पुणे : पुण्यात झोमॅटो डिलिव्हरी बॉयवर हल्ला झाल्याचे प्रकरण समोर आले आहे. मोटार सायकलवरून आलेल्या दोन अनोळखी व्यक्तींनी डिलिव्हरी बॉयवर हल्ला करून त्याला लुटले. ही घटना निकमार कॉलेज हॉस्टेल, बालेवाडीचे गेट नं. 2 जवळ रस्त्यावर काल (१२ एप्रिल) दुपारी २. २० वाजता घडली. याप्रकरणी डिलिव्हरी बॉयने पोलिसांत तक्रार दिली असून पोलीस तपास करत आहेत.

मिळालेल्या माहितीनुसार, झोमॅटो डिलिव्हरी बॉय सौरभ गंगणे, (वय-21, रा. शास्त्रीनगर, काळेवाडी, पुणे) हा झोमॅटोची डिलिव्हरी देवुन परत जात होता. यावेळी दुचाकीवरून आलेल्या २ व्यक्तींनी पत्ता विचारण्याच्या बहाण्याने सौरभला थांबवले. नंतर त्यांची गाडी आडवी लावून सौरभच्या डाव्या हाताच्या मनगटावर कोयत्याने वार करून त्याच्या खिशामधील पाकीट जबरदस्तीने काढून घेतले, त्यामधील 1,700 रूपये, बँकेचे एटीएम कार्ड व इतर महत्वाची कागदपत्रे तसेच एक 5,000 रुपयांचा मोबाईल, सॅकमधील मोबाईलचा चार्जर, ब्ल्युटुथ असा ऐवज जबरदस्तीने चोरी करून नेला.

डिलिव्हरी बॉय सौरभ गंगणे याने याप्रकरणी चतु:श्रृंगी पोलीस स्टेशनमध्ये तक्रार दाखल केली आहे. पोलिसांनी गुन्ह्याची नोंद करून घेतली असून पुढील तपास सुरु आहे.

The post पुण्यात झोमॅटो डिलिव्हरी बॉयवर हल्ला, कोयत्याने हातावर वार करून लुटले appeared first on थोडक्यात घडामोडी.