IPL 2020 MI vs DC Mumbai Indians won by 5 wickets

IPL 2020 MI vs DC : मुंबई इंडियन्सने पाचव्यांदा घातली आयपीएलच्या जेतेपदाला गवसणी

क्रीडा

दुबई : मुंबई इंडियन्सने यावर्षीच्या आयपीएलच्या जेतेपदाला देखील गवसणी घातली आहे. या अंतिम सामन्यात दिल्ली कॅपिटल्सने मुंबईच्या संघापुढे १५७ धावांचे आव्हान ठेवले होते. पण रोहितच्या धमाकेदार खेळीच्या जोरावर मुंबईने हे आव्हान सहजरित्या  पेलले आणि जेतेपद पटकावले. मुंबईचे हे पाचवे जेतेपद ठरले, आतापर्यंत आयीएलमध्ये एकाही संघाला पाचवेळा जेतेपद पटकावता आले नाही. मुंबईच्या संघाने पाच विकेट्स राखत सहज जेतेपद मिळवले.

कमीत कमी शब्दांमध्ये मराठी बातम्यासाठी थोडक्यात घडामोडीच्या ट्विटर & फेसबुक फॉलो करा.

दिल्लीच्या १५७ धावांच्या आव्हानाचा पाठलाग करताना मुंबई इंडियन्सने पहिल्या षटकातच षटकारासह झोकात सुरुवात केली. रोहितने पहिल्याच षटकात षटकार लगावला. त्यानंतर दुसऱ्याच षटकात मुंबईने १८ धावा करत आपले इरादे स्पष्ट केले. मुंबईने पहिल्या चार षटकांमध्ये जवळपास १०च्या धावगतीने धावा केल्या. पण चौथ्या षटकाच्या पहिल्याच चेंडूवर मुंबईला पहिला धक्का बसला. मार्कस स्टॉइनिसने आपल्या पहिल्याच चेंडूवर मुंबईच्या क्विंटन डीकॉकला बाद केले. डीकॉकने १२ चेंडूंत तीन चौकार आणि एका षटकाराच्या जोरावर २० धावा केल्या.

मुंबईला पहिला धक्का बसल्यावर रोहित आणि सूर्यकुमार यादव यांची चांगली पार्टनरशिप जमली होती. पण रोहितच्या चुकीमुळे यादवला बाद व्हावे लागले. रोहित चेंडू मारत थेट धाव घेण्यासाठी धावत सुटला. त्याने यादवकडे पाहिले नाही. रोहितने अर्धी खेळपट्टी ओलांडली, पण यादव आपल्या जागेवरच थांबलेला होता. या गोष्टीचा फायदा दिल्लीच्या प्रवीण दुबेने घेतला आणि थेट चेंडू यष्टीरक्षक रिषभ पंतकडे दिला. रिषभने यावेळी सहजपणे यादवला धावचीत केले. यादव बाद होण्याचा धक्का मुंबईला बसला. पण रोहितने दुसऱ्या बाजूने जोरदार फटकेबाजी करत आपले अर्धशतकही पूर्ण केले.

श्रेयस अय्यर आणि रिषभ पंत यांच्या धडाकेबाज अर्धशतकांच्या जोरावर दिल्ली कॅपिटल्सच्या संघाला मुंबई इंडियन्सपुढे १५७ धावांचे आव्हान ठेवता आले होते. आयपीएलच्या आजच्या अंतिम फेरीत दिल्लीची ३ बाद २२ अशी अवस्था झाली होती. पण त्यानंतर अय्यर आणि पंत या दोघांनी धडाकेबाज खेळी करत मुंबईच्या गोलंदाजीवरच जोरदार हल्ला चढवला. अय्यर आणि पंत या दोघांनी अर्धशतके पूर्ण केली. या दोघांच्या दमदार फटकेबाजीमुळेच दिल्लीला मुंबईपुढे हे सन्मानजनक आव्हान ठेवता आले. श्रेयस अय्यरने यावेळी नाबाद ६५ धावांची धडाकेबाज खेळी केली.

  1. मॅन ऑफ द मॅच – ट्रेंट बोल्ट
  2. इमर्जिंग प्लेअर – देवदत्त पडिक्कल
  3. व्हॅल्युएबल प्लेअर – जोफ्रा आर्चर
  4. पेटीएम फेअरप्ले अॅवॉर्ड – मुंबई इंडियन्स
  5. सुपर स्ट्रायकर – कायरन पोलार्ड
  6. मोस्ट सिक्सेस – इशान किशन
  7. गेम चेंजर – केएल राहुल
  8. ऑरेंज कॅप – केएल राहुल
  9. पर्पल कॅप – कगिसो रबाडा
Share this :

कमीत कमी शब्दांमध्ये मराठी बातम्यासाठी थोडक्यात घडामोडीच्या टेलीग्राम चैनलला जॉइन करा.

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत