मुंबई : राज्य सरकारने नैसर्गिक वायूवरील करात १० टक्क्यांची कपात केली आहे. नैसर्गिक वायूचा कर १३.५ टक्क्यांवरून कमी करून ३.५ टक्के इतका केला आहे. यामुळे राज्यात सीएनजी आणि पीएनजी गॅस स्वस्त होण्याची शक्यता आहे. मात्र मूल्यवर्धित कर तसेच ठेवल्याने पेट्रोल आणि डिझेल स्वस्त होण्याच्या अपेक्षा मात्र मावळल्या.

महाविकास आघाडी सरकारने आज तिसरा अर्थसंकल्प विधिमंडळात सादर केला. यात अर्थमंत्री अजित पवार यांनी नैसर्गिक वायूवरील कर ३.५ टक्के इतका केला आहे, त्यामुळे लवकरच गॅस वितरक कंपन्यांकडून दर कपात होण्याची शक्यता आहे.

आज पेट्रोल आणि डिझेलवरील मूल्यवर्धीत करात मात्र कोणतीही कपात करण्यात आली नाही. त्यामुळे ग्राहकांना पेट्रोल आणि डिझेल चढ्या दराने खरेदी करावे लागणार आहे. दिवाळीत केंद्र सरकारने पेट्रोल आणि डिझेलवरील उत्पादन शुल्कात कपात केली होती. त्यानंतर अनेक राज्यांनी देखील शुल्क कपात केली. मात्र राज्यातील महाविकास आघाडी सरकारने इंधनावरील व्हॅटचा दर तसाच ठेवला होता.

दरम्यान, जागतिक बाजारात कच्च्या तेलाच्या किमतीत वाढ झाल्याने गेल्या काही महिन्यांपासून राज्यात सीएनजी आणि पीएनजीच्या दरात वाढ झाली होती. मुंबई आणि पुणे सारख्या महानगरात सीएनजीचा दर ६३ ते ६६ रुपयांच्या दरम्यान आहे. घरगुती वापराचा पाईप गॅस आता ३६ ते ३८ रुपये किलो आहे.

The post महाराष्ट्र बजेट 2022 : सीएनजी, पाईप गॅस होणार स्वस्त, पण पेट्रोल -डिझेल मात्र… appeared first on थोडक्यात घडामोडी.

मुंबई : राज्य सरकारने कोरोना प्रतिबंधात्मक बंधने शिथिल करत नवी नियमावली जाहीर केली आहे. ही नवी नियमावली ४ मार्चपासून लागू केली जाणार असल्याचे राज्य सरकारने जाहीर केले आहे. नव्या नियमावलीनुसार राज्यातील १४ जिल्ह्यांमधील नाट्यगृहे, सिनेमागृहे, पर्यटन स्थळे आणि धार्मिक स्थळे १०० टक्के क्षमतेने सुरू करण्यात येणार आहेत. तर राज्यातील उर्वरित जिल्ह्यांमध्ये मनोरंजन आणि पर्यटनस्थळे तसेच धार्मिक स्थळे ५० टक्के क्षमतेने सुरू राहतील.

राज्य सरकारच्या नव्या नियमावलीनुसार

• लग्न सोहळे, सांस्कृतिक कार्यक्रम, तसेच धार्मिक कार्यक्रमांच्या सभागृहातील एकूण क्षमतेच्या ५० टक्के इतकी परवानगी देण्यात आली आहे.
• राज्यातील सर्व सरकारी, खासगी कार्यालये 100 टक्के उपस्थितीसह सुरू होणार आहेत.
• लशींचे दोन डोस पूर्ण झालेल्यांना आंतरराज्यीय प्रवासाची मुभा देण्यात आली आहे.
• सरकारने ऑफलाइन शाळाही सुरू करण्याची मुभा दिली आहे. शाळा देखील पूर्ण क्षमतेने सुरू करण्यात येत आहेत.
• रेल्वे, तसेच बसने प्रवास करताना लसीचे दोन डोस बंधनकारकच करण्यात आले आहेत.
• राज्यातील चित्रपटगृहे , मॉल्स आणि इतर ठिकाणच्या प्रवेशासाठी लसीचे दोन डोस घेतलेले असणे बंधनकारकच आहे.
• मनोरंजन व उद्याने जलतरण तलाव, वॉटर पार्क यांनाही पूर्ण क्षमतेने सुरू ठेवण्याच्या परवानगी देण्यात आलेली आहे.
• लग्नसमारंभ तसेच अत्यंसंस्कार विधी अशा कार्यक्रमांवरील निर्बंधही हटवण्यात आले आहेत.

जिल्ह्यांमधील निर्बंध शिथिल करण्याचे निकष :

जिल्ह्यांमध्ये पहिला डोस घेतलेल्या नागरिकांची संख्या ९० टक्क्यांहून अधिक असणे आवश्यक असून, दुसरा डोस घेतलेल्या नागरिकांची संख्या ७० टक्क्यांपेक्षा अधिक हवी. तसेच करोनाचा पॉझिटिव्हीटीचा दर हा १० टक्क्यांपेक्षा कमी असणे गरजेचे आहे.

‘या’ १४ जिल्ह्यांमध्ये सिनेमागृहे , रेस्टॉरंट्स १०० टक्के क्षमतेने सुरू

1. मुंबई शहर
2. मुंबई उपनगरे
3. पुणे
4. भंडारा
5. सिंधुदुर्ग
6. नागपूर
7. रायगड
8. वर्धा
9. रत्नागिरी
10. सातारा
11. सांगली
12. गोंदिया
13. चंद्रपूर
14. कोल्हापूर

The post नवी नियमावली! राज्य सरकारकडून कोरोना निर्बंध शिथिल, ‘या’ जिल्ह्यांना मोठा दिलासा appeared first on थोडक्यात घडामोडी.