मुंबई : राज्यातील कला केंद्रामध्ये मागील काही दिवसात अल्पवयीन मुली सापडल्या आहेत. त्यामुळे कला केंद्रांना मान्यता देण्यासंदर्भात कठोर नियमावली तयार करण्याची गरज आहे. तसेच कला केंद्रांवर नियंत्रण ठेवण्यासाठी जिल्हास्तरीय समिती गठित करण्यासाठी मसुदा तयार करण्याच्या सूचना विधानपरिषदेच्या उपसभापती डॉ. नीलम गोऱ्हे यांनी दिल्या.

कला केंद्रामध्ये अल्पवयीन मुली सापडल्याच्या पार्श्वभूमीवर त्यांचे पुनर्वसन, उपाययोजना आणि अपहरणातील अल्पवयीन मुली व महिलांचा शोध यासंदर्भात आज उपसभापती डॉ. गोऱ्हे यांनी विधानभवनातून पोलीस विभागातील वरिष्ठ अधिकाऱ्यांची दूरदृश्य प्रणालीद्वारे बैठक घेतली. त्यावेळी त्या बोलत होत्या. या बैठकीला वने, सांस्कृतिक कार्य, व मत्स्यव्यवसाय मंत्री सुधीर मुनगंटीवार उपस्थित होते. तसेच दूरदृश्य प्रणालीद्वारे गृह विभागाचे प्रधान सचिव अनुप कुमार, महिला व बालकल्याण विभागाचे आयुक्त डॉ.प्रशांत नारनवरे, औरंगाबादचे (छत्रपती संभाजीनगर) विभागीय उपायुक्त संजय सक्सेना, नाशिक परिक्षेत्राचे पोलीस महानिरीक्षक डॉ. बी.जी शेखर पाटील, औरंगाबाद परिक्षेत्राचे पोलीस महानिरीक्षक डॉ. ज्ञानदेव चव्हाण, अहमदनगर जिल्ह्याचे अतिरिक्त पोलीस अधीक्षक, परभणीच्या पोलीस अधीक्षक श्रीमती रागसुधा आर, नाशिकचे पोलीस अधीक्षक शहाजी उमाप, बीडचे पोलीस अधीक्षक नंदकुमार ठाकूर, नंदुरबार, बीड, पुणे, सातारा, परभणी, औरंगाबाद, जालना, उस्मानाबाद आदी जिल्ह्याचे पोलीस अधीक्षक उपस्थित होते.

डॉ. गोऱ्हे म्हणाल्या की, राज्यात कला केंद्रामध्ये अल्पवयीन मुली सापडणे ही अतिशय गंभीर बाब आहे. या मुलींची सुटका आणि त्यानंतर त्यांचे शिक्षण होणे आवश्यक आहे. त्याचबरोबर अशा कला केंद्रांना मान्यता देताना आणि ते चालविण्यासाठी धोरणात्मक बदल करण्यासाठी शासनाला एक मसुदा सादर करण्यात येईल. त्यासाठी पोलीस विभागाने मसुदा तयार करावा. त्यात अशा कला केंद्रांच्या नियंत्रणासाठी जिल्हास्तरावर एक समिती गठित करण्याच्या सूचना शासनाला देण्यात यतील. या समितीमध्ये तहसीलदार, जिल्हा कामगार अधिकारी, पोलीस अधिकारी आणि मानव तस्करीवर काम करणाऱ्या सामाजिक संस्थेचे प्रतिनिधी यांचा या समितीमध्ये समावेश करण्यासंदर्भात शासनाला मसुदा देण्यात येईल. तसेच अपहरण झालेल्या अल्पवयीन मुली व महिला सापडल्यानंतर त्या पुन्हा वाईट मार्गाला लागणार नाहीत यासाठी एक निश्चित कार्यक्रम आखणे आवश्यक आहे. यासाठी शिक्षण, आरोग्य, महिला व बालकल्याण आणि सामाजिक न्याय विभागाची जबाबदारी निश्चित करुन देण्याची गरजही त्यांनी यावेळी प्रतिपादित केली.

The post कला केंद्रांवर नियंत्रण ठेवण्यासाठी जिल्हास्तरीय समिती स्थापन करणे आवश्यक – उपसभापती डॉ. नीलम गोऱ्हे appeared first on थोडक्यात घडामोडी.

