मुंबई : भारतातील 120 कोटींहून अधिक दूरध्वनी ग्राहकांच्या, विशेषतः मोबाईल वापरकर्त्यांच्या डिजिटल सुरक्षिततेसाठी दूरसंचार विभागाने “संचार साथी” हा नागरिक-केंद्रित उपक्रम सुरू केला आहे. मे 2023 मध्ये सुरू झालेल्या या डिजिटल प्लॅटफॉर्मद्वारे आता मोबाईल वापरकर्त्यांना त्यांच्या कनेक्शनवरील नियंत्रण, फसवणुकीपासून संरक्षण आणि सुरक्षा धोक्यांची नोंद करण्याची सुलभ व प्रभावी सुविधा उपलब्ध झाली आहे.

मुंबई एलएसएच्या दूरसंचार विभागाचे संचालक विनय जांभळी आणि उपमहासंचालक (डीडीजी) सुमनेश जोशी यांनी महाराष्ट्रातील नागरिकांना सायबर सुरक्षिततेबाबत सजग राहण्याचे आवाहन केले आहे.

नागरिकांनी आपल्या मोबाईल डिव्हाइसवरील अनावश्यक अ‍ॅप्स तत्काळ काढून टाकावेत आणि फोन नेहमीच नवीनतम सुरक्षा ॲपसह अपडेट ठेवणे गरजेचे आहे. नागरिकांनी दूरसंचार विभागाचे नागरिक-केंद्रित ‘संचार साथी’ हे अ‍ॅप डाउनलोड करून त्यातील सर्व उपयुक्त वैशिष्ट्यांचा वापर करावा.

पोर्टल आणि अ‍ॅपवरील प्रमुख सुविधा

संचार साथी पोर्टलवर “नो युवर मोबाईल कनेक्शन”, “ब्लॉक युवर लॉस्ट/स्टोलन मोबाईल” आणि “व्हेरीफाय आयएमईआय” या महत्त्वपूर्ण सेवा उपलब्ध आहेत. या सेवांद्वारे नागरिकांना त्यांच्या मोबाईल क्रमांकांची माहिती तपासणे – म्हणजेच त्यांच्या नावावर एकाच ओळखीसह किती कनेक्शन आहेत हे पाहणे, हरवलेले किंवा चोरीस गेलेले मोबाईल डिव्हाइस आयएमईआय ब्लॉक करणे, तसेच आयएमईआय क्रमांक आणि डिव्हाइसची प्रामाणिकता पडताळणी करणे शक्य होते.

या सुविधांमुळे मोबाईल ओळख व्यवस्थापन आणि सुरक्षिततेस मोठा हातभार लागला आहे. याशिवाय “चक्षु” या विशेष सेवेच्या माध्यमातून संशयास्पद कॉल, एसएमएस किंवा व्हॉट्सअॅप संदेश यांची नोंद नागरिक करू शकतात. त्यामुळे फसवणूक, सायबर गुन्हे, बनावट ओळख निर्माण करणे तसेच अवांछित व्यावसायिक संदेशांवर नियंत्रण ठेवणे सोपे झाले आहे.

मोबाईल आयएमईआय माहिती सुरक्षित ठेवा

नागरिकांना सूचित करण्यात येते की त्यांनी त्यांच्या खरेदी केलेल्या मोबाईल उपकरणांचे मूळ चलन सुरक्षित ठेवावे, कारण त्या चलनावर संबंधित उपकरणाचा आयएमईआय क्रमांक नमूद केलेला असतो.

जर मोबाईल उपकरणात दोन सिमकार्ड स्लॉट असतील, तर त्या उपकरणास दोन वेगवेगळे आयएमईआय क्रमांक असतात. वापरकर्त्यांनी *#06# हा कोड डायल करून आपले आयएमईआय क्रमांक तपासावेत आणि त्याचा स्क्रीनशॉट आपल्या ईमेल, जीमेल किंवा इतर सुरक्षित ठिकाणी जतन करून ठेवावा. यामुळे उपकरण हरवल्यास संबंधित माहिती सहज उपलब्ध होऊन आवश्यक कार्यवाही करता येईल.

‘संचार साथी’च्या माध्यमातून मोबाईल हरवल्यास त्याचा गैरवापर टाळता येतो, तसेच फसवणूक किंवा संशयास्पद कॉलची तक्रार नोंदवून नागरिक स्वतः सायबर सुरक्षिततेच्या साखळीत सक्रिय योगदान देऊ शकतात.

राष्ट्रीय सुरक्षेला बळकटी

संचार साथी पोर्टलद्वारे परदेशी क्रमांक भारतीय (+91) क्रमांक म्हणून दाखवून होणाऱ्या फसवणुकीच्या घटनांवर प्रभावी कारवाई करण्यात येत आहे.

अशा तक्रारींवर दूरसंचार विभाग आणि पोलीस यांच्यातील समन्वयातून तातडीने तपास व कारवाई करण्यात येते आणि संबंधित फसवणूक नेटवर्क निष्क्रिय केले जातात. यामुळे राष्ट्रीय सुरक्षेला बळकटी मिळते.

नागरिकांना विनंती आहे की त्यांच्या मोबाईलवर आंतरराष्ट्रीय कॉल भारतीय क्रमांकावरून येत असल्यास त्वरित टोल-फ्री क्रमांक 1963 वर माहिती द्यावी.

