मुंबई : एका 58 वर्षीय व्यक्तीने आपल्या अंगात दैवी शक्ती असल्याचे भासवून सलग तीन वर्षे तरुणीवर बलात्कार केल्याची संतापजनक घटना वर्सोवा परिसरातून समोर आली आहे. आरोपीने पीडितेवर 2019 पासून अनेकदा बलात्कार केल्याचा आरोप आहे. सुरुवातीला प्रसादामध्ये गुंगीचे औषध देऊन बलात्कार केल्यानंतर या व्यक्तीने नंतर तिला धमकावून, भीती दाखवून हा प्रकार सुरु ठेवला. अखेर सततच्या अत्याचारांना कंटाळून पीडित मुलीने पोलिसांत तक्रार दाखल केली. पोलिसांनी आरोपीला ताब्यात घेतले आहे.

मिळालेल्या माहितीनुसार, आरोपी सुरेशकुमार हा एका प्रसिद्ध आयटी कंपनीमध्ये नोकरीला आहे. तो अंधेरीच्या म्हाडा कॉलनी परिसरात वास्तव्यास आहे. काही लोकांनी ओळख करून दिल्यानंतर पीडितेचे कुटुंब सुरेश कुमार रवींद्र नारायण अवस्थी नावाच्या स्वयंभू धर्मगुरूच्या संपर्कात आले. त्याने आपल्या अंगात दैवी शक्ती असल्याचे भासवून या कुटुंबातील मुलीला ऑक्टोबर २०१९ मध्ये आपल्या घरी बोलावून प्रसाद खायला दिला. आरोपीने प्रसादामधून गुंगीचे औषध देऊन तिच्यावर बलात्कार केला आणि त्याचे मोबाइलने चित्रीकरण केले. त्यावेळी ही मुलगी अल्पवयीन होती. तिचे आक्षेपार्ह फोटो इंटरनेटवर अपलोड करण्याची धमकी दिली. मोबाइलमधील चित्रीकरणाच्या आधारे मुलीला ब्लॅकमेल करून अंधेरी आणि कुर्ला येथील निवासस्थानी नेऊन तो तिच्यावर लैंगिक अत्याचार करू लागला.

अखेर सततच्या अत्याचारांना कंटाळून मुलीने हा प्रकार घरी सांगितला. त्यानंतर त्यांनी सुरेशकुमार याच्या विरुद्ध वर्सोवा पोलिस ठाण्यात तक्रार केली. त्यांच्या तक्रारीवरून वर्सोवा पोलिसांनी सुरेशकुमार याच्या विरोधात बलात्कार, धमकी तसेच पॉक्सो कायद्यांतर्गत गुन्हा दाखल केला. रविवारी भारतीय दंड संहिता आणि लैंगिक गुन्ह्यांपासून मुलांचे संरक्षण (POCSO) कायद्याच्या तरतुदींनुसार आरोपीला अटक करण्यात आली. अधिक चौकशी सुरू असल्याचे पोलिसांनी सांगितले आहे.

The post मुंबईत खळबळ! अंगात दैवी शक्ती असल्याचे सांगत तरुणीवर तीन वर्षे बलात्कार, स्वयंभू धर्मगुरूचे घृणास्पद कृत्य appeared first on थोडक्यात घडामोडी.

कल्याण : इगतपुरी ते कसारा स्थानकादरम्यान एक धक्कादायक घटना समोर आली आहे. लखनऊ-मुंबई पुष्पक एक्सप्रेस ट्रेनमध्ये एका तरुणीवर बलात्कार झाल्याची घटना घडली आहे. या प्रकरणात लोहमार्ग पोलिसांनी दोघांना अटक केली असून पुढील कारवाई सुरू असल्याचं सांगण्यात येत आहे. लखनऊ-मुंबई पुष्पक एक्सप्रेसमध्ये शुक्रवारी रात्री आठच्या सुमारास दरोडेखोरांनी १५ त २० प्रवाशांची लूटमार केली आणि ट्रेनमध्ये असणार्‍या वीस वर्षांच्या तरुणीवर बलात्कार केला.

पोलिसांनी दिलेल्या माहितीनुसार, इगतपुरी स्थानकातून ट्रेन निघाली आणि बोगद्याजवळ ट्रेन स्लो होते. यावेळी सात-आठ जण ट्रेनमध्ये घुसले. या चोरट्यांनी १५ ते २० प्रवाशांकडून पैसे आणि मोबाइल हिसकावून घेतले. त्यांना बेदम मारहाण केली. अनेक प्रवासी यामध्ये जखमी झाले आहेत. या दरम्यान चोरट्यांनी एका महिलेची छेड काढली तर एका २० वर्षीय तरुणीवर अत्याचार केल्याची माहिती पोलिसांनी दिली आहे. या प्रकरणी अधिक तपास सुरू असून रेल्वेमध्ये ही अशा घटना घडल्यामुळे प्रवाशांमध्ये भीतीचे वातावरण आहे. या प्रकरणात गुन्हा दाखल करण्यात आला असून दरोडेखोरांचा शोध सुरू आहे. या प्रकरणामध्ये पोलिसांनी दोन आरोपींना अटक केली असून त्यांची कसून चौकशी सुरू आहे.

The post ट्रेनमध्ये घुसलेल्या दरोडेखोरांकडून तरुणीवर बलात्कार, इगतपुरी ते कसारा स्थानकादरम्यानची घटना appeared first on थोडक्यात घडामोडी.