मुंबई : वाढत्या शहरीकरणामुळे शहरांचा विस्तार होत आहे. नागरिकांना कामाच्या ठिकाणी जाण्यासाठी बराच प्रवास करावा लागतो. सार्वजनिक परिवहन व्यवस्थेच्या बळकटीकरणासह नागरिकांना ‘लास्ट माइल कनेक्टिव्हिटी’ देणे सध्या गरजेचे आहे. परिवहन सेवेचे पुढचे पाऊल ‘पॉड टॅक्सी’ असून ही सेवा’ लास्ट माइल कनेक्टिव्हिटी’ साठी नागरिकांच्या सेवेत आणावी, असे निर्देश मुख्यमंत्री देवेंद्र फडणवीस यांनी सह्याद्री अतिथीगृह येथे पॉड टॅक्सीबाबत आयोजित बैठकीत दिले.

मुख्यमंत्री फडणवीस म्हणाले, कुर्ला ते वांद्रे रेल्वे स्थानकादरम्यान असलेल्या ‘बिझनेस डिस्ट्रिक्ट’मध्ये ही सेवा महत्त्वाची ठरणार आहे. या ठिकाणी भविष्यात होणारे बुलेट ट्रेन स्टेशन, मुंबई उच्च न्यायालय यामुळे या भागातील नागरिकांची वर्दळ वाढणार आहे. सध्या अस्तित्वात असलेल्या परिवहन सेवेवर यामुळे ताण येऊन नागरिकांना अडचणींचा सामना करावा लागण्याची दाट शक्यता आहे. भविष्यात या भागात नागरिकांना विनाविलंब आणि सहजरित्या परिवहन सेवा मिळण्यासाठी पॉड टॅक्सी पर्याय ठरेल.

मुंबईमध्ये सर्व परिवहन सेवांमध्ये सिंगल कार्डच्या माध्यमातून प्रवास करता येण्याची व्यवस्था निर्माण करण्यात येत आहे. याच सिंगल कार्डद्वारे पॉड टॅक्सीची सेवाही नागरिकांना घेता आली पाहिजे, या दृष्टीने कार्यवाही करण्यात यावी. पॉड टॅक्सीच्या अनुषंगाने कुर्ला आणि वांद्रे स्थानक परिसराचा विकास करण्यात यावा. कुर्ला स्थानक परिसरात असलेल्या पोलिस निवासाच्या जागेऐवजी पोलिसांना त्याच भागात जागा उपलब्ध करून द्यावी. तसेच वांद्रे कुर्ला कॉम्प्लेक्स भागातील इमारती या पॉड टॅक्सीने स्टेशनला जोडण्यात याव्यात, असेही मुख्यमंत्री यांनी यावेळी सांगितले.

या भागाचे व्यावसायिक महत्त्व लक्षात घेता जागतिक दर्जाची सेवा राहील याची काळजी घेण्यात यावी. स्टेशनबाहेर असलेले स्कायवॉक आणखी उपयोगात आणण्यासाठी चांगल्या संकल्पनांची अंमलबजावणी करावी, अशा सूचनाही मुख्यमंत्री फडणवीस यांनी यावेळी दिल्या.

बैठकीला बृहन्मुंबई पोलिस आयुक्त देवेन भारती, मुंबई महानगर प्रदेश विकास प्राधिकरणाचे महानगर आयुक्त संजय मुखर्जी, अपर मुख्य सचिव (परिवहन) संजय सेठी, अपर मुख्य सचिव (नगर विकास) असीम कुमार गुप्ता, प्रधान सचिव (गृह) अनुप कुमार सिंग आदी उपस्थित होते. महानगर आयुक्त संजय मुखर्जी आणि पोलिस आयुक्त भरती यांनी सादरीकरण केले.

The post ‘लास्ट माइल कनेक्टिव्हिटी’साठी पॉड टॅक्सी सेवा नागरिकांच्या सेवेत आणावी – मुख्यमंत्री देवेंद्र फडणवीस appeared first on थोडक्यात घडामोडी.