इतर उपयुक्त सेवा

“फाईंड वायर लाईन इंटरनेट सर्व्हिस प्रोव्हायडर” (आयएसपी) या सेवेच्या माध्यमातून नागरिकांना त्यांच्या परिसरातील परवानाधारक इंटरनेट सेवा प्रदात्यांची माहिती सहज उपलब्ध होते. तसेच “ट्रस्टेड कॉन्टॅक्ट डिटेल्स” या वैशिष्ट्याचा वापर करून नागरिक संबंधित वेबसाईट, ईमेल किंवा संपर्क क्रमांकाची प्रामाणिकता पडताळू शकतात, ज्यामुळे ऑनलाईन फसवणुकीपासून बचाव करता येतो.

या उपक्रमांतर्गत 2.35 कोटी सिम-संबंधित प्रकरणांचे यशस्वी निराकरण करण्यात आले असून, 40 लाख मोबाईल हँडसेट ब्लॉक, त्यापैकी 25 लाख ट्रेस झाले आहेत. तसेच 39 लाखांहून अधिक संशयास्पद दूरसंचार संसाधनांवर कारवाई करण्यात आली आहे.

संचार साथीचा वापर वाढविण्यासाठी दूरसंचार विभागामार्फत व्यापक जनजागृती आणि प्रसिद्धी मोहिमा राबविण्यात येत आहेत. आता या सेवा मोबाईल अ‍ॅपच्या स्वरूपातही उपलब्ध असल्यामुळे त्या अधिक सुलभ आणि सर्वसामान्य जनतेसाठी उपयुक्त ठरणार आहेत.

डिजिटल युगातील नागरिकांचा साथीदार

शासनाच्या या उपक्रमामुळे देशातील नागरिक डिजिटल युगात अधिक सुरक्षित, सजग आणि सशक्त बनत असून, “संचार साथी” हा उपक्रम नागरिकांच्या हिताचा खरा साथीदार ठरत आहे. अधिक माहितीसाठी www.sancharsaathi.gov.in या संकेतस्थळाला भेट द्या.

The post मोबाईल वापरकर्त्यांच्या डिजिटल सुरक्षिततेसाठी ‘संचार साथी’ पोर्टल आणि अ‍ॅप appeared first on थोडक्यात घडामोडी.

नवी दिल्ली : इन्स्टंट मेसेजिंग प्लॅटफॉर्म WhatsApp युझर्ससाठी सतत नवीन वैशिष्ट्ये आणि अपडेट्स आणत असतात. आता व्हॉट्सऍपने व्हिडिओ कॉलिंगदरम्यान मल्टीटास्किंग सक्षम करण्यासाठी पिक्चर-इन-पिक्चर मोड आणला आहे. या फीचरच्या मदतीने व्हॉट्सऍप व्हिडिओ कॉलिंगदरम्यान इतर ऍप्सचाही वापर करता येणार आहे. सध्या या फीचरची चाचणी सुरू आहे. अलीकडेच व्हॉट्सऍपने बीटा चाचणीसाठी कॉन्टॅक्ट कार्ड शेअर फीचर जारी केले आहे.

पिक्चर-इन-पिक्चर मोड
व्हॉट्सऍपच्या आगामी फीचरचा मागोवा घेणाऱ्या WAbetaInfo या वेबसाइटने या नव्या फीचरची माहिती दिली आहे. WAbetaInfo नुसार, व्हिडिओ कॉलिंगचा अनुभव वाढवण्यासाठी हे फीचर आणले जात आहे. पिक्चर-इन-पिक्चर मोड वैशिष्ट्यांच्या मदतीने, वापरकर्ते व्हिडिओ कॉलिंग करताना देखील इतर अॅप्स वापरण्यास सक्षम असतील.

म्हणजेच, तुम्ही पिक्चर-इन-पिक्चरमध्ये इतर ऍप्सच्या स्क्रीनवर व्हिडिओ कॉलिंग सुरू ठेवू शकता. सोप्या भाषेत सांगायचे तर, या फीचरच्या मदतीने यूजर्स व्हिडिओ कॉलिंगदरम्यानही मल्टीटास्किंग करू शकतील.

कॉन्टॅक्ट कार्ड शेअर फीचर
व्हॉट्सऍपचे कॉन्टॅक्ट शेअरिंग फीचर कॉन्टॅक्ट कार्ड शेअर बीटा टेस्टिंगसाठी जारी करण्यात आले आहे. इन्स्टंट मेसेजिंग ऍप व्हॉट्सऍपच्या या फीचरच्या मदतीने तुम्ही आता तुमच्या व्हॉट्सऍप विंडोज ऍपवरून संपर्क सहज शेअर करू शकता. वास्तविक, सध्या संपर्क शेअर करण्याची सुविधा केवळ व्हॉट्सऍपच्या मोबाइल ऍपमध्ये उपलब्ध आहे. आता कंपनी विंडोज ऍपसाठीही हे फीचर जारी करणार आहे. या फीचरच्या मदतीने, व्हॉट्सऍप वापरकर्ते सामान्य संपर्काप्रमाणे सहजपणे संपर्क सामायिक करण्यास सक्षम असतील आणि संपर्क प्राप्त करणारे वापरकर्ते कोणत्याही बदलाशिवाय ते सेव्ह करण्यास सक्षम असतील.

