बीड : बीड जिल्ह्यात शुक्रवारी भीषण अपघात घडला, जेथे धुळे-सोलापूर राष्ट्रीय महामार्गावर एका डिझेल टँकरला स्फोट होऊन मोठी आग लागली. ही आग इतकी प्रचंड होती की संपूर्ण परिसर धुराने आणि ज्वाळांनी व्यापला होता.

बीड जिल्ह्यातील मांजरसुंबा येथील सीमेवर असलेल्या पाली घाटातील कोलवाडी फाट्यावर हा स्फोट झाला. टँकर उलटल्यानंतर, टँकर घसरला आणि मोठ्या प्रमाणात डिझेल रस्त्यावर सांडले. त्यानंतर मागून येणारी वाहने उलटलेल्या टँकरवर आदळली, ज्यामुळे मोठा स्फोट झाला आणि आग लागली.आग आजूबाजूच्या गवताळ प्रदेशातही पसरली, ज्यामुळे परिस्थिती आणखी गंभीर झाली. टँकर चालक आणि क्लीनर कुठे आहेत याबद्दल कोणतीही माहिती उपलब्ध नाही.

कोलवाडी गावाजवळ डिझेल टँकरला आग लागली. स्फोट इतका शक्तिशाली होता की आजूबाजूचा परिसर धुराने आणि ज्वाळांनी वेढला गेला होता. अग्निशमन दलाचे पथक आणि स्थानिक अधिकारी घटनास्थळी दाखल झाले. मोठ्या प्रमाणात लागलेली आग आटोक्यात आणण्यासाठी अतिरिक्त साधनसंपत्तीची आवश्यकता असल्याने गेवराई येथील अग्निशमन दलाच्या गाड्यांची मागणी करण्यात आली होती.

महामार्गाच्या दोन्ही बाजूला मोठी वाहतूक कोंडी झाली होती, दुचाकी आणि चारचाकी वाहनांच्या रांगा लागल्या होत्या. महामार्ग पोलिसांनी तातडीने घटनास्थळी पोहोचून पुढील धोका टाळण्यासाठी दोन्ही दिशांनी होणारी वाहतूक थांबवली.

The post बीड : धुळे-सोलापूर महामार्गावर डिझेल टँकरचा भीषण स्फोट appeared first on थोडक्यात घडामोडी.

मुंबई : दीपावली सण साजरा करताना आनंदाबरोबरच सुरक्षिततेची काळजी घेणे अत्यावश्यक आहे. दिवाळीच्या काळात घरगुती आग, फटाक्यांमुळे होणारे अपघात, शॉर्टसर्किट्स तसेच गर्दीच्या ठिकाणी गोंधळ यासारख्या घटनांची शक्यता असल्याने नागरिकांनी आवश्यक ती खबरदारी घेऊन दीपावली सण साजरा करावा, असे आवाहन राज्य आपत्कालीन कार्य केंद्राकडून करण्यात आले आहे.

दीपावलीच्या कालावधीत दिवे, मेणबत्त्या आणि फटाके वापरताना घरगुती आगी लागण्याचा धोका वाढतो. फटाके फोडताना मुलांना भाजणे किंवा इतर इजा होऊ शकते. तसेच, विद्युत सजावट करताना निष्काळजीपणा केल्यास शॉर्टसर्किट्स होऊन आग लागण्याची शक्यता असते. सार्वजनिक ठिकाणी होणारी गर्दी आणि गोंधळ यामुळे अपघात होण्याचा धोका असल्याने नागरिकांनी आवश्यक खबरदारी घ्यावी.

नागरिकांनी फटाके केवळ परवाना असलेल्या विक्रेत्यांकडूनच खरेदी करावेत. फटाके फोडताना सुताचे किंवा सूती कपडे वापरावेत; सैल किंवा सिंथेटिक कपडे टाळावेत. लहान मुलांना फटाक्यांपासून दूर ठेवावे आणि त्यांच्यावर लक्ष ठेवावे. फटाके फोडताना पाण्याची बादली, वाळू आणि प्राथमिक उपचार पेटी जवळ ठेवावीत. घरात किंवा बंद जागेत फटाके फोडू नयेत. झोपताना किंवा घर सोडताना सर्व विद्युत दिवे बंद करावेत. एकाच सॉकेटमध्ये अनेक दिवे जोडणे टाळावे.

