ज्येष्ठ पत्रकार विनोद दुआ यांचे निधन झाले आहे. ते ६७ वर्षांचे होते. ते बऱ्याच दिवसांपासून आजारी होते. त्यांच्यावर दिल्लीतील अपोलो रुग्णालयाच्या अतिदक्षता विभागात उपचार सुरु होते. विनोद दुआ यांची मुलगी मल्लिका दुआ हिने सोशल मीडियाद्वारे त्यांच्या निधनाची माहिती दिली.

भारतातील टीव्ही पत्रकारितेतील अग्रगण्य नाव असलेले विनोद दुआ यांनी बराच काळ पत्रकारितेच्या कारकिर्दीत दूरदर्शन आणि NDTV सोबत काम केले. तसेच इतर टीव्ही चॅनेल आणि ऑनलाइन पोर्टलवर देखील कार्यक्रम केले.

सोशल मीडियावर त्यांची मुलगी मल्लिका दुआ यांनी सांगितले कि, “आमचे निर्भीड, निर्भय आणि असाधारण वडील, विनोद दुआ यांचे निधन झाले आहे. दिल्लीच्या निर्वासित वसाहतीतून 42 वर्षांहून अधिक काळ पत्रकारितेच्या उत्कृष्टतेच्या शिखरावर जाऊन ते अनोखे जीवन जगले, नेहमी सत्याला ताकद मिळण्यासाठी बोलले. ते आता आमच्या आई, त्यांची प्रिय पत्नी चिन्नासोबत स्वर्गात आहेत.” 5 डिसेंबर रोजी दुपारी लोधी स्मशानभूमीत त्यांच्यावर अंत्यसंस्कार करण्यात येणार असल्याची माहिती त्यांनी दिली.

विनोद दुआ आणि त्यांची पत्नी पद्मावती ‘चिन्ना’ दुआ यांना कोविडची लागण झाली होती. त्यानंतर दोघांनाही गुरुग्रामच्या रुग्णालयात दाखल करावे लागले होते. या आजाराशी प्रदीर्घ लढा दिल्यानंतर जूनमध्ये चिन्ना दुआ यांचा कोविड-19 मध्ये मृत्यू झाला. विनोद दुआ कोविड-19 मधून बरे झाले, मात्र त्यांना आरोग्याच्या समस्या निर्माण झाल्या होत्या. त्यामुळे कोविड-19 मधून बरे झाल्यानंतर त्यांना काही वेळा रुग्णालयात दाखल करावे लागले.

विनोद दुआ यांच्या पश्चात दोन मुली आहेत, बकुल दुआ आणि मल्लिका दुआ आहेत. बकुल दुआ एक मानसशास्त्रज्ञ आहे आणि मल्लिका दुआ, एक कॉमेडियन आहे.

The post ज्येष्ठ पत्रकार विनोद दुआ यांचे निधन appeared first on थोडक्यात घडामोडी.