मुंबई : शिवसंग्राम संघटनेचे नेते आणि माजी आमदार विनायक मेटे यांच्या चालकाविरोधात मुंबई-पुणे एक्स्प्रेसवेवर झालेल्या भीषण अपघातप्रकरणी सदोष मनुष्यवधाचा गुन्हा दाखल करण्यात आला आहे. या प्रकरणी सीआयडीकडून तपास करण्यात येत असून सीआयडीकडून रसायनी पोलीस ठाण्यात हा गुन्हा दाखल केला गेला आहे.

विनायक मेटे यांचा मुंबई-पुणे एक्स्प्रेसवेवर झालेल्या भीषण अपघातात मृत्यू झाला होता. या घटनेनंतर सीआयडी चौकशीचे आदेश देण्यात आले होते. ज्या मार्गावरून विनायक मेटे यांची कार अपघातास्थळापर्यंत पोहोचली त्या मार्गांवरील प्रत्येक सीसीटीव्ही कॅमेऱ्यांचे व्हिडिओ फुटेज सीआयडीने तपासले होते. याशिवाय या अपघातामध्ये कोणाची चूक दिसते आहे? हे समजून घेण्यासाठी आयआरबीचे इंजिनीअर, आणि इतर रोड इंजिनीअर्सची एक तांत्रिक समिती बनवून त्यांच्याकडून एक मत घेण्यात आलं होतं. तपासानंतर सीआयडीने कलम ३०४ (२) नुसार सदोष मनुष्यवधाचा गुन्हा दाखल केला आहे.

विनायक मेटे यांच्या गाडीला १४ ऑगस्ट २०२२ रोजी पहाटे पाच वाजता मुंबई पुणे एक्स्प्रेस हायवेवर भीषण अपघात झाला होता. त्यांना नवी मुंबईतील एमजीएम रुग्णालयात दाखल केलं होतं. परंतु तिथे विनायक मेटे यांना मृत घोषित करण्यात आलं होतं. मुख्यमंत्री एकनाथ शिंदे यांनी रुग्णालयात जाऊन परिस्थितीची माहिती घेतली होती. यानंतर या अपघात आणि मृत्यू प्रकरणी सीआयडी चौकशी करून आपला निष्कर्ष सादर करण्याचे आदेश मुख्यमंत्री शिंदे यांनी पोलीस महासंचालक रजनीश सेठ यांना दिले होते.

सीआयडीने सीसीटीव्ही फुटेज तपासले त्यात १४० ते १२० च्या वेगाने मेटेंचा चालक हा कार चालवत असल्याचे निदर्शनास आले. याशिवाय अपघात झालेल्या घटनेच्या ठिकाणीही तपास करण्यात आला. कारला अपघात होण्यापूर्वी चालक एकनाथ कदम राइट घेऊन ओव्हरटेक करण्याचा प्रयत्न केला. पण त्या बाजूला जागा नव्हती कारण आधीच एक गाडी ओव्हरटेक करण्याचा प्रयत्न करत होती. यामुळे ओव्हरटेक करता येणार नाही हे चालक एकनाथ कदमच्या लक्षात आलं होतं, पण तरीही त्याने कार तिथे घातली. आणि त्यामुळे डाव्याबाजूला धक्का बसला आणि हा भीषण अपघात झाला. सीआयडीच्या तपासात हे समोर आलं आणि त्यानंतर रसायनी पोलीस ठाण्यात चालकाविरोधात गुन्हा दाखल करण्यात आला. मेटेंचा चालक एकनाथ कदम याला पोलीस लवकरच ताब्यात घेतील.

The post विनायक मेटे अपघातप्रकरणी मोठी माहिती, सीआयडीकडून मेटेंच्या चालकाविरोधात सदोष मनुष्यवधाचा गुन्हा दाखल appeared first on थोडक्यात घडामोडी.

मुंबई : शिवसंग्राम संघटनेचे अध्यक्ष विनायक मेटे यांच्या मृत्यू प्रकरणाची सीआयडी चौकशी करण्यात येणार आहे. मुख्यमंत्री एकनाथ शिंदे यांनी पोलीस महासंचालकांना सीआयडी चौकशी करण्याचे आदेश दिले आहेत. पाच वेळा विधानपरिषद आमदार राहिलेले विनायक मेटे भाजपसोबत युतीमध्ये होते. विनायक मेटे यांचं १४ ऑगस्ट रोजी मुंबई-पुणे एक्स्प्रेस वेवर झालेल्या भीषण कार अपघातात निधन झालं.

दरम्यान, मेटे यांची पत्नी ज्योती मेटे यांनी कार चालकाच्या दाव्यावर संशय व्यक्त केला आहेत. त्यामुळे मेटेंच्या मृत्यू प्रकरणाबाबत घातपाताचा संशय निर्माण झाला आहे. अखेर या सर्व बाबींची राज्य सरकारने दखल घेतली असून हे प्रकरण सीबीआयकडे सोपवण्याचा निर्णय घेण्यात आला आहे.