संभाव्य आपत्तीच्या अनुषंगाने राज्यातील सर्व जिल्हा आपत्ती व्यवस्थापन प्राधिकरणे, अग्निशमन दल, आरोग्य विभाग आणि पोलीस यंत्रणा सतर्क असून उच्च जोखमीच्या भागांमध्ये संयुक्त जनजागृती मोहीम राबवण्यात येत आहे. अग्निशमन दल आणि आपत्कालीन सेवा दलांना सज्ज राहण्याचे आदेश देण्यात आले आहेत.

स्थानिक संस्था, गृहनिर्माण सोसायट्या, शाळा आणि स्वयंसेवी संस्था यांनी आग प्रतिबंधक जनजागृती कार्यक्रम राबवावेत. तसेच सोशल मीडिया, स्थानिक मंडळे आणि मंदिरांमधून प्रतिबंधात्मक सूचना प्रसारित कराव्यात, असे आवाहनही राज्य आपत्कालीन कार्य केंद्राने केले आहे.

आपत्कालीन क्रमांक – आग लागल्यास – १०१, वैद्यकीय आपत्कालीन सेवा – १०८

The post दिवाळीच्या पार्श्वभूमीवर नागरिकांनी सुरक्षेबाबत काळजी घ्यावी, राज्य आपत्कालीन कार्य केंद्राचे नागरिकांना आवाहन appeared first on थोडक्यात घडामोडी.

पुणे : पुणे शहरात सुरु असलेल्या मुसळधार पावसाच्या पार्श्वभूमीवर पाषाणमधील पंचवटी परिसरातही परिणाम दिसून आला. गुरुवारी सकाळी साडेआठच्या सुमारास या भागात झाड कोसळल्याची घटना घडली. या दुर्घटनेत एक महाविद्यालयीन विद्यार्थिनी जखमी झाली असून तिच्यावर सध्या उपचार सुरू आहेत.

मिळालेल्या माहितीनुसार, ही घटना पंचवटी परिसरातील निशिगंध इमारतीजवळ घडली. जोरदार वाऱ्यासह झालेल्या पावसामुळे रस्त्यालगत असलेले एक जुने आणि मोठे झाड अचानक कोसळले. झाड कोसळतानाच त्याच्या खाली एक दुचाकी आणि एक चारचाकी वाहन अडकले. याच दरम्यान, त्या ठिकाणी जात असलेली काजल (वय अंदाजे २२ वर्षे) ही विद्यार्थिनी झाडाखाली सापडली आणि जखमी झाली. काजल ही सी-डॅक सेंट्रल गव्हर्नमेंट कॉलेजमध्ये शिक्षण घेत आहे.

घटनेची माहिती मिळताच पाषाण अग्निशमन केंद्रातील आपत्कालीन पथक तातडीने घटनास्थळी दाखल झाले. अधिकारी शिवाजी मेमाणे यांच्या मार्गदर्शनाखाली जवान शशिकांत धनवटे, चंद्रकांत बुरुड, देवीदास चौधरी, शुभम करांडे आणि लुकमान कमलखान यांनी तातडीने कारवाई करत झाडाखाली अडकलेल्या काजलला सुरक्षित बाहेर काढले. त्यानंतर काजलला तत्काळ औंध येथील साईश्री रुग्णालयात उपचारासाठी दाखल करण्यात आले.

या झाडामुळे काही काळ वाहतूक विस्कळीत झाली, आणि नागरिकांत घबराट पसरली होती. मात्र, पुणे महानगरपालिका आणि अग्निशमन विभागाच्या जलद प्रतिसादामुळे परिस्थिती लवकर नियंत्रणात आली आणि कोणताही मोठा अनर्थ टळला.

