नवी दिल्ली : भारत आणि युरोपियन युनियन (EU) मध्ये लसीच्या ग्रीन पासबाबत सध्या वाद सुरु आहे. दरम्यान, गुरुवारी युरोपमधील 8 देशांनी कोविशील्डला ग्रीन पास देऊन मान्यताप्राप्त लसींच्या यादीमध्ये समाविष्ट केले आहे. याचा अर्थ या देशांमध्ये कोविशील्डचे दोन्ही डोस घेत असलेल्या भारतीयांना कोरोना नियमांमधून सूट देण्यात येईल.

मीडिया रिपोर्टनुसार, मान्यता देणार्‍या देशांमध्ये जर्मनी, स्लोव्हेनिया, ऑस्ट्रिया, ग्रीस, आइसलँड, आयर्लंड, स्पेन आणि स्वित्झर्लंडचा समावेश आहे. यापूर्वी बुधवारी भारताने युरोपला इशारा दिला होता. युरोपियन देशांच्या मेडिकल एजन्सीने (EMA) ग्रीन पासमध्ये कोविशील्ड आणि कोव्हॅक्सिनचा समावेश केला नाही, तर भारतदेखील या देशांचे लसीचे प्रमाणपत्रही स्वीकारणार नाही, असे भारताने स्पष्टपणे सांगितले होते. अशा परिस्थितीत युरोपियन देशांच्या नागरिकांनाही भारतात विलगीकरणात ठेवण्यात येईल.

युरोपियन युनियनने आपल्या ‘ग्रीन पास’ योजनेंतर्गत प्रवासी निर्बंध कमी केले आहेत. युरोपियन युनियनच्या 27 सदस्य देशांना कोविशील्ड आणि कोव्हॅक्सिनची लस घेतलेल्या भारतीयांना युरोप प्रवास करण्यास परवानगी देण्याबाबत स्वतंत्रपणे विचार करण्याचे आवाहन भारताने केले होते.

युरोपियन युनियनची डिजिटल कोविड प्रमाणपत्र योजना ‘ग्रीन पास’ १ जुलैपासून लागू झाली आहे. त्याअंतर्गत कोरोना साथीच्या वेळी नोंदणीकृत लस घेतलेल्यास ग्रीन पास असलेल्या देशांमध्ये जाण्याची परवानगी दिली जाईल. भारताने युरोपियन वैद्यकीय एजन्सीला सांगितले आहे की भारतात लसीकरण केलेल्या लोकांच्या प्रमाणपत्रांची पडताळणी कोविन पोर्टलवर करता येईल. भारताने म्हटले आहे की भारतात देखील ग्रीन पास घेऊन येणाऱ्यांना विलगीकरणातून सूट दिली जाईल.

The post मोठी बातमी! भारताने दिलेल्या ‘त्या’ इशाऱ्यानंतर 8 युरोपियन देशांमध्ये कोविशील्डला ग्रीन पास appeared first on थोडक्यात घडामोडी.

नवी दिल्ली : केंद्र सरकारकडून १३ मे रोजी कोविशिल्ड लसीच्या दोन डोसमधील अंतर दुप्पट करत १२ ते १६ आठवडे निश्चित करण्यात आलं होतं. हा निर्णय वैज्ञानिकांच्या गटाने केलेल्या शिफारशींनुसार घेतल्याचं सांगण्यात आलं होतं. परंतु, आता यासंदर्भात तज्ज्ञांनी धक्कादायक खुलासा केला आहे. लसीच्या दोन डोसमधील अंतर वाढवून दुप्पट करण्याला आमचा पाठिंबा नव्हता, असा खुलासा तज्ज्ञ गटातल्या ३ सदस्यांनी केला आहे. त्यामुळे केंद्र सरकारच्या निर्णयावर प्रश्नचिन्ह निर्माण झालं आहे. एकीकडे देशात लसींचा तुटवडा असताना केंद्र सरकारने कोविशिल्डच्या दोन डोसमधील अंतर वाढवण्याचा निर्णय जाहीर केला होता.

