मुंबई: एका पोलीस कॉन्स्टेबलचा ट्रेनमधून पडून मृत्यू झाला आहे. हा पोलीस हवालदार सुमारे सहा ते सात तास गंभीर अवस्थेत रेल्वे रुळावर पडून राहिला.  परंतु, वेळेवर मदत न मिळाल्याने त्यांचा मृत्यू झाला. अमित ज्ञानेश्वर गोंदके (वय २८) असं या पोलीस हवालदाराचे नाव असून, ते अंधेरी रेल्वे पोलीस ठाण्यात कार्यरत होते.

बुधवारी गोंदके कर्तव्य बजावल्यानंतर डोंबिवली येथे आपल्या घरी निघाले होते. रात्री ९.३० च्या सुमारास अंधेरी ते घाटकोपर असा मेट्रोने प्रवास केल्यानंतर पुढील प्रवासासाठी ते लोकल ट्रेनमध्ये गेले. रात्री अकराच्या सुमारास त्यांनी डोंबिवलीसाठी लोकल पकडली. लोकलला प्रचंड गर्दी असल्याने ते ट्रेनच्या दारात उभे होते. मात्र ट्रेनमध्ये जास्त गर्दी असल्याने भांडुप आणि नाहूर रेल्वे स्थानकादरम्यान ते लोकलमधून खाली पडले. लोकलमधून खाली पडल्याने गोंदके गंभीर जखमी झाले. त्यांचा खांदा आणि हात मोडला. त्यांच्या डोक्यालाही गंभीर दुखापत झाली होती. रात्रभर ते जखमी अवस्थेत तसेच पडून होते. अखेर वेळेवर उपचार न मिळाल्याने त्यांना जीव गमवावा लागला.

गुरुवारी (२६ सप्टेंबर) सकाळी ७ वाजता एका प्रवाशाने कुर्ला रेल्वे पोलिसांना एक व्यक्ती गंभीर जखमी अवस्थेत रुळाच्या बाजूला पडल्याची माहिती दिली. माहिती मिळताच कुर्ला रेल्वे पोलिसांनी घटनास्थळ गाठून त्यांना तातडीने जवळच्या रुग्णालयात दाखल केले. मात्र, उपचारास उशीर झाल्याने तिथे त्यांना मृत घोषित केले. कॉन्स्टेबलची ओळख त्याच्या गणवेशावरून आणि ओळखपत्रावरून झाली.

अमित गोंदके हे २०१८ मध्ये पोलिस दलात रुजू झाले होते आणि सध्या ते अंधेरी रेल्वे पोलिस स्टेशनमध्ये तैनात होते. बुधवारी मुसळधार पावसामुळे रात्री उशिरापर्यंत प्रवाशांची मोठी गर्दी झाल्याचे तपासात समोर आले. ते लोकल ट्रेनच्या दाराजवळ उभे असताना त्यांचा तोल गेला आणि ते खाली पडले.

The post पोलीस कॉन्स्टेबलचा ट्रेनमधून पडून मृत्यू, रात्रभर मिळाली नाही मदत… appeared first on थोडक्यात घडामोडी.

अंबरनाथ : अंबरनाथ स्थानकावरून मुंबईकडे जाणाऱ्या लोकलचा डबा रुळावरून घसरल्याने मध्य रेल्वेची वाहतूक विस्कळीत झाली आहे. अपघाताची घटना सकाळी साडे आठच्या सुमारास घडली असून मुंबईकडे जाणारी वाहतूक अर्धा तास उशिराने होतं आहे. रेल्वे कर्मचारी युद्ध पातळीवर दुरुस्तीचे काम करत आहेत.जो डबा रुळावरून घसरलेला आहे,त्याला वेगळं करून घसरलेल्या डब्याला लिफ्ट करून पुन्हा रुळावर आणण्याचे काम सुरू आहे. सध्या मुंबईहून पुण्याकडे जाणाऱ्या सर्व गाड्या अनिश्चित काळासाठी विस्कळीत झाला आहे.