या घटनेनंतर महापालिकेच्या पथकाने झाड हटवण्याचे काम सुरू केले असून, वाहनांचे नुकसान व परिसरातील सुरक्षितता याचा आढावा घेतला जात आहे. या घटनेनंतर नागरिकांत सार्वजनिक ठिकाणी असलेल्या जुन्या झाडांच्या देखरेखीबाबत चिंता व्यक्त केली जात आहे.

The post पुणे : पंचवटी परिसरात झाड कोसळले; वाहने अडकली, एक विद्यार्थिनी जखमी appeared first on थोडक्यात घडामोडी.

पुणे : पुण्यातील धायरी येथील डीएसके चौकात एका इलेक्ट्रिक स्कूटरला अचानक आग लागली. घटनेची माहिती मिळताच अग्निशमन दलाच्या टीमने तत्काळ घटनास्थळी पोहोचत आग आटोक्यात आणली. या दुर्घटनेत कोणतीही जीवितहानी झालेली नाही, पण परिसरातील नागरिकांमध्ये इलेक्ट्रिक वाहनांच्या सुरक्षिततेबाबत चिंता निर्माण झाली आहे.

प्रत्यक्षदर्शींनी सांगितले की, अग्निशमन दलाच्या आगमनापूर्वी परिसरात दाट धूर दिसत होता, ज्यामुळे भीतीचे वातावरण निर्माण झाले होते. सध्या या आगीचे कारण काय आहे याचा तपास संबंधित अधिकारी करत आहेत.

स्थानिक प्रशासनाने रहिवाशांना आणि इलेक्ट्रिक वाहनधारकांना योग्य चार्जिंग पद्धतींचे पालन करण्याचे तसेच वाहनांची नियमित देखभाल करण्याचे आवाहन केले आहे, जेणेकरून अशा दुर्घटना टाळता येतील आणि सुरक्षितता सुनिश्चित करता येईल.

The post पुणे : धायरीतील डीएसके चौकात इलेक्ट्रिक स्कूटरला आग appeared first on थोडक्यात घडामोडी.

पुणे : मंगळवारी, २५ मार्च २०२५ रोजी सकाळी ९:२३ वाजता पुणे शहरातील लोणकर चौकाच्या केशव नगर परिसरातील तीन दुकानांमध्ये आग लागली. या आगीमुळे परिसरात गोंधळ उडाला, मात्र अग्निशमन दलाच्या तत्काळ आणि प्रभावी प्रतिसादामुळे आग अधिक पसरली नाही आणि मोठा अनर्थ टळला.

घटनास्थळी त्वरित पोहोचलेल्या हडपसर अग्निशमन केंद्र आणि बीटी कवडे रोड अग्निशमन केंद्राच्या कर्मचाऱ्यांनी आग आटोक्यात आणण्यासाठी त्वरित कार्यवाही केली. अग्निशमन दलाच्या कर्मचाऱ्यांनी आग शमवण्यासाठी अतिशय जलद आणि प्रभावी काम होते. हडपसर अग्निशमन केंद्राचे चालक किरण शिंदे, जवान गणेश पावले, बाबासाहेब चव्हाण, चंद्रकांत नवले, अविनाश ढाकणे आणि अमोल शिरसाट यांच्यासह बीटी कवडे रोड अग्निशमन केंद्राचे चालक शुभम दुमे, तांडेल संदीप रणदिवे, हर्षल पवार आणि प्रणय कवडे यांच्या अग्निशमन दलाने आग अधिक पसरू न देता ती लवकर शमवली, ज्यामुळे इतर दुकानांमध्ये आग पसरली नाही.

अग्निशमन विभागाच्या अधिकाऱ्यांनी दिलेल्या माहितीनुसार, या आगीत जीवितहानी झाली नाही. तथापि, दुकानातील सामान पूर्णपणे जळून खाक झाले आहे, ज्यामुळे दुकानदारांना मोठे आर्थिक नुकसान झाले आहे. आगीचे कारण अद्याप स्पष्ट झालेले नाही, आणि याबाबत तपास सुरू आहे.

आगीच्या नेमक्या कारणाचा शोध घेण्यासाठी तपास सुरू आहे. स्थानिक पोलीस आणि अग्निशमन विभागाने घटनास्थळाची पाहणी केली असून, पुढील तपास सुरू आहे.

