मुंबई : कल्याण-पश्चिमेतील बारावे परिसरात एक धक्कादायक घटना घडली आहे. अवघ्या १५ वर्षीय अल्पवयीन मुलीची प्रसूती झाली असून जन्मलेलं नवजात बाळ जन्मताच कचऱ्याच्या डब्यात टाकल्याची धक्कादायक माहिती समोर आली आहे. खडकपाडा पोलिसांनी या प्रकरणाचा तपास करून आरोपीचा पर्दाफाश केला असून २२ वर्षीय रोहित प्रदीप पांडे याला बेड्या ठोकल्या आहेत.

मिळालेल्या माहितीनुसार, १५ वर्षीय अल्पवयीन मुलीचे रोहित पांडे या २२ वर्षीय तरुणासोबत प्रेमसंबंध होते. या संबंधातून ती गर्भवती झाली होती. प्रसूतीनंतर तिने एका मुलीला जन्म दिला; मात्र त्या नवजात बालिकेला कचऱ्याच्या डब्यात फेकण्यात आले. दरम्यान, मंदिराजवळील कचऱ्याच्या ढिगाऱ्यातून बाळाच्या रडण्याचा आवाज ऐकून स्थानिक नागरिकांनी तिथे धाव घेतली. त्यानंतर त्यांनी याबाबत पोलिसांना माहिती दिली. खडकपाडा पोलिसांनी तत्काळ घटनास्थळी पोहोचून नवजात बाळाला ताब्यात घेतलं आणि रुग्णालयात दाखल केलं. सध्या या बाळावर कल्याण-डोंबिवली महापालिकेच्या शास्त्रीनगर रुग्णालयात उपचार सुरु असून तिची प्रकृती स्थिर आहे.

पोलिसांनी या मुलीला कचऱ्यात फेकून देणाऱ्या तिच्या पालकांचा शोध सुरु केला. पोलिसांनी या प्रकरणाची सखोल चौकशी केली असता हे प्रकरण समोर आले. त्यांनी अल्पवयीन मुलगी आणि तिचे संबंध याबाबत माहिती गोळा केली. तपासाअंती रोहित पांडे हा या प्रकारामागे असल्याचे उघड झाले आणि त्याला अटक करण्यात आली. ही मुलगी अल्पवयीन असल्याने पॉस्को कायद्यांतर्गत गुन्हा दाखल करण्यात आला आहे. तसेच, या प्रकरणात आरोपी तरुणाचे आई-वडील आणि अल्पवयीन मुलीची आजी यांच्यावरही कारवाई होण्याची शक्यता पोलिसांनी व्यक्त केली आहे. या सर्वांविरोधात पालकत्व लपवण्याचा आणि नवजात बालिकेच्या जीवाला धोका निर्माण केल्याचा गुन्हा नोंदवला जाणार आहे.

अल्पवयीन आईला प्रसूतीनंतर रक्तस्त्राव झाल्याने ठाण्याच्या सिव्हिल रुग्णालयात उपचारासाठी दाखल करण्यात आलं आहे. तिची प्रकृतीही स्थिर असल्याची माहिती मिळाली आहे.

दरम्यान, या प्रकरणात पोलिस डीएनए तपासणीसाठी तयारी करत आहेत.

The post धक्कादायक! प्रेमसंबंधातून १५ वर्षीय मुलगी गर्भवती, बाळ जन्मलं आणि… appeared first on थोडक्यात घडामोडी.