दरम्यान, 13 मे रोजी केंद्र सरकारनं कोविशील्ड लसीच्या दोन डोसमधील अंतर दुप्पट केलं होतं. त्यावेळी केंद्र सरकारच्या नॅशनल टेक्निकल ऍडव्हायझरी ग्रुप ऑन इम्युनायजेशन (NTAGI) मधील वैज्ञानिकांच्या शिफारशीनुसार हा निर्णय घेण्यात आल्याचे सांगितले होते. परंतु, यापैकी काही तज्ज्ञांनी खुलासा केला आहे की या गटाने अंतर दुप्पट करण्याला कधीही समर्थन दिलं नव्हतं. आरोग्यमंत्रालयानं स्पष्टीकरणात ज्या वैज्ञानिकांच्या संस्थेचं नाव घेतलं होतं, त्या संस्थेमधील तीन वैज्ञानिकांनी आपण कोणतीच शिफारस केली नसल्याचं म्हटलं आहे. या संस्थेमध्ये एकूण 14 सदस्य आहेत. तसेच या निर्णयासाठी कोणताही वैज्ञानिक आधार असल्याचं आम्हाला माहिती नाही, असंही ते म्हणाले आहेत.

नॅशनल इन्स्टिट्युट ऑफ एपिडेमोलॉजीचे माजी संचालक एम. डी. गुप्ते रॉयटर्सशी बोलताना म्हणाले कि, “जागतिक आरोग्य संघटनेने दिलेल्या सल्ल्यानुसार NTAGI च्या वैज्ञानिकांनी ८ ते १२ आठवड्यांपर्यंत अंतर वाढवण्यावर सहमती दर्शवली होती. पण १२ ते १६ आठवडे हे केंद्र सरकारचे आकडे आहेत. दोन डोसमधील अंतर १२ आठवड्यांपेक्षा जास्त झालं, तर त्याचे कोणते संभाव्य परिणाम होऊ शकतात, याचा कोणताही डेटा NTAGI कडे नाही.” NTAGI मधले दुसरे सदस्य मॅथ्यु वर्गेसी यांनी गुप्तेंच्या दाव्याला दुजोरा देत म्हटले कि, “NTAGI ने फक्त ८ ते १२ आठवड्यांपर्यंत अंतर वाढवावं असा सल्ला दिला होता.”

दरम्यान, भारताचे अग्रणी वायरोलॉजिस्ट शाहीद जमील यांनी केंद्र सरकारच्या कोरोना हाताळण्याच्या पद्धतीवर टीका करत तीव्र आक्षेप घेतला. ते म्हणाले, “दोन डोसमधील अंतर दुप्पट करण्याच्या निर्णयामागची कारणं संबंधित यंत्रणांनी स्पष्ट करावीत. कोरोनाचा प्रसार वाढत असताना आपण मोठ्या प्रमाणावर लोकांचे लसीकरण करून त्यांचे संरक्षण केले पाहिजे.”

The post कोविशिल्डच्या दोन डोसमधील अंतर दुप्पट करण्याला समर्थन दिलंच नव्हतं, वैज्ञानिकांचा धक्कादायक खुलासा appeared first on थोडक्यात घडामोडी.

नवी दिल्ली : केंद्राने आज खासगी रुग्णालयांसाठी कोविड लसीचे जास्तीत जास्त दर निश्चित केले आहेत. त्याअंतर्गत कोविशील्डची किंमत ७८० रुपये, कोवॅक्सीनची किंमत 1410 रुपये आणि रशियन लस स्पुटनिक व्ही लसीची किंमत 1145 रुपये इतकी आहे.

निर्धारित दरासाठी दररोज किंमतींवर नियंत्रण ठेवले जाईल आणि परीक्षण केले जाईल. अधिक शुल्क आकारल्यास कोणत्याही खासगी लसीकरण केंद्रावर कठोर कारवाई केली जाईल. तसेच 150 रुपयांपेक्षा जास्त सर्व्हिस चार्ज न आकारण्याचा सूचना दिल्या आहेत. राज्य सरकारांनी त्यांचे निरीक्षण करायचे आहे.