The post पुणे : केशव नगर परिसरातील तीन दुकानांमध्ये आग, सुदैवाने जीवितहानी टळली appeared first on थोडक्यात घडामोडी.

पुणे : इयत्ता दहावीत शिकणारी मुलगी ऋतुजा जगदाळे हिचे घर पुण्यातील शुक्रवार पेठेतील गणेश अपार्टमेंटमध्ये आहे. ती आज सकाळी नऊ वाजण्याच्या सुमारास केस वाळवायला इमारतीच्या छतावर गेली होती, त्यावेळी अचानक ती पाय घसरून खाली कोसळली. मात्र, सुदैवाने खाली कोसळताना तिने इमारतीच्या तिसऱ्या मजल्याच्या ग्रीलला पकडले. त्यानंतर, या मुलीला वाचवण्यात आले.

मिळालेल्या माहितीनुसार, ऋतुजा जगदाळे हिचे वडील वॉचमन आहेत. गेल्या सहा वर्षापासून ते शुक्रवार पेठेतील गणेश अपार्टमेंटमध्ये राहतात. ऋतुजा सकाळी केस वाळवण्यासाठी इमारतीच्या टेरेसवर गेली होती. यावेळी ती टेरेसवरील ग्रीलशेजारी उभी राहिली होती. मात्र अचानक तिचा पाय घसरला आणि ती खाली कोसळली. मात्र, सुदैवाने खाली कोसळताना तिच्या हातात तिसऱ्या मजल्यावरील ग्रील आली आणि तिने या ग्रीलला गच्च पकडून ठेवलं. त्यानंतर ती जोरजोराने रडू लागली. तिच्या वडिलांनी तिचा आवाज ऐकला आणि त्यानंतर झालेला प्रकार त्यांच्या लक्ष्यात आला. त्यानंतर या मुलीला खाली उतरवण्यासाठी वरून साडी टाकण्यात आली. पण तिला वाचवण्यात अडथळे येत होते. शेवटी अग्निशमन दलाला घटनेची माहिती देण्यात आली. त्यानंतर, अग्निशमन दल तात्काळ घटनास्थळी दाखल झाले. जवानांनी या मुलीला खाली उतरवले, त्यामुळे मोठा अनर्थ टळला.

The post अनर्थ टळला! मुलगी इमारतीच्या छतावरून खाली कोसळली, पण प्रसंगावधान राखल्याने वाचला जीव… appeared first on थोडक्यात घडामोडी.

ठाणे : ठाण्यातील कळवा पूर्वेतील इंदिरा नगरमधील माँ काली चाळ येथे शनिवारी रात्री भूस्खलन झाल्यामुळे सहा घरांचे नुकसान झाले आहे. अग्निशमन दल घटनास्थळी दाखल झाले असून सुदैवाने यामध्ये कोणतीही जीवितहानी झालेली नाही.

ठाणे महापालिकेच्या प्रादेशिक आपत्ती व्यवस्थापन कक्षाने दिलेल्या माहितीनुसार, पोलीस अधिकारी, आरडीएमसी देखील घटनास्थळी दाखल झाले आहेत. आजूबाजूच्या घरांतील रहिवाशांना आरडीएमसी टीम आणि अग्निशमन दलाच्या मदतीने घोलाई नगरमधील टीएमसी शाळेत हलवण्यात आले आहे.

The post ठाण्यातील कळव्यात भूस्खलन झाल्यामुळे सहा घरांचे नुकसान appeared first on थोडक्यात घडामोडी.

पुणे : पुण्यातील कॅम्प परिसरात फॅशन स्ट्रीटमध्ये रात्री 11 च्या सुमारास भीषण आग लागली होती. या परिसरात मोठ्या संख्येने कपड्यांची दुकाने आहेत, त्यामुळे आग काही क्षणांत पसरली. घटनेची माहिती मिळताच अग्निशमन दलाच्या 15 हून अधिक गाड्या घटनास्थळी दाखल झाल्या होत्या. अग्निशमन दलाच्या जवानांना आगीवर नियंत्रण मिळवण्यात यश आलं आहे.

