मुंबई : परिवहन विभागामार्फत देण्यात येणाऱ्या 115 सेवांपैकी ८० सेवा ऑनलाईन पद्धतीने देण्यात येत आहेत. आता परिवहन प्राधिकरण (आरटीओ) कार्यालयात वाहन चालक (लायसन्स) अनुज्ञप्तीचे नूतनीकरण, दुय्यम वाहन चालक अनुज्ञप्ती, वाहन-चालक अनुज्ञप्तीमधील पत्ता बदल, दुय्यम वाहन नोंदणी प्रमाणपत्र, वाहन नोंदणी प्रमाणपत्राचा पत्ता बदल तसेच बाहेरील राज्यात जाण्यासाठी ना-हरकत प्रमाणपत्रासाठी जावे लागणार नाही. आता या सहा सेवा ऑनलाईन पद्धतीने सुरू करण्यात आल्या असल्याची माहिती परिवहन मंत्री ॲड. अनिल परब यांनी दिली.

परिवहन आयुक्त कार्यालयात आज या सहा सेवांचे लोकार्पण मंत्री परब यांच्या हस्ते करण्यात आले. यावेळी त्यांनी ही माहिती दिली. कार्यक्रमास परिवहन आयुक्त अविनाश ढाकणे, अप्पर परिवहन आयुक्त जितेंद्र पाटील, सह परिवहन आयुक्त दिनकर मनवर, एनआयसीचे तांत्रिक संचालक दीपक सोनार आदी उपस्थित होते.

मंत्री परब म्हणाले, विभागामार्फत ११५ अनुज्ञप्ती, नोंदणी प्रमाणपत्र, परवाना संबंधित सेवा देण्यात येत असून, केंद्र शासनाच्या सूचनांनुसार ८० सेवा ऑनलाईन असून, आज सहा सेवा ऑनलाईन पद्धतीने सुरू केल्या आहेत. याचा तब्बल २० लाख लोकांना लाभ मिळेल. पारदर्शक सेवा नागरिकांना मिळावी यासाठी या सेवा आधारकार्डसोबत जोडण्यात आल्या असल्याचेही त्यांनी सांगितले.

अर्जदार अर्ज, पेमेंट व कागदपत्रे ऑनलाईन अपलोड करु शकतो. या सेवांचा लाभ घेण्याकरिता आधार क्रमांकचा वापर करण्यात येणार असून, आधार कार्डशी लिंक असलेल्या मोबाईलवर OTP पाठविण्यात येणार, त्यानंतर त्याची नोंदणी परिवहन या संकेतस्थळामध्ये केल्यास अनुज्ञप्ती / नोंदणी प्रमाणपत्रामधील अर्जदाराची माहिती व आधार अभिलेखातील अर्जदाराची माहिती याची खातरजमा झाल्यानंतरच पुढे अर्ज करणे शक्य होणार आहे. अर्जदाराचे नाव, पत्ता, जन्म तारीख व मोबाईल क्रमांक याची खातरजमा झाल्यामुळे आता पुढील नमुद ६ अर्जाकरिता कार्यालयामध्ये येण्याची आवश्यकता नाही. तसेच नवीन अनुज्ञप्ती (लायसन्स) / नोंदणी प्रमाणपत्र अर्जदारास पोस्टाने पाठविण्यात येणार आहे.

राज्यामध्ये दुय्यम नोंदणी प्रमाणपत्राकरिता वर्षभरात एक लाख अर्ज प्राप्त होतात. ना-हरकत प्रमाणपत्राकरिता वर्षभरात ३०,००० तर, नोंदणी प्रमाणपत्रावरील पत्ता बदलाकरिता २०,००० अर्ज, (लायसन्स)अनुज्ञप्तीचे दुय्यमीकरण प्रमाणपत्राकरिता दोन लाख अर्ज, अनुज्ञप्तीवरील (लायसन्स) पत्ता बदलकरिता दोन लाखाहून अधिक अर्ज प्राप्त होतात. अनुज्ञप्तीच्या नूतनीकरणाकरिता १४ लाख अर्ज प्राप्त होतात. आता ही सर्व प्रक्रिया ऑनलाईन पद्धतीने पूर्ण होणार आहे.

