मुंबई : देशातील हवामानात पुन्हा एकदा मोठे चढउतार पाहायला मिळत आहेत. हवामान विभागाने दिलेल्या ताज्या अंदाजानुसार महाराष्ट्रासह देशातील अनेक राज्यांमध्ये पुढील काही दिवसांत पावसाची शक्यता आहे. दिल्ली, उत्तर प्रदेश आणि राजस्थानसह महाराष्ट्रातही ढगाळ वातावरणासोबत पावसाचा इशारा देण्यात आला आहे. काही ठिकाणी मेघगर्जनेसह पाऊस आणि विजा कोसळण्याची शक्यता व्यक्त करण्यात आली आहे.

दरम्यान, राज्यातील हवामानातही गेल्या काही दिवसांपासून सातत्याने बदल होत आहेत. मार्च महिन्यातच वळीवासारखा पाऊस पडू लागल्याने नागरिकांसह शेतकरी वर्ग चिंतेत आहे. हवामान विभागाने राज्यात पुढील तीन ते चार दिवसांत काही भागात जोरदार पावसाचा अंदाज वर्तवला आहे.

या जिल्ह्यांना पावसाचा इशारा
आज सांगली, सातारा, धाराशिव, लातूर आणि सोलापूर जिल्ह्यांमध्ये अवकाळी पावसाचा इशारा देण्यात आला आहे. गेल्या काही दिवसांपासून लातूर जिल्ह्यात अधूनमधून अवकाळी पाऊस पडत असून त्यामुळे शेती पिकांचे मोठे नुकसान झाले आहे. याशिवाय नांदेड, हिंगोली, परभणी आणि बीड जिल्ह्यांमध्येही पुढील काही दिवसांत पावसाची शक्यता हवामान विभागाने व्यक्त केली आहे. राज्यातील काही भागात कमी दाबाचा पट्टा तयार झाल्यामुळे हे अवकाळी वातावरण निर्माण झाल्याचे सांगितले जात आहे.

पिकांचे मोठे नुकसान, शेतकरी हवालदिल
मराठवाडा भागात अवकाळी पाऊस आणि गारपीटीमुळे शेतकऱ्यांचे मोठे नुकसान झाले आहे. प्राथमिक माहितीनुसार सुमारे 11 हजार हेक्टरहून अधिक क्षेत्रावरील पिके बाधित झाली आहेत.

हाताशी आलेली पिके वादळी पाऊस आणि गारपीटीमुळे जमीनदोस्त झाल्याने शेतकरी हवालदिल झाले आहेत. या पार्श्वभूमीवर नुकसानग्रस्त शेतकऱ्यांना तातडीने आर्थिक मदत आणि नुकसानभरपाई देण्याची मागणी होत आहे.

दरम्यान, कोकणात आज उष्ण आणि दमट हवामानाचा इशारा देण्यात आला असला तरी राज्यातील इतर भागात ढगाळ वातावरणासह पावसाची शक्यता कायम आहे. हवामानातील सतत होणारे बदल पुढील काही दिवस कायम राहण्याची शक्यता हवामान विभागाने व्यक्त केली आहे.

The post अवकाळीचे संकट! पुढील 4 दिवस वादळी पावसाचा इशारा; शेतकऱ्यांची चिंता वाढली… appeared first on थोडक्यात घडामोडी.

पुणे : राज्यात हिवाळ्याने यंदा नेहमीपेक्षा लवकरच हजेरी लावली आहे. गेल्या चार ते पाच दिवसांत महाराष्ट्रातील अनेक जिल्ह्यांमध्ये रात्रीच्या तापमानात अचानक आणि तीव्र घट झाली आहे. भारतीय हवामान विभागाने (IMD) पुष्टी केली आहे की काही भागांमध्ये किमान तापमान ४ ते ६ अंश सेल्सिअसने खाली आले असून, विशेषतः पुणे आणि उत्तर-मध्य महाराष्ट्रात हिवाळ्याची ठळक चाहूल लागली आहे.

तज्ज्ञांनी सांगितले की, “फक्त ४-५ दिवसांत रात्रीचे तापमान ४ ते ६ अंशांनी घसरले आहे. त्यामुळे उत्तर-मध्य महाराष्ट्रात आणि पुण्यात हिवाळा प्रभावीपणे सुरू झाला आहे. आयएमडीच्या विस्तारित श्रेणी अंदाजानुसार (ERF) नोव्हेंबर महिन्यात पावसाची शक्यता नाही. स्वच्छ आकाश आणि कोरडे उत्तरेकडील वारे या परिस्थितीला चालना देत आहेत. त्यामुळे नागरिकांनी सर्दी आणि खोकल्यापासून विशेष काळजी घ्यावी.”

पुढील काही दिवस थंड, कोरडे राहणार
तज्ञांच्या मते, तापमानातील घट ही निरभ्र आकाश, कमी आर्द्रता आणि उत्तरेकडील कोरड्या वाऱ्यांच्या प्रवाहामुळे झाली आहे. ही स्थिती पुढील काही दिवस कायम राहण्याची शक्यता असून, सकाळी स्वच्छ हवामान आणि रात्री थंड वातावरण अनुभवायला मिळेल.

