सोलापूर : एका शिक्षकाने पत्नी आणि मुलाची निर्घृण हत्या करून आत्महत्या केल्याची धक्कादायक घटना सोलापूरच्या बार्शी शहरात घडली आहे. बार्शी शहरातील नाईकवाडी प्लॉटमध्ये ही घटना उघडकीस आली आहे. अतुल मुंडे (वय 38) असे पत्नी व मुलाची हत्या करून आत्महत्या केलेल्या शिक्षकाचे नाव आहे. अतुल यांची पत्नी तृप्ती मुंडे (वय 37) देखील शिक्षिका होती.

मिळालेल्या माहितीनुसार, मुंडे पती-पत्नी दोघेही शिक्षक म्हणून कार्यरत होते. मात्र, अतुल मुंडे यांनी एवढे टोकाचे पाऊल का उचलले याचे कारण अद्याप स्पष्ट झालेले नाही. पोलीस घटनास्थळी पोहोचले असून, अतुलने पत्नीचा गळा चिरून तिची हत्या केली व ११ वर्षीय मुलाच्या तोंडावर उशी ठेऊन त्याची हत्या केली, त्यानंतर त्याने स्वत: आत्महत्या केल्याचा संशय पोलिसांनी व्यक्त केला आहे.

अतुल मुंडे हे बार्शी शहरातील नाईकवाडी प्लॉटमध्ये कुटुंबासह राहत होते. वरच्या मजल्यावर हे दाम्पत्य राहत होते तर खालच्या मजल्यावर अतुल मुंडे यांचे आई-वडील राहत होते. आज सकाळी उशिरापर्यंत कुणीही खाली न आल्यामुळे त्यांच्या आईने वरती जाऊन बघितले असता हा प्रकार उघडकीस आला. मुंडे यांच्यासह त्यांच्या पत्नी आणि मुलाचे मृतदेह आढळून आले. याबाबत माहिती मिळताच पोलीस घटनास्थळी दाखल झाले. अतुल मुंडे यांनी पत्नी आणि मुलाची हत्या करून आत्महत्या केल्याचे पोलिसांच्या प्राथमिक तपासात समोर आले आहे. मात्र, या घटनेची सर्व बाजूंनी चौकशी करण्यात येत आहे.

The post शिक्षकाची पत्नी आणि मुलाची निर्घृण हत्या करून आत्महत्या, सोलापूरच्या बार्शी शहरातील धक्कादायक घटना appeared first on थोडक्यात घडामोडी.