पुणे : आईच्या घरी आलेल्या एका विवाहित महिलेने तिच्या जुळ्या बाळांना पाण्याच्या टाकीत टाकून नंतर स्वतःदेखील आत्महत्या करण्याचा प्रयत्न केला. या घटनेत दोन्ही बाळांचा मृत्यू झाला असून महिलेला वाचवण्यात आले आहे. ही घटना मंगळवारी (८ एप्रिल) सकाळी साडेसहाच्या सुमारास हवेली तालुक्यातील थेऊर ग्रामपंचायत हद्दीतील दत्तनगर परिसरात घडली.

मिळालेल्या माहितीनुसार, प्रतिभा हेमंतकुमार मोहिते (३५) असे या महिलेचे नाव आहे. ती गर्भवती राहण्यासाठी थेऊर परिसरातील दत्तनगर येथील तिच्या माहेरी आली होती. सुमारे दोन महिन्यांपूर्वी आयव्हीएफ उपचारानंतर तिने जुळ्या मुलांना जन्म दिला होता. ही महिला थेऊरमध्ये तिच्या आईवडिलांसोबत राहायला आली होती. तिला जुळी मुले होती. मात्र, जन्मापासूनच दोघेही वारंवार आजारी पडत असल्यामुळे त्यांची आई असलेली ही महिला तणाव आणि नैराश्यात होती.

दरम्यान, मंगळवारी सकाळी साडेसहाच्या सुमारास महिला तिच्या जुळ्या बाळांना घेऊन घराच्या टेरेसवर गेली. तिथे तिने उंच जागेवर उभी राहून तिच्या जुळ्या बाळांना पाण्याच्या टाकीत टाकले. त्यानंतर तिने स्वतः पाण्याच्या टाकीत उडी मारली. मात्र, टाकीचे तोंड लहान असल्याने आणि पाण्याची पातळी जास्त असल्याने महिला बुडली नाही. दोन-तीन वेळा तिचे डोके टाकीतून बाहेर आल्यावर जवळच राहणाऱ्या एका व्यक्तीने त्याच्या घराच्या टेरेसवरून ही घटना पाहिली. त्याने तात्काळ महिलेच्या घरी याबाबत माहिती दिली. आईचे कुटुंब पाहण्यासाठी टेरेसवर गेले तेव्हा दोन्ही बाळे पाण्यात बुडलेल्या अवस्थेत आढळून आली. नागरिकांच्या मदतीने बाळांना तात्काळ वानौरी येथील कमांड हॉस्पिटलमध्ये दाखल करण्यात आले. मात्र, उपचारापूर्वीच दोघांचाही मृत्यू झाला असल्याचे वैद्यकीय अधिकाऱ्यांनी सांगितले. सांगलीत राहणारा महिलेचा पती बँक कर्मचारी आहे, त्यांना या घटनेची माहिती देण्यात आली.

पोलिसांनी घटनेची माहिती मिळताच घटनास्थळी भेट देऊन तपास सुरु केला. महिलेला ताब्यात घेण्यात आले असून पुढील तपास सुरू आहे. जुळ्या मुलांच्या मृत्यूस कारणीभूत ठरल्याबद्दल महिलेविरुद्ध खुनाचा गुन्हा दाखल करण्यात येईल,असे पोलिसांनी सांगितले.

The post हृदयद्रावक! जुळ्या बाळांना पाण्याच्या टाकीत टाकून आईचा आत्महत्या करण्याचा प्रयत्न appeared first on थोडक्यात घडामोडी.

धुळे : धुळे शहरालगत असणाऱ्या अवधान गावात एकाच कुटुंबातील पाच जणांनी आत्महत्येचा प्रयत्न केल्याची खळबळजनक घटना घडली आहे. अल्पवयीन मुलांसह आई-वडिलांनी विष पिऊन आत्महत्येचा प्रयत्न केला. या घटनेतून सर्व जण बचावले असून डायमंड वैद्यकीय महाविद्यालय व रुग्णालयात त्यांच्यावर उपचार सुरू आहेत.

