झारखंड : झारखंडमधील हेमंत सरकार गुन्हेगारी आणि अपघातांना आळा घालण्यासाठी सातत्याने प्रयत्न करत आहे. यातच पोलिसांनी मंगळवारी जमशेदपूर येथील दुहेरी हत्याकांडाचा उलगडा केला. पूर्व सिंगभूम जिल्ह्यातील जमशेदपूर येथे रविवारी झालेल्या दुहेरी हत्याकांडाचा पोलिसांनी मंगळवारी छडा लावला. एका 15 वर्षांच्या मुलीने तिच्या 37 वर्षीय प्रियकरासह तिच्या आई-वडिलांना हातोडा आणि प्रेशर कुकरने मारहाण करून ठार केल्याचे पोलिसांनी उघड केले.

मिळालेल्या माहितीनुसार, सोमवारी एल्को पोलीस ठाण्याच्या हद्दीतील मॅनिफिट येथील जोडप्याचे मृतदेह त्यांच्याच घरी रक्ताच्या थारोळ्यात पडलेले आढळले. पोलिसांनी या प्रकरणाचा तपास सुरु केल्यानंतर त्यांची 15 वर्षांची मुलगी बेपत्ता असल्याचे समोर आले. त्यानंतर संशयाच्या आधारे शोधाशोध केली असता या तरुणीला त्याच्या प्रियकरासोबत ताब्यात घेण्यात आलं. त्यांना मंगळवारी सकाळी बिरसानगर येथील ओमनगरमध्ये राहणारा तिचा प्रियकर सलितकुमार याच्यासोबत त्याच्या भाड्याच्या घरातून पकडण्यात आले.

पोलिस अधीक्षक (शहर) के विजय शंकर यांनी 24 तासांपेक्षा कमी कालावधीत या प्रकरणाची उकल केल्याचा दावा केला आणि सांगितले की मुलगी रविवारी रात्री तिच्या प्रियकरासह घरातून पळून जाऊन लग्न करणार होती, परंतु तिचे पालक जागे झाले. त्यानंतर आई-वडिलांनी तिला बाहेर जाण्यापासून थांबवले असता दोघांनी हातोड्याने व प्रेशर कुकरने त्यांना बेदम मारहाण केली. त्यानंतर तरुणी प्रियकरासह स्कूटरवरून पळून गेली. एसएसपी प्रभात कुमार यांनी मंगळवारी याबाबत खुलासा केला. ते म्हणाले कि, गुन्हेगाराला तुरुंगात पाठवण्यात आले आहे. तसेच, अल्पवयीन मुलीला रिमांड होममध्ये पाठवले जाईल. गुन्हेगारांच्या सांगण्यावरून एक हातोडा, रक्ताने माखलेला प्रेशर कुकर आणि स्कूटर जप्त करण्यात आली आहे. आरोपींविरुद्ध आयपीसीच्या संबंधित कलमांखाली गुन्हा दाखल करण्यात आला आहे.

The post भयंकर! 15 वर्षांच्या मुलीने 37 वर्षीय प्रियकरासह केली आई-वडिलांची हत्या appeared first on थोडक्यात घडामोडी.

पुणे : पुण्यातील चाकण परिसरात दुहेरी हत्याकांडाने खळबळ उडाली आहे. हॉटेल आणि वीटभट्टीचा व्यवसाय करणारा व्यावसायिक बाळू मरगज याने हे हत्याकांड घडवून आणले आहे. बाळू मरगज याची मुलगी त्याच्याच विटभट्टीवर काम करणाऱ्या एका कामगारासोबत पळून गेली होती. याचाच राग मनात धरुन या व्यावसायिकाने हत्या केल्याचं बोललं जात आहे. बाळू सिताराम गावडे (वय 26), राहुल दत्तात्रय गावडे (वय 28) अशी मृतावस्थेत आढळलेल्या दोन कामगारांची नावे आहेत. वीटभट्टी मालक आणि त्याच्या पाच साथीदारांना पोलिसांनी ताब्यात घेतले आहे.

मिळालेल्या माहितीनुसार, खेड तालुक्यातल्या मौजे करंजविहीरे या गावात ही दुहेरी हत्येची घटना घडली आहे. येथे बाळू मरगज नावाच्या या व्यावसायिकाचे ‘माणुसकी’ नावाचे एक हॉटेल असून या हॉटेलच्या समोर बाळू मरगज यांची वीटभट्टीदेखील आहे. वीटभट्टीवर काम करणारा कामगार बाळू सिताराम गावडे याच्यासोबत हॉटेल मालकाच्या 21 वर्षीय मुलीचे प्रेमसंबंध प्रस्थापित झाले होते. त्यातूनच या कामगाराने मालकाच्या मुलीला पळवून नेले. यामध्ये दुसऱ्या एका कामगाराने त्यांची मदत केली होती. त्याचे नाव राहुल दत्तात्रय गावडे होते. राहुल बाळूचा मित्र होता.

बाळू आणि मालकाची मुलगी 14 तारखेला पळून गेले होते. याचा राग हॉटेल मालक आरोपी बाळू मरगज याच्या मनात होता. त्याने आपल्या सहकाऱ्यांच्या मदतीने या तिघांचा शोध घेतला आणि त्यांना हॉटेलवर घेऊन आला. त्यानंतर बाळू गावडे आणि राहुल गावडे यांना तेथे बेदम मारहाण केली. तब्बल सहा जणांनी या दोघांना काठ्या, लोखंडी रॉडने मारहाण केली. यामध्ये दोघांचाही मृत्यू झाला. दोन्ही मृत आसखेड खुर्दचे रहिवाशी आहेत.

पोलिसांनी या प्रकरणी कारवाई करत 6 आरोपींना ताब्यात घेतले आहे. अनिल संभाजी कडाळे, राजू साहेबराव गावडे, किरण बाळू मेंगाळ, चंद्र करा उर्फ मुक्ता बाळू गावडे, आनंदा सीताराम जाधव, हॉटेल मालक बाळू मरगज अशी आरोपींची नावे आहेत.

The post दुहेरी हत्याकांडाने पुण्यात खळबळ! कामगारासोबत मुलगी पळून गेल्याचा राग, व्यावसायिकाने केले भयंकर कृत्य appeared first on थोडक्यात घडामोडी.