पुण्याला जाणाऱ्या अनेक महत्वाच्या गाड्या या मार्गावरूनच धावत असतात, परंतु, या अपघातामुळे पुण्याकडून येणारी आणि पुण्याला जाणारी  वाहतूक अनिश्तिच काळासाठी विस्कळीत झाली आहे. मध्य रेल्वेचा हा अत्यंत महत्वाचा मार्ग आहे. कल्याण ते कर्जत दरम्यानच्या वाहतूकीवर परिणाम झाला आहे. बदलापूर लोकल उल्हासनगर स्थानकावर थांबवण्यात आली आहे.

तसेच ट्रेन १८५२० विशाखापट्टणम एक्सप्रेसही अंबरनाथ स्थानकावरील सिग्नलवर थांबवण्यात आली आहे. या अपघातात कोणालाही दुखापत झाली नाही. मात्र, संपूर्ण रेल्वेचे वेळापत्रक कोलमडून पडले आहे. रुळावरून घसरलेला डबा रुळावर आणून वाहतूक पूर्ववत करण्याचे प्रयत्न सुरु आहेत. मध्य रेल्वेचे वरिष्ठ अधिकारी घटनास्थळी दाखल झाले आहेत.

The post अंबरनाथ स्थानकावर लोकलचा डबा घसरला; मध्यरेल्वेची वाहतूक विस्कळीत, मुंबईहून पुण्याकडे जाणाऱ्या सर्व गाड्या अनिश्चित काळासाठी विस्कळीत appeared first on थोडक्यात घडामोडी.

मुंबई : आज (बुधवार) सकाळीच धावत्या लोकलमधून पडल्याने एका २२ वर्षाय तरुणाचा मृत्यू झाल्याची दुर्दैवी घटना मुंबईत घडली आहे. सकाळी गोरेगाव ते मालाड स्थानकादरम्यान हा अपघात झाला असून बोरीवली रेल्वे पोलिस स्थानकात याबाबत तक्रार दाखल करण्यात आली आहे. सकाळच्या सुमारास लोकलमधून चर्चगेटच्या दिशेने जाताना ही घटना घडली.

लोकलमध्ये सकाळच्या सुमारास मोठी गर्दी असते. त्यात हा २२ वर्षाय तरुण दरवाजाजवळ उभा होता. गोरेगाव ते मालाड स्थानकादरम्यान प्रवाशांचा धक्का लागल्याने हा तरुण धावत्या लोकलमधून खाली पडला. लोकलमधून तरुण खाली पडल्याने एकच गोंधळ उडाला होता. प्रवाशांनी लगेच आरडा-ओरडा करत लोकल थांबवून तरुणाला वाचवण्याचा प्रयत्न केला. मात्र, त्याचा मृत्यू झाला. बोरीवली रेल्वे पोलिसांनी घटनास्थळी धाव घेत पंचनामा केला. त्यानंतर अपघाती मृत्यूची नोंद करण्यात आली असून पुढील तपास सुरू आहे, अशी माहिती बोरीवली रेल्वे पोलिसांनी दिली आहे.

The post मुंबई लोकलमधील गर्दी जीवावर बेतली, लोकलमधून पडून तरुणाचा मृत्यू appeared first on थोडक्यात घडामोडी.

मुंबई : महाराष्ट्र आणि मुंबईत कोरोनाचा प्रसार पुन्हा एकदा वाढत आहे. या पार्श्वभूमीवर केंद्र सरकारच्या पथकाने पाहणी करून करून असं का घडलं, याची पाहणी केली. त्यानंतर केंद्रीय पथकाने याला जबाबदार असणाऱ्या कारणांबद्दलचा अहवाल तयार केला आहे.

यात प्रामुख्याने लोकलमधील गर्दी, लोकांचा निष्काळजीपणा, स्थानिक स्वराज्य संस्थांच्या निवडणुका, लग्न समारंभ, सार्वजनिक कार्यक्रमांमध्ये झालेली वाढ आणि लोकल तसेच सार्वजनिक वाहतूक सुरु केली, यामुळे कोरोनाचा संसर्ग वाढला असं केंद्रीय पथकाने अहवालात नमूद केलं आहे. आरोग्य यंत्रणा आता गांभीर्याने काम करत नसल्याचं देखील केंद्रीय पथकाने म्हटलं आहे.