औरंगाबाद : पोलीस प्रशासनाचे काम चांगले असून पोलिसांनी शहर आणि जिल्ह्यात काम करताना महिलांच्या सुरक्षेला अधिक प्राधान्य द्यावे. जिल्हा आणि शहरी भागात असलेल्या विविध शैक्षणिक संस्थांमध्ये ‘सुरक्षित आवार (कॅम्पस)’ संकल्पना राबविण्यात आली पाहिजे. या अंतर्गत रॅगिंग, छेडछाड, विनाकारण त्रास देणे, अत्याचार अशा गोष्टींना प्रतिबंध बसू शकेल. प्रत्येक आस्थापनेत विशाखा समितीची स्थापना व्हावी, महिला दक्षता समित्यांच्या माध्यमातून स्वयंसेवी संस्थाना सोबत घेऊन कायदेविषयक मार्गदर्शन कार्यशाळा घेण्यात याव्यात, दामिनी पथकांच्या पोलिसांना वारंवार रिफ्रेशर प्रशिक्षणे द्यावीत, दक्षता समित्यांच्या संवेदनशील सदस्यांना पीडित महिलांच्या संपर्कात राहायला सांगून समुपदेशन व धीर द्यावा असे निर्देश आज विधान परिषदेच्या उपसभापती डॉ. नीलम गोऱ्हे यांनी पोलिस प्रशासनास दिले.

पोलीस आयुक्त कार्यालयात महिला अत्याचार व त्यावरील उपाययोजना यावर आढावा बैठक डॉ. गोऱ्हे यांच्या अध्यक्षतेखाली आज पार पडली. पोलिस प्रशासनाकडून या सूचनांचे तात्काळ स्वागत करण्यात आले. येत्या १५ दिवसांत सुरक्षित आवार (कॅम्पस) संकल्पना रबिवण्यास सुरुवात होईल असे यावेळी सांगण्यात आले. या अंतर्गत शाळा महाविद्यालये आणि वसतिगृहात विद्यार्थिनींसाठी तक्रार पेट्या, तक्रार करण्यासाठी आवश्यक ईमेल आयडी लावण्यात येणार आहेत. या विषयी पाठपुरावा करण्यासाठी आता पोलिस पुढाकार घेणार आहेत. शाळेत विद्यार्थी पोलिस कडेट नेमण्यात येणार असून त्यांना पोलिस प्रशिक्षण देण्यात येईल. अंमली पदार्थांच्या सेवनाने तरुण पिढी आहारी जाऊ नये म्हणून विशेष मोहीम हाती घेण्यात येणार आहे.

सुरवातीला पोलीस आयुक्त कार्यालयातील कमांड कंट्रोल सेंटर, पोलीस नियंत्रण कक्ष, हरवलेल्या व्यक्तींचा शोध कक्षाला डॉ. गोऱ्हे यांनी भेट देत कामकाजाची माहिती घेतली.

कुटुंबातील वाढती व्यसनाधीनता, महिला अपहरण, बाल विवाह थांबविणे, कोरोना कालावधीत पती गमावलेल्या विधवा पत्नी यांना मालमत्तेच्या कागदपत्रांचे हस्तांतरण, जात पंचायत विरोधी कायदा, ज्येष्ठ व्यक्तींसाठी कक्ष, समाजात सौहार्दता टिकवून ठेवण्यासाठी प्रयत्न करणे आदींचा आढावा डॉ.गोऱ्हे यांनी घेतला. एकल महिलांचे स्वा मदत गट स्थापन करण्याची सूचना यावेळी त्यांनी केली.

प्रत्येक पोलीस ठाण्यात आयुक्तालय कार्य क्षेत्रातील गुन्हे नियंत्रणासाठी करण्यात आलेली उपाय योजना, भरोसा सेल, दामिनी पथक, महिला दक्षता समिती, विशाखा समितीमार्फत केलेल्या कार्यवाहीची सविस्तर माहिती पोलीस आयुक्त डॉ.गुप्ता यांनी उपसभापती डॉ.गोऱ्हे यांना दिली. त्याचबरोबर औरंगाबाद परीक्षेत्रात महिलांवरील अत्याचारावर प्रतिबंध करण्यासाठी केलेल्या विविध उपाययोजनांबाबतच्या कार्यवाहीची सविस्तर माहिती विशेष पोलीस महानिरीक्षक के. एम. प्रसन्ना यांनी दिली.

The post महिलांच्या सुरक्षेला प्राधान्य देताना शैक्षणिक संस्थांमध्ये ‘सुरक्षित आवार’ संकल्पना, उपसभापती डॉ. नीलम गोऱ्हे यांनी दिले ‘हे’ निर्देश appeared first on थोडक्यात घडामोडी.