The post ब्रेकिंग : केंद्र सरकारने खासगी रुग्णालयांसाठी कोरोना लसीचे कमाल दर केले निश्चित appeared first on थोडक्यात घडामोडी.

नवी दिल्ली : कोविशिल्ड लसीच्या दुसऱ्या डोससाठी अगोदरच घेतलेली वेळ म्हणजेच अपॉईंटमेंट वैध असेल आणि को-विन पोर्टलवर ती रद्द केला जाणार नसल्याचे केंद्रीय आरोग्य मंत्रालयाने आज स्पष्ट केले. मंत्रालयाने म्हटले आहे की को-विन पोर्टलमध्ये आवश्यक बदल केले गेले आहेत, परिणामी लाभार्थ्याला पहिला डोस घेतल्यानंतर 84 दिवसांच्या आत ऑनलाइन अपॉईंटमेंट मिळू शकणार नाही.

13 मे रोजी केंद्राने कोविशिल्ड लसीच्या पहिल्या आणि दुसर्‍या डोसमधील कालावधी 12-16 आठवड्यांपर्यंत वाढविला आहे. भारत सरकारने या बदलाबाबत राज्ये आणि केंद्रशासित प्रदेशांना माहिती दिली आहे. कोविशिल्ड लसीचा दुसरा डोस घेण्यास 12-16 आठवड्याच्या अंतराने सूचित करण्यासाठी को-विन पोर्टलमध्ये देखील आवश्यक बदल केले गेले आहेत.

सध्या को-विन पोर्टलवर दुसऱ्या डोससाठी 84 दिवसांपेक्षा कमी कालावधीत ज्यांनी अॅपॉईंटमेंट घेतली आहे, त्यांना डोस न मिळताच माघारी यावे लागत आहे. मात्र, ज्यांनी यापूर्वी दुसऱ्या डोससाठी अपॉईंटमेंट घेतली आहे, ती वैध राहणार आहे. परंतु, पहिला डोस घेणाऱ्या लाभार्थ्यांना दुसर्‍या डोस 84 दिवसांनंतर घेण्याचा सल्ला देखील देण्यात आला आहे.

#LargestVaccineDrive

#CoWIN digital Portal Reconfigured to Reflect Change in Dose Interval of #Covishield Vaccine to 12-16 weeks.

Already Booked Online appointments for 2nd Covishield Dose will remain Valid.https://t.co/fue31c2uEI pic.twitter.com/eJXEF7i1Gw

— Ministry of Health (@MoHFW_INDIA) May 16, 2021

The post कोविशिल्डच्या दुसऱ्या डोससाठी अगोदरच घेतलेल्या अपॉईंटमेंटचं काय होणार? सरकारने केलं स्पष्ट.. appeared first on थोडक्यात घडामोडी.

नवी दिल्ली : कोविशील्ड लसीच्या दोन डोसमधील अंतर 12 ते 16 आठवड्यांपर्यंत वाढविण्यात आले आहे. राष्ट्रीय लसीकरण तांत्रिक सल्लागाराने कोविड विरोधी कोविशील्ड लसीच्या दोन डोसमधील अंतर वाढवून 12-16 आठवड्यांपर्यंत करण्याची शिफारस केली होती, जी स्वीकारण्यात आली आहे. केंद्रीय आरोग्यमंत्री डॉ. हर्ष वर्धन यांनी याबाबत माहिती दिली.

आरोग्यमंत्र्यांनी ट्विट केले की, “कोविशील्ड लसच्या दोन डोसमधील अंतर 6 ते 8 आठवड्यांपासून 12 ते 16 आठवड्यांपर्यंत वाढविण्यात आले आहे. कोविड वर्किंग ग्रुपने केलेल्या शिफारशींच्या आधारे हा निर्णय घेण्यात आला आहे. ”

Gap between 2 doses of #CovishieldVaccine has been increased to 12-16 weeks from 6-8 weeks currently.