केंद्रीय पथकाने सुचवलेले उपाय :

1. राज्य सरकारने कोरोना चाचण्यांची संख्या वाढवावी.
2. रुग्णांचा शोध घ्यावा.
3. कोरोना संबंधीच्या नियमांचे काटेकोरपण पालन केले पाहिजे.
4. काँटॅक्ट ट्रेसिंगवर भर द्यावा.
5. लसीकरण सुरू ठेवावे.

काल (7 मार्च) महाराष्ट्रात 11,141 कोरोनाबाधित रुग्णांची नोंद झाली आहे. तर दिवसभरात 6013 रुग्णांना डिस्चार्ज देण्यात आला आहे. सक्रिय रुग्णांची संख्या 97,983 झाली आहे. राज्यात एकूण 52, 478 रुग्णांचा मृत्यू झाला आहे.

The post केंद्रीय पथकाने सांगितली राज्यातील कोरोना संसर्ग पुन्हा वाढण्याची कारणे, सुचवले ‘हे’ उपाय appeared first on थोडक्यात घडामोडी.

मुंबई : डबेवाल्यांना परवानगी देण्याच्या या निर्णयाचं महाराष्ट्र नवनिर्माण सेनेनं स्वागत केलं आहे. २४ सप्टेंबर रोजी मुंबईच्या डबेवाल्यांच्या शिष्टमंडळानं मनसे प्रमुख राज यांची त्यांच्या कृष्णकुंज या निवासस्थानी भेट घेतली होती. गेल्या अनेक दिवसांपासून मुंबईच्या डबेवाल्यांकडून रेल्वेनं प्रवास करू देण्याची मागणी करण्यात येत होती. परंतु रेल्वे प्रशासानानं त्यांची मागणी मान्य केली नव्हती. राज ठाकरे यांच्या भेटीदरम्यान डबेवाल्यांनादेखील रेल्वेनं प्रवास करण्याची परवानगी देण्यात यावी, अशी प्रमुख मागणी करण्यात आली होती. मुंबई डबेवाला असोसिएशनचे सुभाष तळेकर यांच्या नेतृत्वाखाली शिष्टमंडळानं राज ठाकरेंची भेट घेत त्यांना निवेदनही दिली होती. अखेर अनलॉक ५ च्या नव्या नियमांमध्ये डब्बेवाल्यांना लोकलने प्रवास करण्याची परवानगी देण्यात आल्याने मनसेच्या अधिकृत (व्हेरिफाइड) पेजवरुन ‘कृष्णकुंजवर न्याय मिळतोच’ या मथळ्याखाली एक पोस्ट करण्यात आली आहे.

‘मुंबईतील डबेवाले म्हणजे मुंबईतील नोकरदार वर्गाचे अन्नदातेच, जे रोज न चुकता गेली अनेक दशकं ह्या नोकरदारवर्गाला त्यांचा डबा पोहचवत होते. पण लॉकडाऊननंतरची अनेक ‘अनलॉक’ टप्पे आले पण ह्या डबेवाल्याना त्यांच्या हक्काच्या रेल्वेत प्रवेश द्यावा जे नोकरदार लोंबकळत प्रवास करत मुंबई गाठत आहे त्यांना घरचं जेवण मिळावं हे काही राज्य सरकारच्या ध्यानी आलं नाही. शेवटी न्यायाच्या अपेक्षेने ह्या डबेवाल्यांनी राज यांची भेट घेतली होती आणि आपली व्यथा मांडली. राज यांनी योग्य पद्धतीने लवकरात लवकर न्याय मिळवून देतो असं आश्वासन दिलं आणि आजच्या ‘अनलॉक’ च्या नियमावलीत डबेवाल्याना रेल्वेतून प्रवास करण्याची मुभा देण्यात आली,’ असं या पोस्टमध्ये म्हटलं आहे.