The post WhatsApp ने युझर्ससाठी आणलं जबरदस्त फिचर, व्हिडीओ कॉलिंगदरम्यानही करू शकणार मल्टीटास्किंग, जाणून घ्या… appeared first on थोडक्यात घडामोडी.

नवी दिल्ली : तुम्ही जर विचार करत असाल की तुम्ही तुमच्या स्मार्टफोनचे आयुष्य कसे वाढवू शकता? चला तर जाणून घेऊया आपण कोणत्या सामान्य चुका करत आहात, ज्यामुळे तुमचा स्मार्टफोन खराब होऊ शकतो.

मोबाईलमधील बॅटरी हा फोनचा एक अतिशय महत्त्वाचा भाग आहे. फोन नेहमी चार्ज असणे गरजेचे असले तरीही काही चुका कटाक्षाने टाळायलाच हव्यात. आपण अनेकदा स्मार्टफोनच्या बॅटरी संबंधी काही चुका करतो व त्यामुळे मोठे नुकसान होण्याची शक्यता असते. या चुकांमुळे फोनची बॅटरी अधिक गरम होते. बऱ्याचदा त्यामुळे बॅटरीचा स्फोट होण्याच्या देखील घटना घडतात. या चुका टाळून आपण स्वतःला सुरक्षित ठेवू शकतो.

या चुका टाळा :

• चार्जर खराब झाल्यावर आपण पैसे वाचवण्यासाठी डुप्लिकेट चार्जरचा वापर करतो. यामुळे बॅटरी लाइफवर परिणाम होतो. यामुळे फोनचा चार्जिंग प्वाइंट देखील खराब होतो. त्यामुळे फोनच्या ओरिजनल चार्जरचा वापर करावा.
• अनेकजण कार चार्जरचा वापर करतात. मोबाइलला कार चार्जरद्वारे चार्ज केल्याने फोनच्या बॅटरीवर परिणाम होतो. कार चार्जर ऐवजी पॉवर बँकचा उपयोग करणे हा चांगला पर्याय आहे.
• फोन अनेकदा गरम होतो, अशावेळी स्विच ऑफ करायला हवा. पुन्हा सामान्य तापमानवर आल्यानंतर त्याचा वापर करावा.
• फोनची बॅटरी खराब झाल्यास डुप्लिकेट बॅटरी वापरू नये. यामुळे फोन खराब होतो.
• अनेकदा आपण झोपताना उशी खाली मोबाइल ठेवून झोपतो. यामुळे फोनचे तापमान अधिक वाढते व फोन गरम होतो. हे बॅटरीवर अधिक ताण पडल्याने होते. अशात फोनचा स्फोट होण्याची शक्यता वाढते.
• रात्रभर फोन चार्जिंगला लावून झोपण्याची सवय असेल तर त्वरित बंद करा.
• सुर्यप्रकाश पडेल अशा ठिकाणी ठेवून फोन चार्ज करू नये. यामुळे फोन गरम होतो व स्फोट होण्याचा धोका असतो.
• चार्जर नेहमी सॉकेटमध्ये लावून ठेवू नये. आवश्यक असेल तेव्हाच ते सॉकेटमध्ये लावावे.
• फोन चार्जिंगला लावून फोनवर बोलू नये किंवा फोनचा वापर करू नये.
• बॅटरी गरम करणारी आणखी एक गोष्ट म्हणजे चार्जिंग करताना फोनचा कव्हर तसाच ठेवणे. त्यामुळे उष्णता फोनच्या कव्हरमध्ये अडकते आणि बॅटरी देखील गरम होते.
• सर्वसाधारण नियम म्हणजे महिन्यातून फक्त एकदा बॅटरी पूर्णपणे (१००%) चार्ज करा. दररोज 20% आणि 80% दरम्यान ठेवा.

The post स्मार्टफोनचा वापर करताना ‘या’ चुका कटाक्षाने टाळा, स्मार्टफोनचे आयुष्य वाढवा… appeared first on थोडक्यात घडामोडी.

Redmi 6A Blast : स्मार्टफोनला आग लागण्याच्या घटना वारंवार समोर येत आहेत. सहसा फोनचा स्फोट किंवा आग लागल्यावर कोणीतरी जखमी झाल्याची बातमी येते, मात्र यावेळी स्मार्टफोनच्या स्फोटामुळे एका महिलेचा मृत्यू झाला आहे. रिपोर्टनुसार हा स्फोट Redmi 6A स्मार्टफोनमध्ये झाला आहे. टेक YouTuber MD Talk YT ने ट्विट करून याबाबत माहिती दिली आहे.

YouTuber MD Talk YT च्या दाव्यानुसार, त्याची मावशी रात्री तिचा Redmi 6A फोन उशीखाली ठेऊन झोपली होती. मध्यरात्री अचानक फोनचा मोठा आवाज झाला आणि त्यात त्याच्या मावशीचा मृत्यू झाला. YouTuber ने या फोनचे अनेक फोटो देखील शेअर केले आहेत. फोटोंमध्ये दिसत आहे की फोनचा मागील पॅनल पूर्णपणे खराब झाला आहे. पलंगावर रक्त पसरलेले असल्याचे फोटोंमध्ये दिसत आहे.

