मुंबई : एलपीजी सिलिंडरच्या किंमतीमध्ये वाढ झाली आहे. १ नोव्हेंबर रोजी कमर्शिअल सिलिंडरच्या दरात तब्बल 266 रुपयांनी वाढ करण्यात आली आहे. दिवाळीच्या तोंडावर झालेल्या या वाढीमुळे सामान्य नागरिकांच्या खिशाला मोठी कात्री लागली आहे. राजधानी दिल्लीमध्ये 19 किलो वजनाच्या कमर्शिअल सिलिंडरची किंमत दोन हजार रुपयांच्या पुढे गेली आहे.

घरगुती वापरासाठीच्या 14.2 किलो विनाअनुदानित एलपीजी सिलिंडरच्या किंमतीत कोणतीही वाढ झालेली नाही, ही थोडी दिलासादायक बाब म्हणावी लागेल. विनाअनुदानित एलपीजी सिलिंडरची किंमत 899.50 रुपयांवर कायम आहे. गेल्या महिन्यात तेल कंपन्यांनी सबसिडी फ्री 14.2 किलोच्या सिलेंडरची किंमत 15 रुपयांनी वाढवली होती.

राजधानी दिल्लीमध्ये 19 किलो वजनाच्या कमर्शिअल सिलिंडरची किंमत 1734 रुपयांवरुन 2000.50 रुपये इतकी झाली आहे. मुंबईमध्ये 1683 रुपयांना मिळणारा कमर्शिअल सिलिंडर आता 1950 रुपयांना मिळेल. कोलकातामध्ये 19 किलो वजनाचा कमर्शिअल सिलिंडर 2073.50 रुपयांना झाला असून चेन्नईमध्ये 19 किलो वजनाचा कमर्शिअल सिलिंडर घेण्यासाठी 2133 रुपये मोजावे लागतील.

The post महागाईचा भडका! दिवाळीच्या सुरुवातीलाच एलपीजी सिलिंडरच्या किंमतीमध्ये मोठी वाढ appeared first on थोडक्यात घडामोडी.