“दोन दिवसांपूर्वी मनसेनं मुंबईत लोकल प्रवास करत सविनय कायदेभंगाचं आंदोलन केलं होतं. बहुतांश मनसेच्या पदाधिकाऱ्यांनी लोकलनं प्रवास केला होता. मुंबईतील लोकल सेवा पूर्ववत करावी अशी त्यांची मागणी होती. डबेवाल्यांनी महिनाभरापूर्वी रेल्वे प्रशासनाकडे परवानगी मागितली होती. मुंबईकरांप्रमाणेच डबेवाल्यांची लाईफलाईनही लोकल रेल्वे सेवा आहे. परंतु रेल्वे प्रशासनानं आमची मागणी मान्य केली नाही,” असं राज ठाकरेंच्या भेटीपूर्वी शिष्टमंडळाकडून सांगण्यात आलं होतं.

“आम्हाला लोकलमधून परवानगी देण्यात येत नाही तर किमान अत्यावश्यक सेवांमध्ये आमची सेवा सामावून घेत प्रवास करू देण्यात यावा अशीही विनंती आम्ही केली होती. परंतु तीदेखील मान्य करण्यात आली नाही. आमची मागणी मनसेनं उचलून धरली आणि त्यांनी आंदोलन केलं. यासाठी आम्ही त्यांचे आभार मानण्यासाठी आलो आहोत. मनसेनं आदोलन करून वात पेटवली आहे. त्याचा भडका केव्हाही होऊ शकतो. थोड्याफार प्रमाणात तरी सरकारनं सेवा सुरू करावी,” असंही यावेळी डबेवाल्यांनी म्हटलं होतं.

The post कृष्णकुंजवर न्याय मिळतोच, मनसे व्यक्त केला आनंद appeared first on थोडक्यात घडामोडी.

राज्यात कोरोना आणि लॉकडाऊनचा फटका व्यापारी, सर्वसामान्य यांच्यासह डबेवाल्यांनाही बसला आहे. त्या पार्श्वभूमीवर मुंबई डबेवाला असोशिएशनचे अध्यक्ष सुभाष तळेकर यांनी मुंबईतील लोकलसेवा लवकरात लवकर सुरु करा, अन्यथा डबेवाल्यांना दर महिना किमान 3 हजार रुपये अनुदान द्या, अशी मागणी केली आहे. राज्यात कोरोनाच्या प्रादुर्भावामुळे डबेवाल्यांनी 19 मार्चपासून डबे पोहोचवण्याचा व्यवसाय बंद केला होता. त्यानंतर लॉकडाऊन झाल्याने गेल्या जवळपास साडेपाच महिन्यांपासून डबेवाल्यांना रोजगार मिळालेला नाही.

मुंबईची लाईफलाईन लोकल आहे, तशीच डबेवाल्यांची लाईफलाईन लोकलच आहे. त्यामुळे जो पर्यंत लोकल सेवा सुरु होत नाही, तोपर्यंत तरी डबेवाल्यांना आपली सेवा देणे शक्य नाही, असे मत सुभाष तळेकर यांनी व्यक्त केलं आहे.

मुंबई शहरातील काही शासकीय, निमशासकीय, तसेच कार्पोरेट कार्यालये चालू झाली आहेत. त्यामुळे अनेक चाकरमानी डबेवाल्याला फोन करुन डबे पोहोचण्याबाबत विचारणा करत आहे. पण जोपर्यंत लोकलसेवा पूर्ववत होत नाही, तोपर्यंत डबेवाला कामावर रुजू होऊ शकत नाही. त्या पार्श्वभूमीवर केंद्र सरकारने मुंबईतील लोकल सेवा लवकरात लवकर सुरु करावी किंवा अत्यावश्यक सेवा समजत त्यांना लोकलने प्रवास करण्याची परवानगी द्यावी, अशी मागणी मुंबई डबेवाला असोसिएशनने केली आहे.

The post लॉकडाऊन मुळे लोकल बंद, डबेवाल्यांना रोजगार नाही appeared first on थोडक्यात घडामोडी.