या अहवालावर Xiaomi ने म्हटले आहे की ते या प्रकरणाची चौकशी करत आहेत आणि या दुःखाच्या वेळी पीडितेच्या कुटुंबासोबत आहेत. Xiaomi ने असेही म्हटले आहे की ते पीडितेच्या कुटुंबाला शक्य ती सर्व मदत करतील. YouTuber ने Xiaomi चे उपाध्यक्ष मनु कुमार जैन यांना देखील फोनच्या फोटोसह टॅग केले होते. तथापि, या प्रकरणी पोलिसात तक्रार केलेली आहे की नाही याबद्दल कोणतीही माहिती प्राप्त झालेली नाही.

या संपूर्ण प्रकरणावर तात्काळ प्रतिक्रिया देताना, Xiaomi ने म्हटले आहे की हे प्रकरण खूप गंभीर आहे, कारण ग्राहकांची सुरक्षा ही त्यांची पहिली प्राथमिकता आहे. सुरुवातीला हे बॅटरी डॅमेज झाल्याचे प्रकरण दिसत आहे, परंतु कंपनीकडून अद्याप असे कोणतेही अधिकृत विधान करण्यात आलेले नाही. भारतात फोन स्फोटाची ही पहिलीच घटना नाही. याआधीही अनेक फोनला आग लागल्याच्या घटना समोर आल्या आहेत.

The post रेडमी स्मार्टफोनचा स्फोट होऊन महिलेचा मृत्यू, झोपताना उशीखाली ठेवला होता फोन appeared first on थोडक्यात घडामोडी.

नवी दिल्ली : गुगल प्ले स्टोर मध्ये उपलब्ध असलेल्या ३५ ऍप्समध्ये मेलवेयर आढळले आहेत. हे ऍप्स यूजर्सचा पैसा चोरी करीत आहेत. या ऍप्सपैकी कोणतेही ऍप तुमच्या मोबाइल मध्ये इंस्टॉल असेल तर ते तात्काळ डिलीट करा, अन्यथा तुमचे मोठे नुकसान होण्याची शक्यता आहे. IT सुरक्षा संशोधक बिटडेफेंडरने Google Play Store वर 35 मालवेअर ऍप्स शोधले आहेत, जे वापरकर्त्याच्या फोनला संक्रमित करू शकतात.

2 दशलक्षाहून अधिक डाउनलोडसह, हे ऍप्स स्वतःला सेटिंग ऍप्स म्हणून दाखवतात. एकदा डिव्हाइसवर स्थापित झाल्यानंतर, हे ऍप्स वापरकर्त्यांच्या फोनवर जाहिराती दर्शवू लागतात. ते शॉर्टकट तयार करणे, एकाधिक सूचना दाखवणे आणि इतर ऍपच्या विंडो ब्लॉक करणे यासारखी कामे देखील करतात. ही ऍप्स त्यांचे नाव आणि चिन्ह स्वतः बदलू शकतात, ज्यामुळे त्यांना शोधणे अधिक कठीण होते, ही अधिक धोकादायक बाब आहे.

गुगलने यापैकी अनेक ऍप्स गुगल प्ले स्टोअरवरून काढून टाकले आहेत. जर एखादा युझर अजूनही ते वापरत असेल, तर त्याने हे ऍप्स त्यांच्या स्मार्टफोनमधून तात्काळ हटवले पाहिजे. अहवालानुसार, हे मालवेअर अँड्रॉइड ऍप्लिकेशन्स 2 दशलक्ष वेळा डाउनलोड केले गेले आहेत. या ऍप्सची डाउनलोड संख्या 10,000 ते 100,000 पर्यंत आहे.

३५ धोकादायक ऍप्स 

1. Wallpapers PackBig Emoji
2. Keyboard
3. 100KGrad Wallpapers
4. 3D BackdropsEngine Wallpapers
5. Live & 3DStock Wallpapers
6. 4K & HDEffectMania
7. Photo EditorArt Filter
8. Deep PhotoeffectFast Emoji
9. KeyboardCreate Sticker for WhatsappMath Solver
10. Camera HelperPhotopix Effects
11. Art FilterLed Theme
12. Colorful KeyboardKeyboard
13. Fun Emoji
14. StickerSmart WifiMy GPS Location
15. Image Warp Camera
16. Art Girls Wallpaper
17. HDCat SimulatorSmart
18. QR CreatorColorize
19. Old Photo
20. GPS Location Finder
21. Girls Art Wallpaper
22. Smart QR Scanner
23. GPS Location Maps
24. Volume ControlSecret
25. Horoscope
26. Smart GPS Location
27. Animated Sticker
28. MasterPersonality
29. Charging Show
30. Sleep Sounds
31. QR Creator
32. Media Volume Slider
33. Secret Astrology
34. Colorize Photos Phi 4K
35. Wallpaper Anime HD

अशा ऍप्सपासून आपल्या Android फोनचे संरक्षण कसे करावे?
काही प्रतिबंधात्मक उपाय केल्याने Android वापरकर्ते अशा दुर्भावनापूर्ण ऍप्सना बळी पडणे टाळू शकतात.

• डाउनलोड करण्यापूर्वी ऍप परवानग्या पहा
• ऍपचे वापरकर्ता रेटिंग तपासा
• नेहमी तुमच्या फोनवर Android चे लेटेस्ट व्हर्जन चालवा.