Decision has been taken based on recommendations given by COVID working group after analysing emerging evidence.@PMOIndia @MoHFW_INDIA #Unite2FightCorona pic.twitter.com/kRbbjxGKSJ

— Dr Harsh Vardhan (@drharshvardhan) May 13, 2021

The post कोविशील्ड लसीच्या दोन डोसमधील अंतर 12 ते 16 आठवड्यांपर्यंत वाढविले appeared first on थोडक्यात घडामोडी.

नवी दिल्ली : भारतात पुन्हा कोरोना व्हायरसच्या संसर्गामध्ये वाढ होत असल्याने केंद्र सरकारने कोविशील्ड संदर्भात राज्य आणि केंद्रशासित प्रदेशांना पत्र लिहिले आहे. केंद्राने राज्य व केंद्रशासित प्रदेश सरकारांना कोविशील्ड लसीच्या दोन डोसमधील अंतर वाढविण्यास सांगितले आहे. एनटीजीआय आणि एनईजीव्हीएसीच्या शिफारशीनुसार या दोन डोसमधील अंतर 6-8 आठवडे करण्यास सांगितले आहे.

नॅशनल टेक्निकल अ‍ॅडव्हायझरी ग्रुप आणि लस प्रशासनावरील नॅशनल एक्सपर्ट ग्रुपच्या सूचनेनंतर हे पत्र राज्यांना लिहिले गेले आहे. दुसरा डोस कोणत्याही परिस्थितीत 8 व्या आठवड्यात देण्यात येणार असल्याचे केंद्र सरकारने स्पष्ट केले आहे. ही सूचना केवळ कोविशील्डवर लागू होणार आहे. सध्या भारतभर कोविशील्ड लसीचे दोन डोस 28 दिवसांच्या अंतराने दिले जात आहेत. नवीन शिफारसींमध्ये असे म्हटले आहे की कोविशील्ड चा दुसरा डोस सद्य 28 दिवसांच्या अंतरांऐवजी 6-8 आठवड्यांनंतर दिला तर रोग प्रतिकारशक्ती आणखी वाढू शकते.

The post बिग ब्रेकिंग : केंद्राकडून महत्वाच्या सूचना, कोविशील्ड लसीच्या दोन डोसमधील अंतर वाढवा appeared first on थोडक्यात घडामोडी.

नवी दिल्ली : भारतात आतापर्यंत ५२ लाख ९० हजार ४७४ नागरिकांना कोरोना प्रतिबंधक लसचा पहिला डोस देण्यात आला. ५ फेब्रुवारी २०२१ रोजी लसीकरणाची १ लाख ४ हजार ७८१ सत्र पार पडली आणि ३ लाखांपेक्षा जास्त जणांना कोरोना प्रतिबंधक लसचा पहिला डोस देण्यात आला. लवकरच कोरोना लसीची भारतीय बाजारात खुली विक्री देखील सुरू होणार आहे.

कोरोना प्रतिबंधक लसीचा पहिला डोस १६ जानेवारी देण्यात आला. २२ नागरिकांचा लस घेतल्यापासून काही दिवसांत वेगवेगळ्या कारणाने मृत्यू झाला. मागील २४ तासांत उत्तर प्रदेशमधील आग्रा येथे राहणाऱ्या एका ७७ वर्षांच्या व्यक्तीचा मृत्यू झाला. लस घेतल्यानंतर सात दिवसांनी या व्यक्तीचा मृत्यू झाला. या व्यक्तीला मधुमेहाचा प्रचंड त्रास होता. लस घेतलेल्यांपैकी एकाही व्यक्तीच्या मृत्यूचे कारण कोरोना प्रतिबंधक लस नाही.

लस घेतल्यानंतर हॉस्पिटलमध्ये दाखल झालेल्यांचे भारतातील प्रमाण ०.०००५ टक्के एवढे आहे. मागील २४ तासांत लस घेतल्यानंतर एकाही व्यक्तीला हॉस्पिटलमध्ये दाखल केलेले नाही. कोरोना प्रतिबंधक लस अतिशय सुरक्षित आहे. या लसचा पहिला डोस घेतल्यानंतर २८ दिवसांच्या अंतराने दुसरा डोस दिला जातो. लसचे दोन्ही डोस घेतल्याने शरीरात कोरोना या संसर्गजन्य आजाराला प्रतिबंध करणारी रोगप्रतिकारक शक्ती विकसित होते.

