यावर सायंकाळी 6.30 च्या सुमारास एका ट्रकने त्यांना मागून धडक दिली. शिरगाव पोलीस ठाण्याच्या अधिकाऱ्याने सांगितले की, कारच्या मागील बाजूचे नुकसान झाले आहे. पोलिसांनी ट्रकचालकाविरुद्ध भारतीय दंड संहितेच्या संबंधित कलमांतर्गत गुन्हा दाखल केला असून त्याची चौकशी सुरू आहे.

The post नितेश राणे यांच्या कारला ट्रकची धडक, मुंबई-पुणे एक्स्प्रेस वेवर अपघात appeared first on थोडक्यात घडामोडी.

मुंबई : गणेशोत्सवासाठी जाणाऱ्या वाहनांसाठी मुंबई- पुणे द्रुतगती महामार्गावरील टोलनाक्यांवर स्वतंत्र मार्गिका करण्याचे निर्देश मुख्यमंत्री एकनाथ शिंदे यांनी आज दिले. खालापुर टोलनाक्याला भेट दिल्यानंतर याठिकाणी अधिकाऱ्यांसमवेत झालेल्या बैठकीत त्यांनी ह्या सूचना दिल्या.

सण-उत्सव, सुट्ट्यांच्या काळात या द्रुतगती महामार्गावरील वाहतूक कोंडी आणि पथकर नाक्यावर होणारी गर्दी टाळण्यासाठी आवश्यक ते मनुष्यबळ वाढवावे. सीसीटीव्ही यंत्रणा सक्षम करण्याबरोबरच अपघात टाळण्यासाठी तातडीने उपाययोजना करण्याचे निर्देशही मुख्यमंत्र्यांनी दिले. साताऱ्याहून मुंबईकडे परतताना दुपारी पुण्यातील चांदणी चौक परिसराला भेट दिल्यानंतर त्यांनी मुंबई- पुणे द्रुतगती महामार्गावरील खोपोली (खालापूर) टोलनाक्याला भेट दिली. या भागात होणाऱ्या वाहतूक कोंडीचा मुख्यमंत्र्यानी आढावा घेतला.

महामार्गांवर होणाऱ्या वाहतूक कोंडीची मुख्यमंत्री शिंदे यांनी गांभीर्याने दखल घेतली. आज दुपारी त्यांनी पुण्यातील चांदणी चौक परिसराला भेट दिली. या भागात होणाऱ्या वाहतूक कोंडीसंदर्भात वरिष्ठ अधिकाऱ्यांशी चर्चा करून तातडीने उपाययोजना करण्याचे निर्देश दिले.

मुंबई- पुणे द्रुतगती महामार्गावरील खोपोली (खालापूर) टोलनाक्यालाही मुख्यमंत्र्यांनी भेट दिली. या भागात होणाऱ्या वाहतूक कोंडीचा त्यांनी आढावा घेतला. गणेशोत्सव, शनिवार, रविवार आणि सार्वजनिक सुट्टीच्या काळात याठिकाणी वाहतूक कोंडी टाळण्यासाठी टोल नाक्यांवर ट्रॅफिक वॉर्डन त्याचबरोबर टोल वसूल करण्यासाठी आवश्यक ते स्कॅनिंग मशिन्सची संख्या वाढवावी, असे निर्देश मुख्यमंत्र्यांनी महामार्ग पोलिस आणि महाराष्ट्र राज्य रस्ते विकास महामंडळाच्या वरिष्ठ अधिकाऱ्यांबरोबर झालेल्या बैठकीत दिले.

सीसीटीव्ही यंत्रणा सक्षम करण्याबरोबरच अपघात टाळण्यासाठी रस्ता सुरक्षा व्यवस्था अधिक मजबूत करण्याकरिता तातडीने उपाययोजना हाती घ्याव्यात असे सांगत वाहतूक कोंडीतून प्रवाशांना दिलासा देण्यासाठी यंत्रणेने जलदगतीने कार्यवाही करण्याचे मुख्यमंत्र्यांनी सांगितले.

The post मुंबई- पुणे द्रुतगती महामार्गावरील टोलनाक्यांवर गणेशोत्सवासाठी जाणाऱ्या वाहनांसाठी स्वतंत्र मार्गिका करा, मुख्यमंत्री एकनाथ शिंदे यांचे निर्देश appeared first on थोडक्यात घडामोडी.

खोपोली : मुंबई-पुणे एक्स्प्रेस वेवर विचित्र अपघात झाला आहे. मुंबई-पुणे एक्स्प्रेस वेवरील मुंबईकडील मार्गिकेवर ट्रेलरने चार कारना जोरदार धडक दिली. या अपघातात दोघांचा मृत्यू झाला. तर अन्य दोघे जण जखमी झाले आहेत.

मिळालेल्या माहितीनुसार, मुंबई-पुणे एक्स्प्रेस वेवर खोपोलीजवळ हा भीषण अपघात झाला. ट्रेलर चालकाचे नियंत्रण सुटले. अनियंत्रित ट्रेलरने मुंबईच्या दिशेकडील मार्गिकेवर एका कारला धडक दिली. त्यानंतर काही अंतरावरच तीन कारनाही धडक दिली. पुढे थोड्याच अंतरावर आणखी एका कारला धडक दिली. त्यानंतर अन्य एका कारला धडकला. त्यानंतर ट्रेलर महामार्गाच्या डाव्या बाजूला जाऊन कलंडला. ट्रेलरने एकूण चार वाहनांना धडक दिली.  या अपघातात दोन जणांचा मृत्यू झाला. तर दोघे जण जखमी झाले आहेत. या अपघातानंतर घटनास्थळी आयआरबी पट्रोलिंग, देवदूत यंत्रणा, महामार्ग वाहतूक पोलीस, खोपोली पोलीस ठाण्याची यंत्रणा, डेल्टा फोर्स, लोकमान्य आरोग्य सेवा यांनी मदतकार्य सुरू केले. या अपघातात दोघांचा मृत्यू झाला आहे. मृतांची नावे समजू शकलेली नाहीत.  तर अनिता सिंग (वय – ५४), अखिलेश सिंग (वय ५५, रा. रोसे – पारडे, पुणे) हे जखमी झाले आहेत. महिलेची प्रकृती गंभीर असल्याचे सांगण्यात येत आहे. दोघा जखमींना कामोठे येथील एमजीएम रुग्णालयात दाखल करण्यात आले आहे.

The post मुंबई-पुणे एक्स्प्रेसवर भीषण अपघात; ट्रेलरची एकापाठोपाठ ४ कारना धडक.. असा झाला अपघात.. appeared first on थोडक्यात घडामोडी.