The post अलर्ट! मोबाईलमधून तात्काळ डिलीट करा ‘हे’ धोकादायक ऍप्स, अन्यथा होईल मोठे नुकसान appeared first on थोडक्यात घडामोडी.

भारतीय बाजारपेठेत इलेक्ट्रिक वाहनांची मागणी झपाट्याने वाढत आहे, बहुतांश वाहन उत्पादक या विभागात त्यांची वाहने सादर करण्यात गुंतलेले आहेत. यासोबतच सरकार पारंपरिक इंधनावरील (पेट्रोल आणि डिझेल) अवलंबित्व कमी करण्यासाठी सर्वतोपरी प्रयत्न करत आहे. रॉयल एनफील्डचे काही मॉडेल्स आधीपासून इलेक्ट्रिक अवतारात आहेत, आज आपण त्यापैकी एक असलेल्या रॉयल एनफील्ड फोटॉनविषयी जाणून घेऊयात.

आकर्षक लुक आणि शक्तिशाली इलेक्ट्रिक मोटरने सुसज्ज ही बाईक रॉयल एनफिल्ड बुलेट आहे, ज्यामध्ये इलेक्ट्रिक पॉवरट्रेन वापरून इलेक्ट्रिक बाइक म्हणून डिझाइन केले आहे. हे इलेक्ट्रिक क्लासिक कार्स नावाच्या यूके-आधारित कंपनीने इलेक्ट्रिक बाइकमध्ये रूपांतरित केले आहे, जे सहसा कारसाठी अशा प्रकारचे परिवर्तन करते. कंपनीने या बाईकचा लूक, डिझाइन आणि मेकॅनिझममध्ये बदल केले आहेत, ज्यामुळे ती पूर्णपणे इलेक्ट्रिक बाइक बनली आहे.

फोटॉनमध्ये 3D मुद्रित पॅनेलसह एक मोठा बॅटरी पॅक आहे. बॅटरी पॅकमध्ये 2.5 kWh Li-ion LG Chem बॅटरी वापरली गेली आहे. इलेक्ट्रिक रॉयल एनफील्ड बाईक 13 किलोवॅट वॉटर-कूल्ड इलेक्ट्रिक मोटरद्वारे चालविली जाते जी मागील चाकाच्या हबवर बसविली जाते. परिणामी, या इलेक्ट्रिक मोटरसायकलमध्ये नेहमीच्या साखळी किंवा बेल्ट ड्राइव्हचा समावेश नाही. दिलेली इलेक्ट्रिक मोटर थेट मागील चाकाला चालवते, त्यामुळे अनावश्यक घर्षण कमी होते आणि अनावश्यक साखळी किंवा बेल्टचा आवाज होत नाही.

मीडिया रिपोर्ट्सनुसार, फोटॉन सुमारे 6 सेकंदात 30 mph (48 km/h) ते 50 mph (80 km/h) पर्यंत पिकअप घेण्यास सक्षम आहे. तिचा टॉप स्पीड 112 किमी/तास आहे आणि जर ती 80-96 किमी/तास वेगाने चालवली तर ही बाईक एका चार्जमध्ये 128 ते 160 किमीपर्यंत चालते. यात 7 kW ऑनबोर्ड चार्जर आहे, जो सुमारे 90 मिनिटांत बॅटरी पॅक पूर्णपणे चार्ज करतो. या बाईकची किंमत अंदाजे 18.8 लाख रुपये आहे.

The post रॉयल एनफिल्ड इलेक्ट्रिक बुलेट एका चार्जवर चालते 160 कि.मी.पर्यंत, जाणून घ्या फीचर्स… appeared first on थोडक्यात घडामोडी.

नवी दिल्ली : देशातील दूरसंचार कंपन्या सर्व प्रकारच्या ग्राहकांसाठी प्रीपेड प्लॅन ऑफर करतात. तुम्हाला दर महिन्याला रिचार्ज करायचे असेल, तर तुमच्यासाठीही प्लॅन आहे आणि तुम्हाला एक वर्षाची वैधता असलेला प्लॅन हवा असेल तर अशा योजना देखील उपलब्ध आहेत. बहुतेक ग्राहकांना एक वर्षाच्या वैधतेसह प्रीपेड योजना आवडतात. सर्वात महत्त्वाची गोष्ट म्हणजे या प्लॅन्समध्ये वापरकर्त्यांना वर्षभरात वारंवार रिचार्ज करण्याच्या त्रासातून सुटका मिळते आणि अनेक उत्तम फायदे या प्लॅन्सना अधिक आकर्षक बनवतात.

देशातील आघाडीची टेलिकॉम कंपनी जिओकडे असे अनेक जबरदस्त प्लॅन आहेत. Jio चा हा प्रीपेड प्लान 4199 रुपयांना उपलब्ध आहे. एका वर्षाच्या वैधतेसह या प्लॅनमध्ये, कंपनी दररोज 3GB डेटा आणि अमर्यादित व्हॉइस कॉलिंगसह Disney + Hotstar Premium वर मोफत प्रवेश देखील देत आहे. त्याच वेळी, Jio च्या या प्लॅनची ​​तुलना या बजेटमध्ये येणाऱ्या Vodafone Idea आणि Airtel च्या प्रीपेड प्लॅनशी केली जाऊ शकते.