पुण्याच्या ‘सिरम इन्स्टिट्युट ऑफ इंडिया’ने कोविशिल्ड आणि हैदराबादच्या ‘भारत बायोटेक’ने कोवॅक्सिन विकसित केली आहे. सध्या भारतात कोविशिल्ड आणि कोवॅक्सिन या दोन लसच्या माध्यमातून लसीकरण सुरू आहे. दोन्ही लस दोन ते आठ अंश से. तापमानात दीर्घकाळ सुरक्षित राहू शकतात.

जगभर डॉक्टर, मेडिकल स्टाफ, फ्रंटलाइन वर्कर आणि ज्येष्ठ नागरिक यांना प्राधान्याने लस दिली जाणार आहे. अठरा वर्षे झालेले ते पन्नाशीच्या आतले अशा मोठ्या समुदायाची मागणी सरकारी लसीकरणातून लवकर पूर्ण होणे कठीण आहे. याच कारणामुळे मार्चपासून भारत बायोटेक कंपनीच्या कोवॅक्सिन आणि ऑगस्ट महिन्यापासून पुण्याच्या सीरम इन्स्टिट्युट ऑफ इंडिया या संस्थेने तयार केलेल्या कोविशिल्ड लसची भारतीय बाजारात खुली विक्री सुरू होणार आहे. विक्री सुरू झाल्यामुळे ज्यांना लवकर लस मिळणार नाही पण लसीकरण करुन घेण्याची इच्छा आहे त्यांची सोय होणार आहे.

कुणाला लगेच लस नाही…
गरोदर महिला आणि १८ पेक्षा कमी वयाच्या मुलांना सध्या लस देणार नाही. लसीकरण मोहिमेच्या माहितीचे विश्लेषण करुन काही महिन्यांनंतर गरोदर महिला आणि १८ पेक्षा कमी वयाच्या मुलांसाठी लसीकरणाबाबतचे निर्णय होतील. लसीकरण ऐच्छिक असले तरी पात्र व्यक्तींनी कोरोना प्रतिबंधक लस घ्यावी, असे आवाहन नागरिकांना करण्यात आले आहे.

The post ब्रेकिंग : कोरोना लसीची भारतीय बाजारात खुली विक्री सुरू होणार.. जाणून घ्या… appeared first on थोडक्यात घडामोडी.

कोविशील्ड लस (Covishield vaccine) आणि कोवॅक्सिन (Covaxin) यांनी जारी केलेल्या फॅक्टशीटमध्ये कोणत्या लोकांना ही लस घेऊ नये, याबाबत स्पष्ट करण्यात आले आहे.

कोवॅक्सिन बनवणाऱ्या भारत बायोटेकने गर्भवती आणि स्तनपान देणाऱ्या महिला तसेच तीव्र ताप, रक्तस्त्राव विकार असलेल्या व्यक्तींना फॅक्टशीटमध्ये ही लस न घेण्याचा सल्ला दिला आहे. तर कोविशील्डची निर्मिती करणार्‍या सीरम इन्स्टिट्यूटने आपल्या फॅक्टशीटमध्ये अशा व्यक्तींना लस न घेण्याचा सल्ला दिला आहे, ज्यांना लसीच्या कोणत्याही घटकापासून गंभीर ऍलर्जीची समस्या आहे.

