नवी दिल्ली : नॅशनल हेराल्ड प्रकरणी ईडी आज काँग्रेस अध्यक्षा सोनिया गांधी यांची दुसऱ्यांदा चौकशी करणार आहे. सोनिया गांधी सकाळी 11 वाजता ईडीच्या कार्यालयात चौकशीला उपस्थित राहणार आहेत. यापूर्वी 21 जुलै रोजी ईडीने सोनिया यांची सुमारे 3 तास चौकशी केली होती. प्रियंका गांधी आणि राहुल गांधी हे सोनिया गांधींसोबत ईडी कार्यालयात जाण्याची शक्यता आहे.

दरम्यान, या चौकशीविरोधात काँग्रेस कार्यकर्ते देशभरात आंदोलन करणार आहेत. पक्षाचे वरिष्ठ नेते राजघाटावर जाऊन मूक आंदोलन करणार आहेत. सोमवारी काँग्रेस कार्यालयात निदर्शने करण्यासंदर्भात काँग्रेस हायकमांडसह सर्व सरचिटणीस, प्रदेश प्रभारी यांनी याबाबत रणनीती आखली होती. मात्र, राजघाटावर आंदोलन करण्यास पोलिसांनी परवानगी दिलेली नाही. तसेच परिसरात कलम 144 लागू करण्यात आले आहे. काँग्रेसचे सरचिटणीस केसी वेणुगोपाल म्हणाले की, काँग्रेसला राजघाटावर ‘सत्याग्रह’ करायचा होता, पण दिल्ली पोलिसांकडून परवानगी मिळाली नाही आणि तेथे कलम 144 लागू करण्यात आली.

नॅशनल हेराल्ड प्रकरणी ईडीने काँग्रेस नेते राहुल गांधी यांची ५ वेळा चौकशी केली आहे. आता सोनिया गांधींची चौकशी केली जात आहे. काँग्रेसने आपल्या सर्वोच्च नेतृत्वाविरुद्ध ईडीच्या कारवाईचा निषेध केला आहे आणि ही “राजकीय सूडबुद्धीची चाल” असल्याचे म्हटले आहे.

The post सोनिया गांधी यांची ईडीकडून आज पुन्हा चौकशी, राजघाटावर कलम 144 लागू appeared first on थोडक्यात घडामोडी.

नवी दिल्ली : काँग्रेसच्या अंतरिम अध्यक्षा सोनिया गांधी यांना कोरोनाची लागण झाली आहे. त्या सध्या विलगीकरणात आहेत. प्रियांका गांधीही त्यांच्या संपर्कात आल्याचे सांगण्यात येत आहे, त्यानंतर त्या लखनौहून दिल्लीला परतल्या आहेत. अजून त्यांची कोरोना चाचणी झालेली नाही.

गेल्या काही दिवसांत सोनिया गांधी यांच्या पक्षातील अनेक नेत्यांच्या भेटी घेतल्याचे काँग्रेसकडून सांगण्यात येत आहे. यातील काही नेत्यांनाही कोरोनाची लागण झाल्याचे आढळून आले आहे. सोनिया गांधींना सौम्य तापाची लक्षणे दिसू लागली, त्यानंतर त्यांची कोरोना चाचणी करण्यात आली. त्यानंतर सोनियांची चाचणी पॉझिटिव्ह आली आहे. पॉझिटिव्ह आढळल्यानंतर, सोनिया सध्या विलगीकरणात आहेत आणि सर्वांना खबरदारी घेण्यास सांगितले जात आहे. प्रियंका गांधी यांनी सोनिया गांधी यांचीही भेट घेतली, त्यानंतर खबरदारी म्हणून त्या लखनौहून दिल्लीला परतत आहेत.

दरम्यान, कालच अंमलबजावणी संचालनालयाने (ईडी) सोनिया गांधी आणि राहुल गांधी यांना नोटीस पाठवून चौकशीसाठी बोलावले आहे. नॅशनल हेराल्ड प्रकरणासंदर्भात ही नोटीस बजावण्यात आली आहे. त्यानंतर सोनिया आणि राहुल यांना 8 जून रोजी ईडी अधिकाऱ्यांसमोर चौकशीसाठी हजर राहण्यास सांगितले होते.

ब्रेकिंग! सोनिया गांधी आणि राहुल गांधी यांना नॅशनल हेराल्ड प्रकरणात ईडीकडून समन्स

The post ब्रेकिंग! काँग्रेस अध्यक्षा सोनिया गांधी यांना कोरोनाची लागण appeared first on थोडक्यात घडामोडी.