आज आपण रिलायन्स जिओ, वोडाफोन आयडिया आणि एअरटेलच्या एक वर्षभर वैधता असलेल्या प्रीपेड प्लॅन्सबद्दल तपशीलवार माहिती घेऊ.

जिओचा ४१९९ रुपयांचा प्रीपेड प्लॅन :
जिओचा ४१९९ रुपयांचा प्रीपेड प्लॅन ३६५ दिवसांची वैधता देतो. डेटाबद्दल बोलायचे झाल्यास, या प्लानमध्ये दररोज 3GB डेटा मिळतो, जो एकूण 1095 GB डेटा बसतो. या प्लॅनमध्ये कंपनी दररोज 100 एसएमएस मोफत देते. या प्लानमध्ये सर्व नेटवर्कवर अनलिमिटेड कॉलिंग देखील उपलब्ध आहे. तसेच, डिस्ने + हॉटस्टार प्रीमियम सबस्क्रिप्शन देखील या प्लॅनमध्ये 1 वर्षासाठी उपलब्ध आहे.

एअरटेलचा 3359 रुपयांचा प्रीपेड प्लॅन :
एअरटेलचा 3359 रुपयांचा प्रीपेड प्लॅन वर्षभर वैधता ऑफर करतो. यामध्ये दररोज 2.5GB डेटा दिला जातो. या प्लॅनमध्ये दररोज १०० एसएमएस मोफत उपलब्ध आहेत. यामध्ये सर्व नेटवर्कवर अनलिमिटेड कॉलिंग दिले जाते. इतर फायद्यांबद्दल बोलायचे झाल्यास, या प्लॅनमध्ये 1 वर्षासाठी Disney + Hotstar प्रीमियम सबस्क्रिप्शन देखील उपलब्ध आहे.

Vodafone Idea चा Rs 3099 प्रीपेड प्लान :
Vodafone Idea च्या Rs 3099 च्या प्रीपेड प्लान मध्ये रोज 2.5GB डेटा दिला जातो. या प्लॅनमध्ये 365 दिवसांची वैधता देण्यात आली आहे. दररोज 100 SMS विनामूल्य उपलब्ध आहेत. सर्व नेटवर्कवर अमर्यादित कॉलिंग उपलब्ध आहे. यामध्ये Binge ऑल नाईट डेटा उपलब्ध आहे, ज्यामध्ये 12 ते सकाळी 6 या वेळेत अमर्यादित डेटा सर्फिंग उपलब्ध आहे, आठवड्याच्या दिवसात शिल्लक राहिलेला डेटा शनिवार आणि रविवारी वीकेंड डेटा रोलओव्हर अंतर्गत वापरता येईल आणि याशिवाय डेटा डिलाइट सारखे फायदेही मिळतात. स्ट्रीमिंग फायद्यांबद्दल बोलायचे झाल्यास, या प्लॅनमध्ये Disney + Hotstar प्रीमियम सबस्क्रिप्शन देखील दिलेले आहे.

The post मस्तच! एकदाच रिचार्ज करा आणि वर्षभर वापरा, मिळवा दररोज 3GB पर्यंत डेटा, फ्री कॉलिंग आणि Disney+Hotstar सारखे जबरदस्त फायदे appeared first on थोडक्यात घडामोडी.

लातूर : वीज पडण्याच्या घटनेतील जीवितहानी कमी करण्यासाठी किंबहुना टाळण्यासाठी काही ठोस उपाययोजना सुरु आहेतच, तथापि यावरचा एक उपाय म्हणजे पृथ्वी विज्ञान मंत्रालय भारत सरकार यांनी वादळी पाऊस, वीजांच्या कडकडाटाचा अचूक अंदाजाची पूर्वसूचना नागरिकांना मिळावी, याकरिता ‘दामिनी’ ॲप विकसित केले आहे. या ॲपच्या माध्यमातून वादळी पाऊस, वीजांच्या कडकडाटाचे त्यांच्या परिसरातील अचूक अंदाज पंधरा मिनिटे ते अर्धा तास आधी नागरिकांना घरबसल्या मिळणार आहेत. त्यामुळे वादळी वाऱ्यांसह येणारा पाऊस आणि वीज पडल्यामुळे होणारी नागरिकांची जीवितहानी टाळणे शक्य होणार आहे.

लातूर जिल्हा मराठवाड्यात वीज पडून दुर्घटना होण्यात दुसऱ्या स्थानी आहे. यावर उपाय शोधण्यासाठी जिल्हा प्रशासनाने स्वामी रामानंद तीर्थ विद्यापीठाच्या सहकार्याने अभ्यासगट स्थापन केला होता. त्या अभ्यासगटाचे सादरीकरण झाले असून अभ्यासगटाने सुचवलेल्या उपाययोजना करण्यासाठी जिल्हाधिकारी पृथ्वीराज बी. पी. यांनी जिल्हा आपत्ती व्यवस्थापन प्राधिकरणाला सूचना दिल्या आहेत. त्याची अंमलबजावणी तात्काळ करणार असल्याचे जिल्हा आपत्ती व्यवस्थापन अधिकारी साकेब उस्मानी यांनी सांगितले.