अपघातात मेटे यांच्या डोक्याला गंभीर दुखापत झाली होती. त्यानंतर उपचारासाठी रुग्णालयात दाखल केले असता डॉक्टरांनी त्यांना मृत घोषित केलं. दरम्यान विनायक मेटे यांचा अपघात नसून घातपात झाल्याचा संशय व्यक्त केला जात आहे. मुख्यमंत्र्यांनी या प्रकरणाची चौकशी केली जाईल, असं सांगितलं. ही चौकशी पारदर्शकपणे व्हावी, अशी मागणी विनायक मेटे यांच्या पत्नी ज्योती मेटे यांनी केली.

The post विनायक मेटे यांच्या अपघाताची CID चौकशी होणार, मुख्यमंत्री एकनाथ शिंदेंचे आदेश appeared first on थोडक्यात घडामोडी.

बीड : शिवसंग्राम पक्षाचे नेते विनायक मेटे यांचे रविवारी (14 ऑगस्ट) पहाटे अपघाती निधन झाले. मेटे यांच्या पार्थिवावर आज दुपारी 3 वाजेच्या सुमारास बीड येथील उत्तमनगरमध्ये अंत्यसंस्कार करण्यात येणार आहेत. हवाई रुग्णवाहिकेतून त्यांचे पार्थिव औरंगाबाद व त्यानंतर बीडला नेण्यात येईल. अंत्यविधीसाठी राज्यभरातील कार्यकर्ते येणार असल्याची माहिती शिवसंग्रामच्या नेत्यांनी दिली.

दरम्यान, मेटे यांच्या अपघाती मृत्यूची चौकशी करण्याचे आदेश मुख्यमंत्र्यांनी दिले आहेत. त्यानंतर तपासासाठी 8 जणांची टीम तयार करण्यात आल्याचे रायगडचे पोलिस अधीक्षक अशोक दुधे यांनी सांगितले. चालकाचा गाडीवरील ताबा सुटल्याने मेटे यांच्या कारने अज्ञात वाहनाला धडक दिल्याचे पोलिसांनी नोंदवलेल्या फिर्यादीत म्हटले आहे. हा अपघात होता की घातपात, याची चौकशी करावी, अशी मागणी मराठा ठोक क्रांती मोर्चाचे बाळासाहेब खैरे पाटील यांनी केली.

रविवारी दुपारी 12 वाजता मुंबईतील सह्याद्री अतिथीगृह येथे मुख्यमंत्री एकनाथ शिंदे यांनी मराठा आरक्षणासंदर्भात बैठक आयोजित केली होती. मराठा मोर्चाचे समन्वयक तसेच प्रमुख नेत्यांना बैठकीचे आमंत्रण होते. बैठकीला उपस्थित राहण्यासाठी मेटे शनिवारी रात्री 11 वाजण्याच्या सुमारास बीड येथून निघाले. ते पहाटे पाच वाजण्याच्या सुमारास द्रुतगती महामार्गावरील माडप बोगद्याजवळ आले असता त्यांच्या कारचालकाचा ताबा सुटल्याने कार भरधाव ट्रकला धडकली. महामार्ग पाेलिसांनी त्यांना नवी मुंबईतील एमजीएम रुग्णालयात नेले. मात्र, तेथे डॉक्टरांनी त्यांना मृत घोषित केले.

विनायक मेटे यांच्या अपघाताची माहिती मिळताच मुख्यमंत्री एकनाथ शिंदे, उपमुख्यमंत्री देवेंद्र फडणवीस, विरोधी पक्षनेते अजित पवार रुग्णालयात गेले. संभाजीराजे छत्रपती, प्रवीण दरेकर यांच्यासह मराठा समाजाच्या प्रमुख नेत्यांनी देखील रुग्णालयात धाव घेतली.

The post अखेरचा निरोप! विनायक मेटे यांच्यावर आज दुपारी 3 वाजेच्या सुमारास बीडमध्ये अंत्यसंस्कार appeared first on थोडक्यात घडामोडी.

मुंबई : माजी आमदार विनायक मेटे यांचं अपघाती निधन झालं आहे. ते ५२ वर्षांचे होते. आज मुख्यमंत्र्यांनी मराठा क्रांती मोर्चाची बैठक बोलावली होती, त्याच बैठकीला हजेरी लावण्याकरिता मेटे बीडहून मुंबईकडे येत होते. बीडमध्ये आज मोठा कार्यक्रम असतानाही समाजाच्या प्रश्नाला न्याय मिळवून देण्यासाठी आपली उपस्थिती महत्त्वाची आहे, हे प्रमाण मानून त्यांनी बीडमधला कार्यक्रम सोडला आणि मुंबईच्या दिशेने रवाना झाले. परंतु, मुंबई पुणे द्रुतगती महामार्गावर रायगडच्या हद्दीत त्यांचा अपघात झाला. अपघातानंतर सुमारे तासभर त्यांना मदतच मिळाली नाही, असा गंभीर आरोप त्यांच्या वाहनाच्या चालकाने केला आहे.