फॅशन स्ट्रीट हे चहुबाजूनी गजबजलेले असून तिथे जाण्यासाठी छोटासा रस्ता आहे. त्यामुळे अग्निशमन दलाच्या जवानांना तिथपर्यंत पोहोचणे अडचणीचे होत होते. तसेच इथे बघ्यांची प्रचंड गर्दी झाली होती, त्यामुळे आग विझवण्याच्या कामात अग्निशमन दलाच्या जवानांना अडचणी येत होत्या. आग नक्की कशामुळे लागली याची माहिती अद्याप मिळालेली नाही. या आगीत कपड्यांची दुकानं असलेल्या व्यावसायिकांचं मोठं नुकसान झालं आहे. अखेर तीन तासांच्या अथक प्रयत्नानंतर अग्निशमन दलाच्या जवानांना आगीवर नियंत्रण मिळवण्यात यश आलं आहे.

The post पुण्यातील कॅम्प परिसरात फॅशन स्ट्रीटमध्ये भीषण आग appeared first on थोडक्यात घडामोडी.

मुंबईतील आरे कॉलनीच्या वनक्षेत्रात भीषण आग लागल्यामुळे दहशत पसरली आहे. आजूबाजूच्या लोकांनी अग्निशमन दलाला याबाबत माहिती दिली. अग्निशमन दलाची टीम घटनास्थळी दाखल झाली असून आग विझवण्याचे प्रयत्न सुरु आहेत. आतापर्यंत या आगीमुळे कोणतीही जीवितहानी झाली नसल्याचे सांगण्यात येत आहे. तथापि, जंगलाच्या आगीमुळे झाडांचे फार नुकसान झाले आहे.

आरे कॉलनीत असलेल्या वनक्षेत्रात आग लागली. रॉयल पाम हॉटेल जवळच ही आग सुरू झाली आहे. माहिती मिळताच अग्निशमन दलाच्या 5 ते 6 गाड्या घटनास्थळी दाखल झाल्या आहेत आणि आग विझवण्यास सुरुवात केली आहे. दरम्यान, स्थानिक पोलिस परिसरातील लोकांना सुरक्षित स्थळी हलवत आहेत.

The post ब्रेकिंग : आरे कॉलनी जंगलात भीषण आग, अग्निशमन दल घटनास्थळी दाखल appeared first on थोडक्यात घडामोडी.

मुंबई : मुंबईतील मानखुर्द येथे भीषण आग लागली आहे. ही आग इतकी भीषण आहे की, धुराचे लोट १० ते १५ फुट उंच जाताना दूरुन पहायला मिळत आहेत.

मिळालेल्या प्राथमिक माहितीनुसार, मानखुर्द मंडाला येथे तेलाच्या गोदामाला ही आग लागली आहे. तेलाच्या गोदामाला आग लागल्याने झपाट्याने आग आजुबाजूला पसरली आणि आगीने रौद्र रूप धारण केलं. ज्या ठिकाणी ही आग लागली आहे त्या परिसरात लाकडाच्या वखारी आणि भंगाराची गोदाम सुद्धा आहेत. तसेच जवळच रहिवासी परिसर आहे.

आगीची माहिती मिळताच घटनास्थळी अग्निशमन दलाच्या १५ गाड्या दाखल झाल्या आहेत. अग्निशमन दलाच्या जवानांकडून आगीवर नियंत्रण मिळवण्याचे प्रयत्न सुरू आहेत.

मुंबईतील मानखुर्द येथे भीषण आग लागली. अग्निशमन दलाच्या १५ गाड्या दाखल…#mumbaifire #firebreakout #MumbaiFireupdates #Mumbai #मुंबई #mankhurd, #mumbaifirebirgade #मानखुर्द #अग्निशमनदल pic.twitter.com/ZZtldsQcXZ

— थोडक्यात घडामोडी : MARATHI NEWS – मराठी बातम्या (@thodkyaatnews) February 5, 2021

सविस्तर वृत्त लवकरच…

The post ब्रेकिंग : मुंबईतील मानखुर्द येथे भीषण आग appeared first on थोडक्यात घडामोडी.