मान्सूनपूर्व आणि मान्सूनच्या सुरुवातीच्या कालखंडात विशेषतः मे, जून व जुलै तसेच मान्सून पश्चात साधारणतः माहे ऑक्टोबर या महिन्यात राज्यात अनेक ठिकाणी वीजांच्या कडकडाटासह पाऊस हजेरी लावतो. मान्सून दाखल झाल्यावर साधारणतः पहिल्या पावसात शहरी भागाबरोबरच विशेष करुन ग्रामीण भागात वीज कोसळून अनेक शेतकरी व नागरिकांना आपला जीव गमवावा लागतो.

अभ्यासगटाने केलेल्या सादरीकरणानुसार जिल्ह्यात गेल्या चार वर्षात काही जणांचा आणि अनेक जनावरांचा दुर्दैवी मृत्यू झाल्याची दुर्दैवी घटना घडल्या आहेत. वीजांसह होणाऱ्या पावसाचे पूर्वानुमान शेतकऱ्यांना व नागरिकांना काही वेळ अगोदर समजावे, यासाठी सदर दामिनी ॲप उपयोगी ठरत आहे. पुण्यातील भारतीय उष्णप्रदेशीय हवामान संशोधन संस्था (आयआयटीएम) या संस्थेने हे ॲप विकसित केले आहे. ‘दामिनी’ ॲपसाठी आयआयटीएमने लाइटनिंग लोकेशन नेटवर्क हे मॉडेल विकसित केले आहे. माहिती संकलनासाठी विविध भागात सेन्सर बसविण्यात आले आहेत. या ॲपमुळे शेतकरी, नागरिकांना वादळी पाऊस, वीजांच्या कडकडाटाचे पंधरा मिनिट ते अर्धा तास आधी अचूक अंदाज मिळू शकतात. सदरचे अॅप GPS लोकेशन ने काम करीत असून वीज पडण्याच्या १५ मिनिटापूर्वी सदरच्या ॲपमध्ये प्रभावित होण्याची शक्यता असलेल्या क्षेत्राची दिशादर्शक स्थिती दर्शविण्यात येते.

वीजा पडण्याची शक्यता तसेच वीज म्हणजे नेमके काय, वीज कोसळणे याची शास्त्रीय माहिती आणि वीजांपासून वाचण्यासाठी नागरिकांनी काय करायला पाहिजे, याचीही सविस्तर सचित्र माहिती ‘दामिनी’ ॲपमध्ये देण्यात आली आहे. या ॲपवर लोकेशन टाकल्यानंतर संबंधित भागात वादळी वारे अथवा वीजांच्या गडगडांची शक्यता असल्यास ती माहिती बघायला मिळत असते, त्यामुळे या माहितीचा आधारावर शेतकरी व नागरिक वेळीच सावध होऊन त्यांच्या जीव वाचवू शकतात. जिल्ह्यातील शेतकऱ्यांनी आणि नागरिकांनी हे ॲप डाऊनलोड करुन त्याचा वापर करण्याबाबत, तसेच स्थानिक पातळीवर गावस्तरीय कर्मचारी, तलाठी, ग्रामसेवक, कृषी सहायक, शिक्षक, स्थानिक लोकप्रतिनिधी यांनी सामान्य नागरीक/शेतकरी यांना हे अॅप डाऊनलोड करण्यास प्रवृत्त करावे असे आवाहन लातूर जिल्हा आपत्ती व्यवस्थापन प्राधिकरणा तर्फे करण्यात आले आहे.

दामिनी ॲप फोनमध्ये कसे घ्यावे?

गुगल प्ले स्टोअर मध्ये जाऊन ‘damini’ असं टाईप केल्यानंतर हे ॲप दिसेल. ते आपल्या फोन मध्ये डाऊनलोड करून घ्या. ते आपल्या सुरक्षिततेसाठी मोठी भूमिका बजावू शकतं. अधिक सतर्क राहण्यासाठी हे ॲप आपल्याकडे असायला हवं. हे मोबाईल ऍप आजच डाऊनलोड करून घ्या.

The post वीज पडण्याचा इशारा देणारे ‘दामिनी ऍप’, आजच आपल्या मोबाईलमध्ये डाऊनलोड करा… appeared first on थोडक्यात घडामोडी.

TRAI Caller Id Feature : जर तुम्ही स्पॅम कॉल्समुळे त्रस्त असाल तर तुमच्यासाठी भारतीय दूरसंचार नियामक प्राधिकरण (TRAI) कडून एक आनंदाची बातमी आहे. TRAI आता Truecaller सारखी कॉलर आयडी सुविधा सुरू करणार आहे. ट्राय अशा संकल्पनेवर काम करत आहे, ज्याद्वारे एखाद्याच्या फोनवर कॉल करणाऱ्याचे नाव त्याच्या सिमवरील केवायसीद्वारे ओळखले जाईल.

