लोणावळा : मुंबई-पुणे एक्स्प्रेस वेवर चालकाचे कंटेनरवरील नियंत्रण सुटून तीन वाहनांचा भीषण अपघात झाला आहे. खंडाळा घाटातील खोपोली एक्झिट ते फुडमॉल दरम्यानच्या तीव्र उतारावर ही दुर्घटना घडली. या अपघातात कारमध्ये असलेल्या एकाच कुटुंबातील तीन जणांचा जागीच मृत्यू झाला आहे. या अपघातात कंटेनर चालक गंभीर जखमी झाला आहे. हा अपघात आज सायंकाळी पाच वाजण्याच्या सुमारास झाला.

महामार्ग पोलिसांनी दिलेल्या माहितीनुसार, पुण्याहून मुंबईच्या दिशेने भरधाव वेगाने जाणाऱ्या एका कंटेनर चालकाचे खोपोली एक्झिट ते फुडमॉल दरम्यानच्या तीव्र उतार व वळणावर गाडीवरील नियंत्रण सुटले. त्यामुळे कंटेनर एका ट्रकवर मागून जोरात धडकला, तर त्या ट्रकची पुढे जाणाऱ्या एका कारला जोरात धडक बसली. अपघातानंतर कारने पेट घेतला आणि कार जळून खाक झाली. अपघातात कारमधील एकाच कुटुंबातील तिघांचा जागीच मृत्यू झाला. यामध्ये आई, ‌वडील व मुलाचा समावेश आहे. या भीषण अपघातामुळे तिन्ही वाहने मार्गावर पलटली होती.

अपघाताची माहिती मिळताच बोरघाट (दस्तुरी) महामार्ग सहाय्यक पोलिस निरीक्षक जगदीश परदेशी यांचे सहकारी, खोपोली पोलिस, देवदूत आपत्कालीन पथक घटनास्थळी दाखल झाले. घटनेची पाहणी करुन पोलिसांनी आयआरबीआय कंपनीच्या कामगारांच्या मदतीने व क्रेनच्या सहाय्याने अपघातग्रस्त वाहने बाजूला काढली. आग लागलेल्या कारला अग्निशमन बंबाच्या सहाय्याने विझविण्यात आलं. अपघातामुळे मुंबईकडे जाणारी वाहतूक काही काळ विस्कळीत झाली होती. त्यानंतर कार बाजूला काढून मार्ग वाहतुकीसाठी खुला करण्यात आला आहे. या घटनेचा पुढील तपास खोपोली पोलिस करीत आहेत.

The post मुंबई-पुणे एक्स्प्रेस वेवर तीन वाहनांचा भीषण अपघात, तीन जणांचा जागीच मृत्यू appeared first on थोडक्यात घडामोडी.

पुणे : मुंबई-पुणे एक्स्प्रेस वेवरील कामशेत बोगद्यात भीषण अपघात झाला आहे. इनोव्हा कारचा पुढचा टायर फुटल्यामुळं झालेल्या या अपघातात दोघांचा जागीच मृत्यू झाला आहे. तर, दोन जण गंभीर जखमी झाले आहेत. या दुर्दैवी घटनेत जीएसटी डेप्युटी कमिशनर अभिजित घवले यांचा मृत्यू झाला आहे.

हा अपघात आज (२५ मे) सकाळी आठच्या सुमारास झाला. अभिजित घवले त्यांच्या आई-वडिलांना भेटायला चालले होते. मात्र, तिथे पोहोचण्याआधीच त्यांच्यावर काळाने घाला घातला. अभिजीत घवले (जीएसटी डेप्युटी कमिशनर) यांच्यासह त्यांचे साडू शंकर गोडा यतनाल यांचाही या अपघातात मृत्यू झाला आहे. तर घवले यांच्या पत्नी व चालक गंभीर जखमी झाले आहेत. त्यांना उपचारासाठी सोमाटणे येथील पवना हॉस्पिटल येथे दाखल करण्यात आले आहे.

मिळालेल्या माहितीनुसार, अभिजीत घवले त्यांच्या आई-वडिलांना भेटायला त्यांची पत्नी, साडू व चालक यांच्यासह इनोव्हा कारने लातूरला गावी चालले होते. आज सकाळी आठ वाजण्याच्या सुमारास मुंबईहून पुण्याकडे जात असताना कामशेत बोगद्यात इनोव्हा कारचे समोरील टायर फुटले. त्यामुळे भरधाव वेगात असलेली कार पुढे जाणाऱ्या ट्रकवर आदळली. हा अपघात इतका भीषण होता की, इनोव्हा कारच्या समोरच्या भागाचा पूर्णपणे चक्काचूर झाला आहे. अपघाताची माहिती मिळताच पोलिसांनी घटनास्थळी धाव घेतली. अपघातग्रस्त वाहने बाजूला करून वाहतूक सुरळीत करण्यात आली.

The post मुंबई-पुणे एक्स्प्रेस वेवर इनोव्हा कारचा भीषण अपघात, दोघांचा मृत्यू appeared first on थोडक्यात घडामोडी.