पालघर : पालघरच्या डहाणू तालुक्यातील देहाणे येथे एका फटाके बनवणाऱ्या कंपनीत मोठा स्फोट झाला आहे. सकाळी १० वाजण्याच्या सुमारास हा स्फोट झाला. स्फोट इतका भयंकर होता की त्याचा आवाज ५ किलोमीटरच्या परिसरात ऐकू आला. तर, सुमारे पाच ते १० किलोमीटर परिसरातील घरांना या स्फोटामुळे मोठे धक्के जाणवले. कारखान्यातून निघणारा धूर कित्येक किलोमीटर अंतरावरही दिसंत आहे. डहाणू महामार्गापासून 15 कि.मी. अंतरावर जंगल परिसरात हा कारखाना आहे.

मिळालेल्या माहितीनुसार, ‘विशाल फायर वर्क्स’ नावाच्या फटाका कंपनीत वेल्डिंगचं काम सुरू होतं, त्याचदरम्यान आग लागल्याने हा स्फोट झाला आहे. कंपनीत मोठ्या प्रमाणात कामगार अडकले असून, त्यांना बाहेर काढण्यासाठी प्रयत्न सुरू आहेत. स्फोटात दहा जण होरपळल्याची माहिती मिळत आहे. अग्निशमन दलाच्या तीन गाड्या घटनास्थळी दाखल झाल्या असून मदत आणि बचावकार्य युद्धपातळीवर सुरू आहे. घटनास्थळी अग्निशमन दलासह तहसीलदार व काही अधिकारी दाखल झाले आहेत.

The post फटाके बनवणाऱ्या कंपनीत मोठा स्फोट, मदत आणि बचावकार्य सुरू appeared first on थोडक्यात घडामोडी.