कोवॅक्सिन लस कोणी घेऊ नये :

1. ज्या व्यक्ती रोग प्रतिकारशक्तीवर परिणाम करणारी औषधे घेतात
2. ज्यांना ऍलर्जीचा इतिहास आहे
3. ताप आहे
4. रक्तस्त्राव डिसऑर्डर असेल किंवा रक्त पातळ आहे, अशा लोकांनी कोवॅक्सिन लस घेऊ नये.
5. गर्भवती आणि स्तनपान देणाऱ्या महिलांनाही कोवॅक्सिन लस घेऊ नये, कारण त्यांच्यावर लसीचा अभ्यास केलेला नाही.
6. याशिवाय कोरोना विषाणूची दुसरी लस घेतलेल्या लोकांनीही कोवॅक्सिन घेऊ नये. लस घेण्यापूर्वी हेल्थकेअरने नमूद केलेल्या इतर गंभीर आरोग्य समस्यांविषयी जाणून घ्या.

कोविशील्ड कोणी घेऊ नये :

1. ज्या लोकांना कोविशील्डच्या कोणत्याही घटकापासून गंभीर ऍलर्जीची समस्या आहे, त्यांनी ही लस घेऊ नये. या लसीमध्ये एल-हिस्टिडाइन, एल-हिस्टिडाइन हायड्रोक्लोराइड मोनोहायड्रेट, डिसोडियम एसीटेट डायहाइड्रेट (EDTA) आणि इंजेक्शनसाठी पाणी हे घटक आहेत.
2. कोविशील्डचा प्रथम डोस घेतल्यानंतर ऍलर्जीची समस्या आल्यास दुसरा डोस घेणे टाळा.

दोन्ही औषध कंपन्यांच्या फॅक्टशीटमध्ये म्हटले आहे की आरोग्याशी संबंधित सर्व माहिती जसे की वैद्यकीय स्थिती, ऍलर्जीची समस्या, ताप, इम्युनो-कॉम्प्रोमाइज्ड किंवा इतर कोणतीही लस घेतलेली असेल तर या सर्व गोष्टी सांगा.

सीरम संस्था आणि भारत बायोटेक या दोघांनीही त्यांच्या कोरोना विषाणूच्या लसीचा धोका आणि दुष्परिणाम नोंदवले आहेत. यात इंजेक्शनच्या ठिकाणी सूज, वेदना, लालसरपणा आणि खाज सुटणे या लक्षणांचा समावेश आहे. याशिवाय लस घेतलेला हात अकडने, वेदना, डोकेदुखी, ताप, अस्वस्थता, थकवा, पुरळ, मळमळ आणि उलट्या असे काही सामान्य दुष्परिणाम जाणवू शकतात.

भारत बायोटेकने आपल्या फॅक्टशीटमध्ये म्हटले आहे कि, क्लिनिकल चाचण्यांमध्ये कोवॅक्सिनने चार आठवड्यांनंतर दिल्या गेलेल्या दुसर्‍या डोसने संसर्गाविरूद्ध प्रतिकारशक्ती निर्माण केली आहे. तथापि, कोवॅक्सिनची क्लिनिकल कार्यक्षमता अद्याप जारी केली गेली नाही, कारण त्यावरील तिसऱ्या फेजचा अभ्यास अद्याप चालू आहे.

सीरम संस्थेने आपल्या फॅक्टशीटमध्ये म्हटले आहे कि, ४ ते 12 आठवड्यांच्या दरम्यान देण्यात आलेल्या लसीच्या दोन डोसमुळे कोरोनापासून संरक्षण मिळू शकते. ही लस किती काळ संरक्षण देईल याबद्दल माहिती नाही, परंतु कोविशील्डच्या दुसर्‍या डोसनंतर संरक्षणात्मक इम्यूनोलॉजिकल रिस्पॉन्स 4 आठवड्यांपर्यंत मिळू शकतो.

The post ‘या’ समस्या असतील तर कोविशील्ड आणि कोवॅक्सिन लस घेऊ नका, सीरम आणि भारत बायोटेकने दिली माहिती appeared first on थोडक्यात घडामोडी.

भारतात कोरोना लसीची प्रतीक्षा आहे. आज ‘कोविशील्ड‘ या लशीला भारतात मान्यता मिळण्याची शक्यता आहे. सुरुवातीला ही लस भारतात आपत्कालीन वापरासाठी मंजूर केली जाऊ शकते. सब्जेक्ट एक्सपर्ट कमिटीची (SEC) आज (बुधवार) कोरोना लसीवर बैठक होणार असून त्यामध्ये भारतामध्ये कोरोना लस मंजूर करण्याचा निर्णय घेण्यात येणार आहे.

