नवी दिल्ली : सनरायझर्स हैदराबादने IPL 2021 च्या उर्वरित सामन्यांसाठी न्यूझीलंडचा खेळाडू केन विल्यमसनला संघाचा नवा कर्णधार म्हणून नेमले आहे. या संघाचे नेतृत्व सध्या ऑस्ट्रेलियाचा खेळाडू डेव्हिड वॉर्नर करत आहे. मात्र, या मोसमातील सनरायझर्स हैदराबादची कामगिरी खूपच खराब आहे. हैदराबाद संघाला सहा सामन्यांपैकी पाच सामन्यांत पराभव पत्करावा लागला आहे.

आयपीएलच्या गुणतालिकेत हा संघ सध्या सर्वात खालच्या स्थानावर आहे. डेव्हिड वॉर्नर धावा करण्यासाठी संघर्ष करत असून तो सध्या फॉर्ममध्ये नाही. हैदराबादकडे इंग्लंडचा स्फोटक फलंदाज जेसन रॉयचा पर्याय आहे. त्यामुळे पुढील काही सामन्यांमध्ये डेव्हिड वॉर्नरच्या जागी जेसन रॉयला संघात स्थान मिळू शकते.

? Announcement ? pic.twitter.com/B9tBDWwzHe

— SunRisers Hyderabad (@SunRisers) May 1, 2021

सनरायझर्स हैदराबादने दिलेल्या निवेदनात म्हटले आहे की, सनरायझर्स हैदराबाद उद्याच्या सामन्यासाठी आणि आयपीएल 2021 च्या उर्वरित सामन्यांसाठी केन विल्यमसनकडे कर्णधारपदाची सूत्रे सोपवण्याची घोषणा करत आहे. राजस्थान रॉयल्सविरुद्ध उद्या होणाऱ्या सामन्यासाठी संयोजन बदलण्याचा निर्णय संघ व्यवस्थापनाने घेतला आहे, त्यामुळे वॉर्नरला प्लेइंग इलेव्हनमधून वगळले जाण्याची शक्यता असल्याचे संघाने म्हटले आहे.

आयपीएल मध्ये अर्ध्यातून कर्णधारपद काढून घेण्याची ही पहिलीच वेळ नाही. 2020 मध्ये कोलकाता संघानं कार्तिकला हटवून मॉर्गनकडे संघाचं नेतृत्व सोपवलं होतं. 2014 मध्ये हैदराबादनं शिखर धवनकडून कर्णधारपद काढून घेत डेरेन सॅमीकडे सोपवलं होतं. 2012 कुमार संगकारा, 2013 रिकी पॉटिंग, 2016 डेव्हिड मिलर आणि गौतम गंभीर यांनाही कर्णधारपदावरुन हाकलण्यात आलं होतं.

The post ब्रेकिंग : सनरायझर्स हैदराबादने डेव्हिड वॉर्नरला कर्णधारपदावरून हटवले, पुढील सामन्यात संघातून बाहेर? appeared first on थोडक्यात घडामोडी.