मुंबई-पुणे एक्स्प्रेस वेवर खालापूर टोलनाक्याजवळ विनायक मेटे यांच्या वाहनाला पहाटे साडेपाच वाजताच्या सुमारास अपघात झाला होता. या अपघातात मेटे यांच्या डोक्याला गंभीर दुखापत झाली होती. त्यानंतर त्यांना पनवेलमधील एमजीएम रुग्णालयात दाखल करण्यात आलं. मात्र तिथे उपचार सुरू असतानाच मेटे यांनी अखेरचा श्वास घेतला.

शिवसंग्राम पक्षाचे संस्थापक,अध्यक्ष,माजी आमदार विनायक मेटे यांचे अपघातामध्ये दुर्दैवी निधन झाले आहे.त्यांच्या निधनाने शिवस्मारक,मराठा आरक्षण तसेच महाराष्ट्रातील इतर विषयांकरिता आंदोलन करणारा एक बुलंद आवाज हरपला.परमेश्वर त्यांच्या आत्म्यास चिरशांती प्रदान करो.भावपूर्ण श्रद्धांजली! pic.twitter.com/P0HuzfSaZs

— Eknath Shinde – एकनाथ शिंदे (@mieknathshinde) August 14, 2022

The post दुःखद! शिवसंग्राम पक्षाचे अध्यक्ष विनायक मेटे यांचं भीषण अपघातात निधन appeared first on थोडक्यात घडामोडी.

मुंबई : सर्वोच्च न्यायालयाने मराठा आरक्षण रद्द केल्यानंतर राज्यातील मराठा समाज आक्रमक झाला आहे. अशातच ठाकरे सरकारने मराठा आरक्षणावरुन मोठा निर्णय घेतला आहे. राज्यातील मराठा विद्यार्थी आणि उमेदवारांना १० टक्के EWS (economic weaker Sections) आरक्षणाचा लाभ घेता येणार आहे. मराठा समाजाला EWS आरक्षण लाभ देण्याचा ठाकरे सरकारने निर्णय घेतला असून याबद्दलचा आदेश जारी करण्यात आला आहे.

सर्वोच्च न्यायालयाने मराठा आरक्षण रद्द केल्यानंतर मराठा समाजाला दिलासा देण्याचा प्रयत्न राज्य सरकारने केला आहे. मराठा आरक्षण रद्द झाल्यामुळे मराठा समाज आक्रमक झाला असून खासदार संभाजीराजे मराठा समाजाच्या भावना जाणून घेण्यासाठी महाराष्ट्राचा दौरा केला. त्यानंतर राष्ट्रवादीचे अध्यक्ष शरद पवार, मुख्यमंत्री उद्धव ठाकरे, देवेंद्र फडणवीस, राज ठाकरे आणि प्रकाश आंबेडकर यांची भेट घेतली. मराठा आरक्षणासाठी सर्वांनी एकत्र येऊन निर्णय घ्यावा, अशी मागणी संभाजीराजेंनी केली. यासह 6 जूनला आपली भूमिका जाहीर करणार असल्याचे संभाजीराजेंनी स्पष्ट केले आहे.

दरम्यान, ठाकरे सरकारच्या या आदेशामुळे मराठा समाजातील तरुणांना शैक्षणिक संस्थांमधील प्रवेशात 10 टक्के आरक्षणाचा लाभ घेता येणार आहे. त्याबरोबर सरळ सेवा भरतीत ही मराठा उमेदवार या आरक्षणाचा 10 टक्के फायदा घेऊ शकणार आहे. राज्यात मराठा आरक्षण लागू असताना मराठा समाजाला 10 टक्के EWS आरक्षणाचा फायदा घेता येत नव्हता तसा निर्णय सरकारने घेतला होता. पण, आता आधीचा निर्णय मागे घेत EWS लागू करण्यात आले आहे.

EWS आरक्षण म्हणजे काय?

1. EWS म्हणजे Economically Weaker Sections अर्थात आर्थिकदृष्ट्या दुर्बल घटक.
2. EWS वर्गातील व्यक्तींना शिक्षण आणि नोकरीत दहा टक्के आरक्षण देण्याचा निर्णय केंद्र सरकारनं २०१९ मध्ये घेतला होता.
3. ज्या कुटुंबाचं वार्षिक उत्पन्न आठ लाखांपेक्षा कमी आहे अशा व्यक्तींना EWS अंतर्गत शिक्षण आणि नोकरीत आरक्षण मिळू शकते.
4. EWS आरक्षणासाठी पात्र व्यक्तींच्या कुटुंबाची शेती पाच एकरापेक्षा जास्त नसावी असं कायद्यामध्ये लिहण्यात आले आहे.

The post मराठा आरक्षण : विद्यार्थी आणि उमदेवारांना मिळणार 10% EWS आरक्षण, ठाकरे सरकारचा मोठा निर्णय appeared first on थोडक्यात घडामोडी.