ब्रिटनमध्ये ऑक्सफोर्ड युनिव्हर्सिटीच्या लशीला मान्यता मिळाली आहे. तिच्याशी संबंधित कोविशील्ड लशीला भारतात वापरास मान्यता देण्याची प्रतिक्षा आहे, त्यावर आज बैठक होणार आहे. भारतात ही बैठक महत्त्वपूर्ण आहे, कारण बुधवारी ब्रिटनने ऑक्सफोर्डच्या कोरोना लसीच्या वापरास मान्यता दिली आहे. काही दिवसांत ब्रिटनमधील लोकांना ऑक्सफोर्ड-अ‍ॅस्ट्राजेनेकाच्या कोरोना लशीचा डोस मिळण्यास प्रारंभ होईल.

सिरम इन्स्टिट्यूट भारतात ऑक्सफोर्ड- अ‍ॅस्ट्राजेनेकाची कोरोना लस बनवित आहे. सीरम इन्स्टिट्यूटच्या म्हणण्यानुसार, भारतात कोविशील्डचे सुरुवातीचे 4-5 कोटी डोस साठवले गेले आहेत.

भारत सरकारच्या वतीने लस देण्याची तयारी आधीच सुरू आहे. सुरुवातीला प्रामुख्याने ही लस 30 कोटी लोकांपर्यंत पोहचविण्यावर भर आहे, ज्यामध्ये कोरोना वॉरियर्सला प्राधान्य दिले जाईल. आरोग्य कर्मचारी, पोलिस, कोरोना वॉरियर्स, 50 वर्षांच्या पुढील लोक आणि आजारी लोक यांना प्राधान्य दिले जाईल.

The post मोठी बातमी : ‘कोविशील्ड’ कोरोना लशीला आज भारतात मान्यता मिळण्याची शक्यता appeared first on थोडक्यात घडामोडी.

पंतप्रधान नरेंद्र मोदी आज (शनिवारी) पुणे, अहमदाबाद आणि हैदराबाद या तीन शहरांचा दौरा करुन कोरोनावर मात करण्यासाठी तयार होत असलेल्या लशींच्या संशोधनाचा आढावा घेणार आहेत. पुण्यात सीरम इन्स्टिट्युट ऑफ इंडिया, अहमदाबादमध्ये झायडस कॅडिला पार्क आणि हैदराबादमघ्ये भारत बायोटेक कंपनीला भेट देऊन पंतप्रधान लशींच्या संशोधनाचा आढावा घेतील.

पंतप्रधान नरेंद्र मोदी गुजरातमध्ये अहमदाबाद येथे जातील. अहमदाबाद नंतर पंतप्रधान पुण्यात येतील आणि पुण्यातून ते हैदराबादला रवाना होतील. हैदराबादच्या दौऱ्यानंतर ते दिल्लीला जाणार आहेत.

दरम्यान, पंतप्रधानांच्या दौऱ्याआधी सिरम इन्स्टिट्यूट आणि पुण्यातील काही महत्वाच्या भागांत पोलिसांनी कडेकोट सुरक्षाव्यवस्था तैनात केली आहे. सिरम इन्स्टिट्यूटमध्येही सॅनिटायजेशन व स्वच्छतेविषयीचे सर्व नियम पाळून मोदींच्या दौऱ्याची तयारी करण्यात आली आहे. दुपारी ४ वाजता मोदी तेथे दाखल होतील. यानंतर सिरम इन्स्टिट्यूटचे मुख्य कार्यकारी अधिकारी अदर पुनावाला यांच्यासह शास्त्रज्ञ आणि संशोधकांशी ते संवाद साधणार आहेत.

The post पंतप्रधान मोदी यांचा आज पुणे, अहमदाबाद आणि हैदराबाद दौरा, लशींच्या संशोधनाचा आढावा घेणार appeared first on थोडक्यात घडामोडी.