नवी दिल्ली : कोरोनाचा संसर्ग कमी झाला असला तरी पूर्णपणे नष्ट झालेला नाहीये. अनेक देशात कोरोनाचे रुग्ण पुन्हा वाढतआहेत. यामागे कोरोनाचा एक नवा व्हेरियंट असल्याचं समोर आलं असून ओमिक्रॉन व्हेरियंटचा सब व्हेरियंट आढळला आहे. चिंतेची बाब म्हणजे पुण्यात या BQ1 व्हेरियंटची एन्ट्री झाली आहे.

मिळालेल्या माहितीनुसार, सोमवारी पुण्यात ओमिक्रॉनचा सबव्हेरियंट BQ1चा रुग्ण आढळला आहे. याआधी गुजरातमध्ये BF.7 व्हेरियंट सापडला होता. तज्ज्ञांच्या माहितीनुसार, BQ1 आणि BF.7 या दोन्ही व्हेरियंटचे म्युटेशन होतं. ज्यामुळे शरिरातील रोग प्रतिकारशक्ती कमी होते. BQ.1 आणि BQ.1.1 हे ओमिक्रॉनच्या BA.5 सबव्हेरियंटचे दोन उपप्रकार आहेत. हे दोन्ही उपप्रकार धोकादायक असल्याचं बोललं जातं. अमेरिकेतील कोरोनाच्या सर्व सक्रिय प्रकरणांपैकी १०% पेक्षा जास्त प्रकरणे या उपप्रकारांमुळे असल्याचे समोर आले आहे.

दरम्यान, महाराष्ट्रात सोमवारी २०१ रुग्ण आढळले होते. तर, रुग्ण वाढीचा दर १.८२ टक्के इतका होता. पुण्यात २३ नवीन रुग्ण आढळले आहेत. ठाणे, रायगड आणि मुंबई या तीन शहरात रुग्णवाढीचे प्रमाण अधिक आहे. त्यामुळे नागरिकांनी दिवाळीत योग्य ती काळजी घ्यावी. तसंच, सर्दी-ताप अशी लक्षणे आढळल्यास वेळेत डॉक्टरांचा सल्ला घ्यावा. सरकारने जारी केलेल्या मार्गदर्शक सूचनांनुसार लसीकरण करण्याचे आवाहन करण्यात आले आहे. वृद्धांनी काही दिवस गर्दीच्या ठिकाणी जाऊ नये.

The post पुण्यात कोरोनाचा नवा व्हेरियंट BQ.1 ची एन्ट्री, दिवाळीच्या तोंडावर कोरोनाने वाढवली चिंता appeared first on थोडक्यात घडामोडी.