नागरिकांना सूचना
पुणे, नागपूर, औरंगाबाद आणि राज्यातील इतर भागांतील नागरिकांना उबदार राहण्याचा, विशेषतः पहाटेच्या वेळी थंडीपासून बचाव करण्याचा सल्ला देण्यात आला आहे. तसेच सर्दी, खोकला आणि हंगामी आजारांपासून सावध राहण्याचे आवाहनही हवामान विभागाने केले आहे.

The post राज्यात हिवाळ्याची चाहूल! चारच दिवसांत तापमानात ६ अंशांपर्यंत घट, नागरिकांना काळजी घेण्याचे आवाहन appeared first on थोडक्यात घडामोडी.

पुणे : भारतीय हवामान विभागाने (IMD) पुणे जिल्ह्यासाठी ऑरेंज अलर्ट जारी केला असून, आगामी काही तासांत घाटमाथा परिसर तसेच रायगड, रत्नागिरी आणि सिंधुदुर्ग जिल्ह्यांच्या काही भागांमध्ये मध्यम ते जोरदार पावसाची शक्यता व्यक्त करण्यात आली आहे.

यासंदर्भात पुणे जिल्हा प्रशासनाने नागरिकांना सतर्क राहण्याचे, अनावश्यक प्रवास टाळण्याचे आणि आवश्यक खबरदारी घेण्याचे आवाहन केले आहे. विशेषतः सखल भागात राहणारे नागरिक आणि भूस्खलनाचा धोका असलेल्या ठिकाणी वास्तव्यास असलेल्यांनी अधिक सावध राहण्याचे सांगण्यात आले आहे.

हवामान खात्याच्या अंदाजानुसार, २० जुलैपर्यंत पुण्यात ढगाळ वातावरण आणि हलक्या स्वरूपाचा पाऊस राहणार आहे. घाट परिसरात मुसळधार पावसाचा अंदाज असल्याने पर्यटक, ट्रेकर्स आणि वाहनचालकांनी त्या भागांमध्ये जाणे टाळावे, असा सल्ला प्रशासनाने दिला आहे.

The post पुणे जिल्ह्यात मुसळधार पावसाची शक्यता, ऑरेंज अलर्ट जारी appeared first on थोडक्यात घडामोडी.

मुंबई : मुंबई, ठाणे, रायगड, पालघर आणि रत्नागिरी या जिल्ह्यांत वादळी वाऱ्यासह मध्यम ते तीव्र पाऊस होणार असल्याचा अंदाज हवामान खात्याकडून वर्तवण्यात आला आहे. मुंबईला वादळाचा धोका नसला तरी हे चक्रीवादळ मुंबईनजीकच्या समुद्रातून जाणार असल्याने त्याच्या प्रभावाने मुंबईत पाऊस होण्यासह वेगाने वारे वाहण्याची शक्यता हवामान विभागानं व्यक्त केली आहे. त्यानुसार मुंबई, ठाणे, पालघरला ऑरेंज अलर्ट व तर, रायगडला रेड अलर्ट देण्यात आला आहे. राज्यात पुढचे ३ तास महत्त्वाचे आहेत.

तौक्ते चक्रीवादळ हे आता मुंबईच्या दिशेने पुढे सरकत असून यामुळे वाऱ्याचा वेग आणि मुसळधार पावसाला सुरुवात झाली आहे. पुढच्या 3 तासांत रायगड, पालघर, मुंबई, ठाणे आणि रत्नागिरी जिल्ह्यात 90-100 किमी प्रतितास वेगाने वारे वाहणार असून मध्यम ते तीव्र पाऊस पडण्याची शक्यता आहे. त्यामुळे नागरिकांनी सतर्क राहण्याच्या सूचना देण्यात आल्या आहे. चक्रीवादळामुळे आज लसीकरण बंद करण्यात आलं आहे.

मुंबईत गेट वे ऑफ इंडियाजवळील समुद्र खवळला असून मोठ्या लाटांसह पावसाला सुरुवात झाली आहे. मुंबईतल्या अनेक चौपाट्यांवर NDRF ची टीम तैनात करण्यात आली आहे. वसई-विरारमध्ये सोसाट्याच्या वाऱ्यासह, मुसळधार पावसाला सुरूवात झाली आहे. भिवंडीमध्ये मुसळधार पावसामुळे अनेक ठिकाणी पाणी साचलं आहे. मुंबई, ठाणे, कल्याण-डोंबिवली, वाशी, पनवेल आणि कळंबोलीतही पावसाची रिमझिम चालूच आहे. रत्नागिरीमध्ये मुसळधार पावसामुळे मुंबई गोवा महामार्गाला फटका बसला आहे.

नाशिक, पालघर आणि साताऱ्यामध्येही वादळी वाऱ्यासह मुसळधार पावसाला सुरूवात झाली असून नागरिकांनी सतर्क राहण्याच्या सूचना देण्यात आल्या आहेत.

The post राज्यात अनेक ठिकाणी वादळी वाऱ्यासह मुसळधार पावसाला सुरूवात, पुढील ३ तास महत्त्वाचे appeared first on थोडक्यात घडामोडी.