स्पॅम कॉलच्या घटनांमध्ये होईल घट
Truecaller ऍप इन्स्टॉल केल्यानंतर, तुम्हाला कॉल आल्यावर जरी कॉलरचे नाव कॉन्टॅक्ट लिस्टमध्ये समाविष्ट नसले तरीही त्या व्यक्तीचे नाव स्क्रीनवर दिसून येते. जरी Truecaller दाखवत असलेले नाव KYC वर आधारित नसले तरी हे ऍप वापरकर्त्याने स्वतः सेट केलेले नाव दाखवते. परंतु ट्रायच्या या नवीन फ्रेमवर्कला अंतिम रूप दिल्यानंतर, तुम्हाला तुमच्या फोनवर वापरकर्त्याचे केवायसी नाव देखील दिसेल. तज्ञांच्या मते, हे वैशिष्ट्य आल्याने स्पॅम आणि फसवणूक करणाऱ्या कॉलची वाढती प्रकरणे कमी होतील.

वापरकर्ते फेक कॉल टाळण्यास सक्षम
दूरसंचार विभागाने ट्रायला यावर काम सुरू करण्यास सांगितले आहे. ट्रायचे अध्यक्ष पीडी वाघेला म्हणाले की, येत्या काही महिन्यांत यावर सल्लामसलत सुरू होऊ शकते. ते म्हणाले की, ‘आम्हाला या प्रकरणाचा संदर्भ मिळाला असून लवकरच आम्ही कामाला सुरुवात करू. हे फीचर आणल्यानंतर यूजर्स फेक कॉल्स टाळू शकतील.

Truecaller कडून स्वागत :
Truecaller ने सरकारच्या या उपक्रमाचे स्वागत केले आहे. Truecaller या ऍपच्या प्रवक्त्याने सांगितले की, संवाद सुरक्षित आणि प्रभावी बनवण्याच्या मोहिमेतील सर्व कामांचे आम्ही स्वागत करतो. स्पॅम आणि स्कॅम कॉलचा धोका दूर करण्यासाठी नंबरची ओळख खूप महत्वाची आहे. Truecaller च्या मदतीने आम्ही गेल्या 13 वर्षांपासून या महत्त्वाच्या मिशनवर काम करत आहोत. ते पुढे म्हणाले की, आम्ही ट्रायच्या या निर्णयाचे कौतुक करतो आणि आम्ही अशा उपक्रमांना पाठिंबा देत आहोत आणि भविष्यातही संवाद सुरक्षित करण्याच्या प्रयत्नांना आम्ही पाठिंबा देत राहू.

The post मस्तच! आता स्कॅम कॉलचा धोका दूर करणार TRAI चे ‘हे’ फिचर, जाणून घ्या… appeared first on थोडक्यात घडामोडी.

पुणे : गुगलवर तुमचे वैयक्तिक तपशील दिसल्याने तुम्ही जर अस्वस्थ असाल, तर आता तुम्ही या समस्येपासून मुक्त होऊ शकता. तुम्ही Google कडे तक्रार देखील करू शकता आणि तुमचे वैयक्तिक तपशील हटवू शकता. यासाठी गुगलने आपल्या यूजर्ससाठी एक पॉलिसी आणली आहे. गुगलच्या पॉलिसी हेडने याबाबत माहिती दिली.

गुगलच्या पॉलिसी हेड मिशेल चांग यांनी याबाबत सविस्तर माहिती देताना सांगितले कि, “जेव्हा तुम्ही Google वर तुमचे नाव, फोन नंबर, ईमेल ऍड्रेस किंवा घराचा पत्ता शोधता, तेव्हा अनेक वेळा तुम्हाला तिथून ही माहिती सहज मिळते. मात्र, अनेक लोक म्हणतात की खाजगी माहिती सार्वजनिक प्लॅटफॉर्मवर असणे योग्य नाही. यामुळे गोपनीयतेसाठी अधिक धोका निर्माण होतो.

युजर्ससाठी नवीन फिचर सादर :

सर्व गोष्टी लक्षात घेऊन, Google ने आता आपल्या वापरकर्त्यांना ही वैयक्तिक माहिती हटविण्याचा पर्याय उपलब्ध करून देण्याचा निर्णय घेतला आहे, ज्या अंतर्गत तुम्ही Google ला तुमचा फोटो, ई-मेल आयडी किंवा मोबाइल नंबर हटविण्याची विनंती करू शकता. यासाठी तुम्हाला गुगलच्या हेल्पलाइन ई-मेल आयडीवर ईमेल करावा लागेल.

वापरकर्त्याकडून विनंती मिळाल्यानंतर Google त्या विनंतीचे पुनरावलोकन करणार आहे. त्यानंतर, वापरकर्त्याच्या विनंतीनुसार, त्याचे वैयक्तिक तपशील Google प्लॅटफॉर्मवरून हटवले जाणार आहेत, मात्र असे करूनही, ही माहिती इतर ऑनलाइन प्लॅटफॉर्मवर उपलब्ध होऊ शकते. ते हटवण्यासाठी तुम्हाला त्या प्लॅटफॉर्मच्या तक्रार आयडीवर तक्रार करावी लागेल. त्यानंतरच तेथून माहिती काढली जाईल.

गुगलने स्पष्ट केले आहे की ते केवळ अशी माहिती हटवत, ज्यामुळे वापरकर्त्याला कोणत्याही प्रकारची फसवणूक किंवा तोटा होण्याची शक्यता असते. उर्वरित माहिती मात्र प्लॅटफॉर्मवर अबाधित राहू दिली जाईल.

The post Google चे नवीन फिचर! आता तुम्ही Google वरून हटवू शकता तुमची वैयक्तिक माहिती… appeared first on थोडक्यात घडामोडी.