मिळालेल्या माहितीनुसार, धुळे शहरातील अवधान परिसरात सोमवारी रात्री १० च्या सुमारास कौटुंबिक कलहांना कंटाळून ही घटना घडली आहे. गणेश गोपाळ हे आपली पत्नी आणि मुले आणि अन्य एका तरुणासह या परिसरात राहत होते. त्यांनी येथे भाडेतत्वावर घर घेतलेले होते. गणेश आणि सविता यांचे प्रेमसंबंध होते. प्रेमसंबंधातून दोघांनी लग्न केले होते. पण त्यांच्या या प्रेम संबंधांना कुटुंबीयांचा विरोध होता. त्यातून होणाऱ्या कलहातून या पाचही जणांनी विष प्राशन केलं. गणेश गोपाळ (42), त्यांची पत्नी सविता (35), मुलगी जयश्री(14), मुलगा गोविंदा गणेश गोपाळ आणि भरत पारधी अशी आत्महत्येचा प्रयत्न करणाऱ्या कुटुंबीयांची नावं आहेत.

दरम्यान, गोपाळ यांनी घडलेला प्रकार घरमालकांना सांगितलं आणि सर्वांनी विष प्राशन केल्याची माहिती दिली. त्यानंतर शेजाऱ्यांनी सर्वांना तातडीने रुग्णालयात दाखल केले आहे. त्यामुळे पाचही जणांचे प्राण वाचले आहे. त्यांच्यावर डायमंड वैद्यकीय महाविद्यालयात उपचार सुरू आहेत. मात्र, भरत पारधी यांची प्रकृती गंभीर आहे. या प्रकरणाचा अधिक तपास पोलीस करत आहे. या घटनेमुळे परिसरात एकच खळबळ उडाली आहे.

The post एकाच कुटुंबातील 5 जणांचा विष पिऊन आत्महत्येचा प्रयत्न appeared first on थोडक्यात घडामोडी.

नवी दिल्ली : राजधानी दिल्लीत सर्वोच्च न्यायालयाच्या गेटसमोर स्वत:ला पेटवून घेत दोन जणांनी आत्महत्येचा प्रयत्न केला आहे. यामध्ये एका महिला आणि एका पुरुषाचा समावेश आहे. मिळालेल्या माहितीनुसार, या दोघांनी गेट क्रमांक डी मधून आत जाण्याचा प्रयत्न केला होता. परंतु, योग्य ओळखपत्राशिवाय आत जाण्यापासून सुरक्षा कर्मचाऱ्यांनी त्यांना रोखले. त्यानंतर, या दोघांनी सर्वोच्च न्यायालयाच्या गेटजवळ स्वत:ला पेटवून घेत आत्महत्येचा प्रयत्न केला. त्यांना पोलीस व्हॅनने तातडीने रुग्णालयात नेले.

सुरक्षा रक्षकांच्या सतर्कतेमुळे या दोघांचेही जीव वाचले आहेत. आग विझवल्यानंतर गंभीर जखमी झालेल्या दोघांना पोलिसांच्या गाडीतून राम मनोहर लोहिया रुग्णालयात नेण्यात आले आहे. दरम्यान, पोलिसांना घटनास्थळी एक ज्वलनशील पदार्थाची बाटलीही सापडली आहे. यातील पदार्थ अंगावर ओतून घेत या दोघांनी स्वत:ला पेटवण्याचा प्रयत्न केला. त्यानंतर या परिसरात नाकाबंदी करण्यात आली.

The post सर्वोच्च न्यायालयाच्या गेटसमोर एक महिला आणि पुरुषाने स्वत:ला पेटवून घेतले, आत्महत्येचा प्रयत्न… appeared first on थोडक्यात घडामोडी.