The post ड्रायव्हिंग लायसन्स आता मिळणार ऑनलाईन, जाणून घ्या… appeared first on थोडक्यात घडामोडी.

नवी दिल्ली : रस्त्यावरुन जाताना आपल्या आणि इतरांच्या सुरक्षेचा विचार करून, सरकारकडून आता ड्रायव्हिंग लायसन्स देण्याच्या प्रक्रियेत बदल केले जाणार आहेत. नवीन नियमांतर्गत ड्रायव्हिंग लायसन्स देण्यापूर्वी अर्जदारास व्हिडिओ ट्यूटोरियल दाखविला जाईल. ड्रायव्हिंग चाचणीच्या एक महिन्यापूर्वी दाखविलेल्या या व्हिडिओ ट्यूटोरियलमध्ये सुरक्षित ड्रायव्हिंगशी संबंधित माहिती दिली जाईल. या व्यतिरिक्त, अपघातग्रस्तांच्या कुटूंबाबरोबर चर्चा देखील करावी लागेल, जेणेकरून रस्त्यावरुन जाताना आपल्या आणि इतरांच्या जीवनाचे किती महत्त्व असते, याची जाणीव होऊ शकेल.

नवीन नियम नोव्हेंबर 2021 पासून लागू होतील. नियमांनुसार, तुमच्याकडे जर आधीपासूनच ड्रायव्हिंग लायसन्स असेल आणि तुम्ही वाहतुकीचे नियम मोडले तर तुम्हाला सुरक्षा प्रमाणपत्र अभ्यासक्रम (सेफ्टी सर्टिफिकिट कोर्स) पास करावा लागेल. हा रिफ्रेशर कोर्स पूर्ण करण्यासाठी तुम्हाला 3 महिने मिळतील. हा कोर्स पूर्ण केलेल्या ड्रायव्हरचे आधार कार्ड ड्रायव्हिंग लायसन्सशी लिंक केले जाईल, जेणेकरुन त्यांच्या ड्रायव्हिंगला ट्रॅक करता येऊ शकेल.

केंद्रीय रस्ते वाहतूक आणि महामार्ग मंत्रालय (MoRTH) आता सुरक्षित वाहन चालविण्याबाबत कडक नियम लागू करणार आहे. दुचाकी वाहन हेल्मेटशिवाय चालवणारे आणि पोलिसांना भेटून टोल क्रॉस करणाऱ्यांना चिन्हांकित करण्यासाठी मंत्रालय एक यंत्रणा सुरू करणार आहे. यात विनाहेल्मेट दुचाकी चालवणाऱ्यांचे फूटेज शेअर केले जाणार असून त्यांचे चालान कापले जाईल.

रस्ते सुरक्षेबाबत लोकांना जागरूक करण्यासाठी केंद्र सरकार हे नियम आणत आहे. आकडेवारीनुसार, 2019 मध्ये सुमारे 44,666 दुचाकी चालकांचा रस्ते अपघातात मृत्यू झाला. त्यातील 80 टक्के वाहनचालकांनी हेल्मेट घातलेले नव्हते. अहवालानुसार, नवीन ड्रायव्हिंग लायसन्ससाठी अर्ज करणाऱ्यांना ऑनलाईन व्हिडिओ ट्यूटोरियल आणि ड्रायव्हिंग लायसन्स मिळविलेल्यांसाठी सेफ्टी सर्टिफिकिट कोर्स येत्या काही दिवसांत नवीन सेंट्रल मोटर वाहन नियमात समाविष्ट केले जाऊ शकते. तथापि, सरकारकडून याबाबत अद्याप कोणतीही अधिकृत माहिती देण्यात आलेली नाही.

The post आता ड्रायव्हिंग लायसन्स मिळवणं होणार खूप अवघड, जाणून घ्या… appeared first on थोडक्यात घडामोडी.