कोल्हापूर : कार २५ फूट खोल दरीमध्ये कोसळून भीषण दुर्घटना घडली आहे. या दुर्घटनेत कोल्हापूरातील दोन तरुण जागीच ठार झाले, तर अन्य दोनजण जखमी झाले आहेत. चालकाचे गाडीवरील नियंत्रण सुटल्याने कार दरीत कोसळल्याचे सांगितले जात आहे. ही घटना मध्यरात्रीच्या सुमारास घडली.

मिळालेल्या माहितीनुसार, शुभम हेमंत सोनार (वय २४ रा. राजारामपूरी) आणि शंतनू शिरीष कुलकर्णी (वय २८ रा. मोरेवाडी, ता. करवीर) अशी ठार झालेल्या दोघांची नावे असून संकेत बाळकृष्ण कडणे (२१ रा. खाडीलकर गल्ली, गावभाव, सांगली), सौरभ रविंद्र कणसे (२६ रा. राजारामपूरी ६ वी गल्ली) अशी जखमी तरुणांची नावे आहेत. हे चौघे आपल्या इनोव्हा गाडीतून वाशी येथे गेले होते. तेथे फार्म हाऊसवर जेवण करून मध्यरात्री चौघेही घरी परतत होते. शुभम भरधाव कार चालवत असल्यामुळे पुईखडी टेकडीवर आल्यानंतर शुभमचा गाडीवरील ताबा सुटला आणि कार रस्त्यावरून खाली जाऊन सुमारे २५ फूट खोल दरीत कोसळली.

या दुर्घटनेत शुभम सुतार व शंतनू कुलकर्णी हे दोघे जागीच ठार झाले. तर संकेत कडणे व सौरभ कडणे हे दोघे जखमी झाले. जखमींना तातडीने सीपीआर रुग्णालयात उपचारासाठी दाखल करण्यात आलं असून त्यांच्यावर उपचार सुरू आहेत. दरम्यान, घरातील तरूण मुले गमावल्याने शुभम आणि शंतनूच्या कुटुंबाला मोठा धक्का बसला आहे. या दुःखद घटनेमुळे सर्वत्र हळहळ व्यक्त करण्यात येत आहे.

The post कार दरीमध्ये कोसळून भीषण दुर्घटना, कोल्हापूरातील 2 तरुण जागीच ठार, 2 जखमी appeared first on थोडक्यात घडामोडी.