नवी दिल्ली : आपल्या विमा पॉलिसीची कागदपत्रे सुरक्षित करण्यासाठी लवकरच आपण सरकारी डिजीलॉकर वापर करू शकणार आहोत. विमा नियामक आणि विकास प्राधिकरण (IRDAI) ने निर्देश दिले आहेत कि, विमा कंपन्यांनी रिटेल पॉलिसीधारकांना डिजीलॉकर सुविधेविषयी तसेच ते कसे वापरावे याबद्दल सांगावे. विमा कंपनीने पॉलिसीधारकांना त्या प्रक्रियेबद्दलही माहिती द्यावी, ज्याद्वारे पॉलिसीधारक आपली पॉलिसी डिजीलॉकरमध्ये ठेवू शकतात.

डिजीलॉकरमध्ये नागरिक त्यांच्या सर्व कागदपत्रांच्या प्रती त्यांच्या मोबाइल फोनमध्ये सुरक्षितपणे जतन करू शकतात किंवा ‘डिजिटल लॉकर अ‍ॅप’ घेऊ शकतात. हे अ‍ॅप गूगल किंवा Apple प्ले अ‍ॅप स्टोअर वरून सहज डाऊनलोड करता येईल.

सध्या ड्रायव्हिंग लायसन्स, कार नोंदणी, मतदार ओळखपत्र, पॅनकार्ड, शाळा व महाविद्यालयाचे प्रमाणपत्र व सरकारने जारी केलेली इतरही अनेक कागदपत्रे डिजिटल स्वरुपात जतन केली जाऊ शकतात. सरकारच्या डिजीलॉकर उपक्रमांतर्गत नागरिक त्यांचे मूळ प्रमाणपत्र/अस्सल कागदपत्रे /प्रमाणपत्रे जारीकर्त्यांकडून डिजिटल स्वरूपात घेऊ शकतात. भौतिक कागदपत्रांचा वापर कमी करण्यासाठी केंद्र सरकारने ही सुविधा सुरू केली आहे.

आयआरडीएआय (IRDAI) ने परिपत्रकात म्हटले आहे की विमा क्षेत्रातील डिजीलॉकर सुविधेमुळे खर्च कमी होईल आणि ग्राहकांच्या तक्रारी दूर करण्यात मदत होईल. आयआरडीएआयने असेही म्हटले आहे की इलेक्ट्रॉनिक्स आणि माहिती तंत्रज्ञान मंत्रालयांतर्गत नॅशनल ई-गव्हर्नन्स विभागातील डिजीलॉकर टीम डिजीलॉकरचा वापर करण्यासाठी आवश्यक तांत्रिक सहाय्य करेल.

The post मस्तच ! आता विमा पॉलिसी डिजिटल लॉकरमध्ये ठेवता येणार.. जाणून घ्या.. appeared first on थोडक्यात घडामोडी.