मुंबई : पुण्यश्लोक अहिल्यादेवी होळकर यांच्या ३०० व्या पुण्यतिथीनिमित्त ‘कुस्तीगीर खाशाबा जाधव पारंपरिक क्रीडा महाकुंभ २०२५’ चे आयोजन महाराणा प्रताप शासकीय औद्योगिक प्रशिक्षण संस्था, कुर्ला क्रीडा संकुलात करण्यात आले आहे. पारंपरिक खेळांचे जतन आणि प्रसार करणाऱ्या या महाकुंभचे उद्घाटन बुधवार १३ ऑगस्ट रोजी सकाळी ११.०० वाजता क्रीडा व युवक कल्याण मंत्री ॲड. माणिकराव कोकाटे यांच्या अध्यक्षतेत होणार आहे. यावेळी कौशल्य, रोजगार, उद्योजकता व नाविन्यता मंत्री मंगलप्रभात लोढा, कुस्तीगीर खाशाबा जाधव यांचे सुपुत्र रणजीत खाशाबा जाधव यांची विशेष उपस्थिती असणार आहे.

कौशल्य विकास विभाग आणि क्रीडाभारती यांच्या संयुक्त विद्यमाने दि. १३ ते २२ ऑगस्ट दरम्यान कुर्ला येथील क्रीडा संकुलात याचे आयोजन करण्यात आले आहे. या महाकुंभात एकूण १६ प्रकारच्या पारंपरिक क्रीडा स्पर्धा होणार असून, यामध्ये मल्लखांब, कबड्डी, खो-खो, भालाफेक, विटी – दांडू, कुस्ती, लगोरी, लंगडी, रज्जूमल्लखांब, पारंपारिक धाव स्पर्धा यांचा समावेश आहे.

पारंपारिक खेळांचे जतन आणि प्रसार हे या स्पर्धांचे वैशिष्ट्य आहे. कुस्तीगीर खाशाबा जाधव पारंपारिक क्रीडा महाकुंभमध्ये युवक-युवतींमध्ये शारीरिक तंदुरूस्ती, संघभावना आणि स्पर्धात्मकता वाढवण्याच्या हेतूने या स्पर्धांचे आयोजन करण्यात आले आहे.

मागील वर्षी या उपक्रमात जवळपास एक लाखांहून अधिक खेळाडूंनी सहभाग नोंदवला होता. यंदादेखील राज्यातील विविध जिल्ह्यातून खेळाडू यात सहभागी होणार असून खेळाडूंना पारंपरिक खेळांविषयी मार्गदर्शनही केले जाणार आहे.

The post ‘कुस्तीगीर खाशाबा जाधव पारंपरिक क्रीडा महाकुंभ २०२५’चे १३ ऑगस्ट रोजी उद्घाटन appeared first on थोडक्यात घडामोडी.

मुंबई : कुर्ला पूर्व येथील नाईक नगर येथे सोमवारी रात्री उशिरा चार मजली इमारत कोसळली. यामध्ये एकाचा मृत्यू झाला असून 12 जण जखमी झाले आहेत. सोमवारी रात्री १२ वाजेच्या सुमारास अग्निशमन दलाला याविषयी माहिती देण्यात आली. अग्निशमन दलाच्या अधिकाऱ्यांनी सांगितले की त्यांनी सात फायर ट्रक, दोन रेस्क्यू व्हॅन आणि रुग्णवाहिका पाठवल्या आहेत. अग्निशमन दलाने सुमारे 20 जण आत अडकल्याची शक्यता वर्तवली आहे.

अग्निशमन दलाने बीएमसीला बचाव प्रक्रियेत मदत करण्यासाठी डंपर, उत्खनन यंत्र पाठवण्यास सांगितले होते. अग्निशमन दलाच्या अधिकाऱ्याने सांगितले की त्यांनी शोध आणि बचाव सुरू केले आहे आणि ते पूर्ण होण्यासाठी सुमारे सात ते आठ तास लागतील. आतापर्यंत १२ जणांना वाचवण्यात यश आलं आहे.

दरम्यान, याविषयी नगरसेविका प्रविणा मोरजकर म्हणाल्या, चार मोडकळीस आलेल्या इमारतींची ही वसाहत असून त्यांना पाच ते सहा वर्षांपूर्वी इमारत रिकामी करण्याच्या नोटिसा देण्यात आल्या होत्या. तरीही रहिवासी येथेच राहिले. सोमवारी रात्री एक इमारत कोसळली. अग्निशमन दल येण्यापूर्वीच पाच ते सहा जणांना ढिगाऱ्यातून बाहेर काढण्यात आलं होतं. जखमींना रुग्णालयात पाठवले जात असून उपचार करण्यात येत आहेत.”

The post कुर्ल्यात चार मजली इमारत कोसळली, शोध आणि बचावकार्य सुरू appeared first on थोडक्यात घडामोडी.